Масктай, майхантай жагсаал, Х.Баттулгыг сэжиглэн шалгах хуулийнханы ажиллагаа, МоАХ-ын Засгийн газрыг огцруулах мэдэгдэл, албан тушаалтнуудын баривчилгаа, сонгууль тойрсон үйл явдлын мэдээллүүд гээд үзэх, харах юмтай хаврын өдрүүд үргэлжилж байна. Үүнтэй зэрэгцэн манай улс төрийн зарим өндөр албан тушаалтнуудын хэлсэн үг, хийж буй мэдэгдлүүд олон нийтийг харин ч нэг уйдаахгүй юм. Сүүлийн өдрүүдэд олон нийтийг ярих яриатай болгосон улс төрчдийн хариуцлагагүй мэдэгдлүүдийг сонирхуулахад...

УИХ-ын гишүүн Л.Эрдэнэчимэг өчигдөр ингэж мэдэгдэв. Үүнийг сонссон хүмүүс “Л.Эрдэнэчимэг Засгийн газрыг огцруулдаг болоо юу” гэж гайхаж байна. Тэрбээр “Энэ баривчилгаа нэгжлэг бол цагдаагийн газраас хийж байгаа ажил. Тэгэхээр цагдаагийн газрын даргыг томилдог Ерөнхий  сайд, цагдаагийн газрын хийж байгаа хууль бус ажиллагааг зогсоохгүй бол дөрвөн сайдаа татна. МоАХ өөрсдийн сайд нарыг татаж Засгийн газрын унагаах чиглэл рүү явж магадгүй. Ийм ч шаардлагыг Ерөнхий сайдад тавьж байгаа” гэв. Түүний хэлээд буй дөрвөн сайд нь Гадаад хэргийн сайд Л.Пүрэвсүрэн, Хууль зүйн сайд Д.Дорлигжав, Зам тээврийн сайд М.Зоригт, ХХАА-н сайд Р.Бурмаа нар юм. Тэгэхээр эднийг эгүүлэн татаж Засгийн газрыг огцруулна гэсэн үг. Засгийн газрыг Ардчилсан нам  “Шударга ёс” эвсэлтэй хамтран байгуулсан болохоос биш МоАХ гэдэг төрийн бус байгууллагатай эвсэж байгуулаагүй. МоАХ бол АН гэж  харагдах болохоос биш улс төрийн өөр нэгэн хүчин биш. Энэ бол фракцуудын үйл ажиллагаа намын бодлогоосоо хальж гарсаны жишээ. АН-ын фракцууд намын дүрэм, журамдаа захирагддаггүйн тод илрэл. Бас нэг нөхөр шалгуулахгүйн тулд Засгийн газрыг огцруулна гэж заналхийлэх зөв үү. Хууль дуудсан бол зангиагаа засаад, гутлаа өмсөөд очиж шалгуулах нь улс төрчөөс гарах л ёс зүй. Үнэхээр л хэрэг хийгээгүй бол зугатахын оронд хурдхан шалгуулж нэр төрөө цэвэрлэж авахыг олон нийт Х.Баттулгад зөвлөж байна. Гэтэл намайг шалгуулбал Засгийн газрыг чинь түйвээнэ хэмээн ярьж явах жишээтэй. Түүнийг нь Л.Эрдэнэчимэг гишүүн албан ёсоор мэдэгдэж буй нь үнэхээр хариуцлагагүйн жишээ. Нөгөө талаар  Л.Эрдэнэчимэгийг гишүүнийг улс төрд боловсорч чадалгүй бүрэн эрх нь дуусч байгааг олон нийтэд харуулсан үйл явдал боллоо.

 Гадны хэвлэлүүд манай Ерөнхий сайд Ч.Сайханбилэгийн мэдэгдлийн талаар шуугиж байна.  Тухайлбал, Дэлхийн хамгийн том мэдээллийн хэрэгсэл болох “The Wall Street Journal" цахим сайтад Ерөнхий сайд Ч.Сайханбилэгийн Хонг-Конгт болсон “Credit Suisse” банкнаас зохион байгуулдаг Азийн хөрөнгө оруулагчдын чуулга уулзалтад оролцохдоо хэлсэн үгийн талаар мэдээлэл нийтэлжээ. Тэнд “Ядуу монголчуудын нөхцөл байдал сүүлийн үед хүндхэн байна. Уул, уурхайгаас хамааралтай тус улс дампуурсан. Монголын гадаад валютын нөөц хоосорч, төгрөгийг ханш огцом уналаа. Өнгөрсөн долоо хоногт олон улсын зах зээлээс 500 сая доллар босгосон ч энэ нь зээлжих зэрэглэлийн 11 хувьд ч хүрэхгүй юм. Ерөнхий сайд Сайханбилэг гадны хөрөнгө оруулагчидтай Хонконгт ярилцаж, уул уурхайгаас өөр салбарт хөрөнгө босгохоор оролдож байна. Тодруулбал, тэрбээр Монголын өргөн уудам талд өсөж буй 54 сая малаараа гайхуулж явна. Тэрбээр "Монгол улс бол хамгийн ардчилсан малтай. Учир нь дураараа бэлчээрлэж, дуртай хоолоо иддэг учраас бид хамгийн ардчилсан мал аж ахуйтай" гэж хэлсэн байна. Дэлхий дээрх хамгийн амттай, органик мах Монголд байдаг л байх. Хамгийн харамсалтай нь мал, мах байлаа гээд зэсийн үнэд хүрнэ гэж үү” гэж бичсэн байна. The Wall Street Journal-ийн тоймч Алекс Франгос Ерөнхий сайдыг дээрх мэдэгдлийг шууд утгаар нь буюу тоглосон шинжгүйгээр хүлээн авч "Монголд хөрөнгө оруулмаар бол махыг нь сонирхоод үзэх үү” нийтлэлээ бичсэн нь энэ юм.

Гадны нэр хүнд бүхий хөрөнгө оруулагчдын өмнө Ерөнхий сайдын хэлсэн уг мэдэгдэл байгаа олоогүйгээс гадна Монголын нэр хүндийг унагаж орхисон үйл явдал боллоо хэмээн улс төр судлаачид шүүмжилж байна. Нэг үгээр хэлбэл, гадны хөрөнгө оруулагчдаа улс төрийн тогтворгүй нөхцөл байдлаасаа болж хөөж гаргачихаад одоо махаар хуурах гэж оролдсон нь өөрсдийг нь онигоонд орууллаа. Нөгөөтэйгүүр Хонконгод очсон хөрөнгө оруулагчид Монголын уул уурхай, улс төрийн талаар голчлон сонирхож байхад манай Ерөнхий сайд урдаас нь мал ярьсан. Энэ нь ч бүтэлгүйтсэнээс гадна дэлхий нийтийн анхаарлыг татсан инээдтэй зүйл болсон юм. Тийм учраас гаднын хэвлэлүуд Ч.Сайханбилэгийн 54 сая ардчилсан малын махыг "оймсонд боогоод" өөдөөс нь шидэж байна. Гурван сая ардчилсан иргэнтэй Монголын эдийн засаг бас нэг боломжийн өмнө бүдэрсэн нь энэ. Гадныхан шоолоод инээж л байна. Хөрөнгө оруулагчдыг ээлж дараалан хөөж явуулсан улсын АРДЧИЛСАН МАЛ-д нь итгээд ирэх хүн байна уу, байна гэхэд Алекс Франгосийн хэлсэн шиг мал, мах байлаа гээд зэсийн үнэд хүрнэ гэдэгт хамгийн их учир байгаа юм. Уул уурхайд хөрөнгө оруулах нөхцөл байдлын талаар ярих байтал ардчилсан мал ярьсан нь Ерөнхий сайдыг мэдрэмжгүй, мэдлэггүй гэж хэлэхэд хүргэж байна.

Үүнээс илүү олны нүдийг бүлтийлгэж, чихийг дэлдийлгэсэн мэдэгдэл бол Хотын дарга Э.Бат-Үүлийн хэлсэн үг. Тэрээр сошиал хэрэглэгчдийг лаларууд гэж хэлсэн нь нийгмийн сүлжээ хэрэглэгчдийн дургүйцэл, гомдлыг төрүүлсэн. Нийгмийн сүлжээ хэрэглэгчдийн зарим нь хотын даргыг өөрсдөөс нь уучлал гуйхыг ч шаардсан. Хотын дарга Э.Бат-Үүл "Нүүрээ нуусан хүн шиг өвчтэй, зоригтой хүн байдаггүй. Гивлүүрийг нь аваад хаячихаар хөгийн амьтад байдаг. Хувийн амьдрал нь үнэхээр бүтэлгүй, гэр бүлийнхэнтэйгээ хүртэл хэл амаа ололцдоггүй, нэр хүндгүй, хавь орчноо залхаачихсан өрөвдөлтэй амьтад байдаг. Өвчин, солиорлоо интернэтийн ард сууж гаргадаг нэр нүүргүй, хүн доромжилж суудаг ЛАЛАРуудыг ЛАЛАР гэж хэлсэн минь үнээн" гэжээ. Өнөөдөр нийгмийн сүлжээг тодорхой хэмжээгээр хэрэглэдэггүй хүмүүс ховор. Гэтэл хотын дарга хотынхоо иргэдийг лаларууд гэж хэлсэн нь угаас л байж боломжгүй доромжлол гэж үзэх хүмүүс байна. Сошиал хэрэглэгчдийн дунд лаларууд байж болох ч хотын дарга Э.Бат-Үүл тэднийг тодотгож доромжилсон нь өөрөө доошоо орох шаардлага байсан ч юм уу, үгүй ч юм уу.

24tsag.mn