УИХ-ын Хуульзүйн байнгын хорооны  өнөөдрийн хуралдаанаар Үндсэн хуулийн цэцийн 2016 оны 03 дугаар дүгнэлтийг хэлэлцэх үеэр Р.Гончигдож, Ц.Нямдорж хоёр нэлээд ширүүн маргав. УИХ-ын гишүүн Ц.Нямдорж "Р.Гончигдорж оо чи дээд шүүхэд намайг тэнцүүлээд өгөөч ээ гээд өргөдөл өгсөн биз дээ. Ийм байж болохгүй ш тээ. Дээд шүүх асуудлаа хэлэлцээд шийддэг ёстой. Чи намайг тэнцүүлээд өгөөч гэж хичээнгүйлэн хүсэж байна гэж өргөдөл гаргах ямар шаадлагатай юм. Хуулийн цаана Монголын нэр хүнд гэж юм байгаа. Албан тушаалын төлөө чи ийм хогийн байж болохгүй" хэмээсэн юм. 

Харин хариуд нь Р.Гончигдорж гишүүн "Ц.Нямдорж гишүүн ээ, би ч гэсэн ухаантай мэт ярьж чадна шүү. Цэцийн тухай бүх хуулиудад би бага хурлын дарга байхдаа гарын үсэг зурж байсан юм. Цэцийн хуулийг анх батлаж гарсан байлаа. Би Ардчилсан хувьсгалыг амь биеэ золиослон хийхдээ албан тушаал руу явж байгаагүй. Миний хувьд албан тушаал гэдэг бол зүгээр л үүрэг. Би хаана хэрэгтэй байна, тэр газар л очих ёстой гэж үздэг. Юун гуйх, гувших. Үнэхээр цэцэд тодорхой хэмжээнд ярьж хөөрөх тийм үүрэг надад байгаа. Хаана өөрчлөлт хэрэгтэй байна, тэр газар би өөрийгөө зориулахад бэлэн. Албан тушаалын төлөө гэж бодож явдаг хүн  ийм юм ярьдаг. Чи тэгвэл албан тушаалд дуртайдаа дандаа УИХ-ын гишүүнд нэр дэвшээд, сонгогдоод, жагсаалтаар бас ороод байсан юм уу" хэмээн бухимдлаа илэрхийллээ. 

Хууль зүйн байнгын хорооны дарга Б.Ганбат "Манай Ц.Нямдорж гишүүнд оролцохгүй юм гэж байхгүй" хэмээн сануулж, үндсэн асуудлаа хэлэлцүүлэх гэсэн боловч маргаан даамжирч, Ц.Нямдорж гишүүн "Дээд шүүх чамайг унагана. Харж л байгаарай. Тэнд чинь бас тархитай хүмүүс байдаг юм. Ер нь танай АН-ынхан яахлаараа зүгээр ажлаа хийж яваа хүнийг хугацаанаас нь өмнө элдэв шалтаг зохиож, халж байдаг юм" хэмээн бухимдаж, хуралдааныг орхин гарсан юм. 

Ингээд Байнгын хорооны хуралдаанд оролцсон гишүүдийн олонх Үндсэн хуулийн цэц хууль зөрчин дүгнэлт гаргасан учир уг дүгнэлтийг хэлэлцэх шаардлагагүй гэж үзсэн учир холбогдох албан бичгийг Үндсэн хуулийн цэцэд хүргүүлэхээр тогтлоо.

Т.Энхэлээ