УИХ-ын чуулганы өнөөдрийн хуралдаан эхэллээ. Хуралдаанаар АТГ-ын дарга Н.Ганболдыг үүрэгт ажлаас нь чөлөөлөх асуудлыг хэлэлцэж байна. Тэрбээр өөрийн хүсэлтээр үүрэгт ажлаасаа чөлөөлөгдөх хүсэлтээ Ерөнхийлөгч Ц.Элбэгдоржид өнгөрсөн мягмар гаригт өргөн барьсаныг ийнхүү УИХ-ын чуулганы хуралдаанаар хэлэлцэж байна.

Хэлэлцэж буй асуудалтай холбогдуулан УИХ-ын гишүүд асуулт асууж, хариулт авч байна.

УИХ-ын гишүүн Ж.Батзандан: Сонгууль дөхсөн эгзэгтэй цаг үед албан тушаалаасаа татгалзах болсон нь ямар учиртай вэ?. Таныг тэтгэвэрт гар гэж хэн нэгэн дарамталсан уу. Мөн олигархи бүлэглэлүүд хууль хяналтын байгууллагыг тэмцлийнхээ зэвсэг болгож байгаа гэх мэдээлэл байгаа. АТГ-т ийм нөлөөлөл бий юу. Нэрээр нь хэлнэ үү? Авлигатай тэмцэхэд ямар ажил садаа болж байгааг хэлээд өгөөч. Офшор бүсэд улс төрчид өчнөөн тэрбум төгрөг нууж байгаа. Энэ тал дээр АТГ ямар ажил хийдэг вэ?. АТГ-аас шаардлага хангаагүй олон засаг даргыг аймагт томилсон байдаг. Энэ үнэн үү?

АТГ-ын дарга Н.Ганболд: Ямар нэгэн асуудлыг дарамт, шахалт гэж ойлгодоггүй. Би өөрөө төрийн тусгай албанд олон жил ажилласан. Тэгэхээр дарамт, шахалт талаас нь ойлгохгүй байгаа. Олигархи бүлэглэлийг нэр зааж хэлэхгүй. Улс төрийн хүрээнд яригдах асуудал. Мэдээлэхээр болбол хуулийн дагуу мэдээлнэ. Би АТГ-ын даргыг 4 жил 6 сар хийлээ. Манай байгууллага авлигатай яаж тэмцдэгээ бичгээр өгч болно.  Офшор бүсийн хувьд манай байгууллагад гадаад харилцаа бий. Бид их оролдсон. Хуулиндаа хүртэл өөрчлөлт оруулсан. Гэхдээ боломж байхгүй юм байна лээ. Яам, агентлагийн дарга нарыг томилохдоо сонирхолын зөрчилтэй хүмүүсийг томилсон тохиолдол бий. Тэр тухай бүрт нь Засгийн газрын хэрэг эрхлэх газрын дарга С.Баярцогтод бичиг хүргүүлж чадсан.

УИХ-ын гишүүн Ц.Оюунгэрэл: Та авлигаас ангид байж чаддаг уу. АТГ-ын ажилчдыг авлигаас ангид байлгахын тулд та ямар ажил зохион байгуулсан бэ. Зохион байгуулсан гэхэд таны санаачилсан ажил цаашид үргэлжлэх боломжтой юу. Өнгөрсөн 4 жилд таны хөрөнгө оруулалт яаж өөрчлөгдсөн. АТГ-т ажиллаад гэнэт баяжсан хүн байдаг уу. Танай байгууллагын бүх мэдээлэл нууц учраас ажилтнуудын чинь талаар мэдээлэл авах боломж энэ юм байна.

АТГ-ын дарга Н.Ганболд: АТГ-ын ажилчдын хөрөнгө орлогын мэдүүлэг нь ил байгаа. Миний хувьд төрийн өндөр албан тушаалтын зэрэглэлд хамаарагдаад хөрөнгө орлогын мэдүүлэг маань олон нийтэд зарлагддаг. Миний хөрөнгө орлогын мэдүүлэг айхтар өөрчлөгдөөгүй. Би аль нэг компанид хувьцаа эзэмшдэггүй. АТГ 160 орчим ажилтантай. Манай байгууллагад аюулгүй байдал хяналт шалгалтын газар байдаг. Түүгээр шалгаад явна. Даргын хувьд би хэн, ямар машин, байшинтай байгааг ажигладаг. Харахад тийм айхтар өөрчлөлт байгаагүй.

УИХ-ын гишүүн З.Баянсэлэнгэ: АТГ-аас бусдыг авлигаас ангид байлгахын тулд ямар ажил зохион байгуулсан бэ. Ямар хэргүүдээс урьдчилсан сэргийлж чадсан бэ. АТГ айлгадаг, дарамталдаг газар гэдэг. Соён гэгээрүүлдэг ажлаа хийж чадсан уу. Та хараат бусаар ажиллаж чадсан уу?

Н.Ганболд: Соён гэгээрүүлэх ажлаа хийж ирсэн. Хараат байж чаддаг гэв.

Т.Энхэлээ