УИХ-ын чуулганы өчигдрийн хуралдаанаар Авлигатай тэмцэх газрын дарга, тэргүүн комиссар Н.Ганболдыг чөлөөлөх асуудлыг хэлэлцсэн. Хэлэлцэж буй асуудалтай холбогдуулан гишүүд Н.Ганболдоос асуулт асууж, хариулт авсан юм. Мөн саналаа хэлж байв. Тэдний зарим нь улиг болсон гомдлоо АТГ-ын даргад хэлж байсан бол бусад нь хатуу, ширүүн үгийг хайр, найргүй шидэлж байлаа. Тэдгээрийн дундаас УИХ-ын гишүүн Н.Алтанхуягийн хэлсэн үг олны анхаарлыг ихээхэн татав. Түүнийг АТГ хийгээд уг байгууллагатай холбоотой улс төрчдийг битүү утгаар зарлалаа хэмээн олон нийт ярьж байна. 

Тэрбээр “Н.Ганболд та МАН-ын дарга М.Энхболдыг хотын дарга байхад Цагдаагийн газрын дарга байсан.  Намайг АН-ын дарга байхад Ерөнхийлөгчийн саналаар Н.Ганболдыг АТГ-ын даргаар томилж, дэд даргаар нь Б.Хурцыг томилж байсан. Энэ бүх хүмүүс нийлээд өнөө хонгилыг үүсгэсэн. Үнэн үг хэлсэн хүнд Ерөнхийлөгч хүртэл өшөөтэй.  Н.Ганболд даргаа, Та хоншоор гаргаж чадаагүй, хонгил нээдэг хүн л болсон. Би таныг өрөвдөж байна. Та хожим дурсамжиндаа бүх үнэнийг бичээрэй. Одоо хэлж чадахгүй байж магадгүй. Та нар бол хүнийг барьж, хорьдогоороо дэндсэн хүмүүс. Манай Засгийн газрын үед арай ч ийм байгаагүй юм. Дараа нь хэнийг тавих гэж таныг чөлөөлж байгаа юм бол. Та хонгилын хаалга нээж хуйвалдаанд оролцохоос залхсан уу, нэг л юм болоод ажлаа өгч байна. АТГ бизнесмэнүүдийг бүгдийг нь алсан. Монголд бизнес эрхэлж байхаар УИХ-ын гишүүн болъё гэсэн олон залуус байна. АТГ-ын ажилчид өөрсдөө авлига авдаг. АТГ-ын ажилтан нь өөрөө Ерөнхий сайдын зөвлөх болчихсон байна. Ийм зүйл байж болохгүй” гэсэн юм.  

Тэрбээр үүгээрээ Ерөнхийлөгчийг дахин шүүмжлээд авав. Бас Ерөнхийлөгч өөрийн гар, хөл болох байгууллагаараа улс төрчдийг шалгуулдаг, барьж хориулдаг гэх утга санааг нийгэмд шидлээ. Мөн Ерөнхийлөгч Ц.Элбэгдорж, МАН-ын дарга М.Энхболд, АТГ-ын дарга асан Н.Ганболд, ТЕГ-ын дарга Б.Хурц нарыг хуйвалдааны хонгилыг бий болгосон хүмүүс гэсэн битүү утгатай үгийг хэлэв.

Тэрбээр өмнөх долоо хоногт мэдэгдэл хийж “Эх орноо гэх сэтгэлгүй, ханаж цаддаггүй шуналтай хүмүүс төрийн эрх мэдлийг хувийнхаа явцуу зорилгодоо увайгүй ашиглаж монгол хүн Монголдоо сайхан амьдрах хүслийг нугачин дарж Засгийн газрыг хүртэл огцруулж, төрөө хутган үймүүлж баялаг бүтээгчдээ айдас хүйдэст автуулж, хуулийн нэрээр шоронгоор далайлгаж, айлгаж, мөнгийг нь бизнесийг нь, лицензийг нь ил тод дээрэмдэж байна. Хуйвалдааны төр бүлэглэл үүсгэдэг, хууль хяналтын байгууллагыг бохир зорилгоо ашигладаг цөөхөн хүн бүхий хонгилыг хууль хяналтын байгууллагад үүсгэсэн. Тэнд таалагдаагүй, барьцаалах боломжгүй, золиослох шаардлагатай хүмүүсээ ямар ч шударга ёсны хэмжүүр байхгүйгээр зохиомол хэрэг үүсгэн, ялтан хэрэгтэн болгож чадаж байна. Тэд ашиглах гэсэн зарим хүмүүсийн шийдвэр гаргах эрхийг нь сүрдүүлэн барьцаалаад сейфэнд хийгээд барьцаалагчихдаг болсон.  Тэр хүн бол “Шударга байцгаая” гэж гарч ирсэн Монгол Улсын Ерөнхийлөгч Цахиагийн Элбэгдорж" хэмээн хэлсэн.

Ингэж хэлсний дараагаар Ерөнхийлөгч Ц.Элбэгдоржоос ямар нэгэн реакци Н.Алтанхуяг гишүүнд ирсэн байх магадлалтай байна. Тэрбээр "Үнэн үг хэлсэн хүнтэй Ерөнхийлөгч хүртэл өшөөтэй" гэж хэлсэн. Үүнээс үзвэл дээрх мэдэгдэл хийснээс нь болж Ерөнхийлөгч Ц.Элбэгдорж түүнтэй улам өширхөж эхэлсэн бололтой. 

Сөрөг хүчнээ муухай харагдуулах зорилготой МАН-ын ажиллагаанд Н.Ганболд дарга оролцсон уу. Эмх, замбараагүй их баривчилгааны ард МАН-ын том хүн байгаа юм биш биз.

Бас нэгэн ноцтой зүйл нь АТГ-ын дарга асан Н.Ганболд МАН-ын дарга М.Энхболдтой ойр дотно харилцаатай гэх ойлголтыг өглөө.Тэгэхээр МАН-ын даргын оролцоо Авлигатай тэмцэх газарт байдаг уу гэх хардлага олон нийтэд төрж эхлэв. Сүүлийн үед АТГ-ынхан АН-ынханыг толгой дараалан шалгаж, хорьж, цагдаж байна. Шалгаж, хорьж байгаа хүмүүсийнх нь дунд МАН-ынхан ховор. Сонгууль ойртох бүр энэ үйл ажиллагаагаа идэвхжиж буйг бид харж байгаа. Тэгэхээр МАН-ын даргын оролцоотойгоор АН-ынханыг шалгаад байгаа юм биш биз гэх хардлага ч байна. Хамгийн сүүлд УИХ-ын гишүүн Х.Баттулгыг шалгаж түүний ойр дотны 4 хүнийг баривчлан саатуулсан. Түүний өмнө Н.Алтанхуягийн ахлах зөвлөхөөр ажиллаж байсан Л.Гансүх нарыг шалгасан. Авлигатай тэмцэх ажилд АН-ынхан өртөөд байгаа нь Н.Алтанхуягийн өчигдөр хэлсэн үг үнэний ортой гэж үзэх шалтгаан болж байна.

Сонгуульд ойртсон үед сөрөг хүчнээ муухай харагдуулах зорилготой МАН-ын ажиллагаанд Н.Ганболд дарга оролцсон уу. Эмх, замбараагүй их баривчилгааны ард МАН-ын том хүн байгаа юм биш биз гэж олон нийт хардаж эхэллээ.

Аль нь ч байсан АН-ынхан хоорондоо зодолтож ёстой л бусдын хүсээд байгаа шиг муухай харагдаад байгаа нь үнэн билээ.

24tsag.mn