Яг одоо Тусгаар тогтнолын ордонд МАН-ын Удирдах зөвлөл хуралдаж байна. Үүний дараа Бага хурал хуралдах юм. Хуралдаанаар сонгуулийн мөрийн хөтөлбөрийг батлах, МАХН-тай эвсэх асуудал зэргийг хэлэлцэнэ. Эх сурвалжийн мэдээлж буйгаар  МАН ба МАХН-ын эвслийн ажлын хэсгүүд эцсийн байдлаар тохирч гарын үсэг зурцгаасан байна. Уг дүгнэлтийг МАН-ын Удирдах зөвлөл яг одоо хэлэлцэж байгаа юм.

Ч.Хүрэлбаатар, Ч.Улаан нараар ахлуулсан ажлын хэсгүүд МАН ба МАХН тойргуудаа 68:32 хувиар тохирсон байна. Энэ нь УИХ-ын 76 мандатын 51 нь МАН-д, үлдсэн 25 нь МАХН-д ногдохоор тохирсон гэсэн үг. Өөрөөр хэлбэл, УИХ-ын 76 мандатын гуравны нэгд МАХН-аас нэр дэвшүүлнэ. Үүнийг нь 48 тойрогтоо харьцуулбал МАХН 16, МАН 32 тойрогт нэр дэвшүүлнэ.

Харин жагсаалтын 28-ын 9-д нь МАХН-ын, үлдсэн 19-д нь МАН-ын нэр дэвшигч байх юм байна. Жагсаалтыг эрэмбэлэхдээ МАН-ын гурван нэр дэвшигч тутамд МАХН-аас нэг хүн байх юм байна. Жишээ нь, тус эвслээс намын жагсаалтаар 15 хүн УИХ-д орохоор болбол 10 нь МАН-аас, үлдсэн тав нь МАХН-аас орно гэж эвслийн гэрээг урьдчилан тооцжээ. Гэхдээ МАН, АН хоёр жагсаалтыг байхгүй болгохоор тохирсон гэх мэдээлэл байгаа билээ. Тэр тохиолдолд жагсаалтыг байхгүй болгох түүнийг дагсан УИХ-ын сонгуулийн тухай хуульд өөрчлөлт оруулах асуудлыг Үндсэн хуулийн цэцээс шийдвэрлэх юм.

Эцсийн шийдвэрийг удахгүй эхлэх МАН-ын Бага хурлаас гаргах юм. Дэлгэрэнгүй мэдээллийг эргэн мэдээлэх болно.

Т.Энхэлээ