АН-ын ҮЗХ 18.00 цагт хуралдахаар бэлтгэж байна. Өмнө нь хэд, хэдэн удаа хуралдах гээд чадаагүй уг хуралдаанаар АН-ынхан намынхаа сонгуульд оролцох мөрийн хөтөлбөр болоод намын эв нэгдлийн асуудлыг хэлэлцэнэ.

        Намынхаа ҮЗХ-ны хуралдааны өмнө Нийслэлийн АН хуралдаж сонгуульд дангаараа оролцох шийдвэрийг гаргасан байна. Тодруулбал, 2016 оны Нийслэлийн ИТХ-ын сонгуульд Нийслэлийн Ардчилсан намаас дэвшүүлэх мөрийн хөтөлбөрөө батлах, сонгуульд оролцох шийдвэрээ гаргах, намын сонгуулийн хороогоо байгуулах гэсэн гурван асуудлыг хэлэлцсэн юм. Ингээд хуралд оролцсон гишүүдийнхээ 100 хувийн саналаар намын мөрийн хөтөлбөрөө баталж, Нийслэлийн Ардчилсан нам дангаараа 2016 оны Нийслэлийн ИТХ-ын сонгуульд оролцох шийдвэр гаргажээ. Мөн Нийслэлийн Ардчилсан намын Сонгуулийн салбар хороог байгуулжээ. Даргаар нь Нийслэлийн Засаг дарга бөгөөд Улаанбаатар хотын захирагч, Нийслэлийн Ардчилсан намын дарга Э.Бат-Үүл, Ерөнхий менежерээр нь Нийслэлийн ИТХ-ын дарга, Сүхбаатар дүүргийн Ардчилсан намын дарга Д.Баттулга, Нарийн бичгийн даргаар нь Нийслэлийн Ардчилсан намын Хэрэг эрхлэх газрын дарга П.Нүрзэд нар ажиллах юм.

Үүнтэй зэрэгцэн Дархан-Уул аймгийн АН-ын гишүүд суулт зарлаж байгаа юм. Тэд дөрөв дэхь өдрөө суулт зарлаж байгаа бөгөөд Н.Мөнхдаш тэргүүтэй намын хороог дүрмийн бус хэмээн үзэж байгаа юм.

Т.Энхэлээ