МАХН Бага чуулганаа хуралдуулж байна. Хуралдаанаар сонгуульд оролцох мөрийн хөтөлбөр болон МАН-тай эвсэх эсэх асуудлыг хэлэлцэж байгаа юм. Цаашилбал МАН-тай эвслээ гэхэд ямар зарчим, арга барилаар сонгуульд оролцох эсэхээ ярилцаж байна. Өчигдөр МАН, МАХН-ын эвсэх ажлын хэсгийн ахлагч нар болох УИХ-ын гишүүн Ч.Хүрэлбаатар, Ч.Улаан нар Төрийн ордонд мэдээлэл хийж, хоёр нам 51:25 гэсэн зарчмаар мандатуудаа хуваах болсон гэдгийг дуулгасан билээ. Мөн намын жагсаалтын эрэмбийг 3:1 гэсэн дарааллаар явуулахаар болсон гэдэг. Өөрөөр хэлбэл, МАН-ынхан эхний гурван нэр дэвшигчээ эрэмбэлэх бол дөрөв дэх хүнийг нь МАХН-аас санал болгоно гэсэн үг.

Энэ дагуу МАХН-ын жагсаалтыг экс Ерөнхийлөгч Н.Энхбаяр тэргүүлэх сураг байна. Гэхдээ түүнд улс төрийн албан тушаал хаших эрх байхгүй гэж АТГ-аас мэдэгдэж байгаа билээ. Хэрэв түүнд сонгуульд нэр дэвших хуулийн боломж олдвол тэр жагсаалтыг тэргүүлэх нь ойлгомжтой. Жагсаалтыг тэргүүлэх дараагийн хүнийг МАХН дотроос хайвал Ж.Сүхбаатар байх магадлалтай. Өдгөө генсекийн үүрэг гүйцэтгэж байгаа, МАН-ын генсект өрсөлдөж явсан улстөрчийн хувьд багагүй эрсдэл хийж МАХН-ыг сонгосон түүнд цаад тохироо байгаа нь тодорхой. Мөн Ч.Улаан, Ц.Оюунбаатар Д.Тэрбишдагва гээд жагсаалтад орох хүмүүс байна.  МАХН-ын жагсаалтын сургийг цааш тандвал Э.Эрдэнэжамъяан, Э.Батшугар гээд залуус, эмэгтэйчүүдээс Ерөнхийлөгчид нэр дэвшиж явсан Н.Удвал гээд орж ирэх боломжтой. Мөн Д.Сэржбүдээ, Б.Тулга гэсэн нэрс ч дуулдаж байна.

Ямартай ч Н.Энхбаяр өөрийн хүү Э.Батшугарыгаа жагсаалтын 10-т эрэмбэлэхээр болсон талаар эх сурвалжууд мэдээлж байна. Бусад намын хувьд УИХ-д хоёр буюу түүнээс дээш дараалан ялалт байгуулсан намдаа гавъяатай хүмүүсийг жагсаалтад оруулдаг билээ. Харин МАХН-д энэ дүрэм үйлчилдэггүй бололтой.

Т.Энхэлээ