Өчигдөр МАН-д элсэж, гишүүнчлэлээ сэргээсэн УИХ-ын гишүүн Ц.Даваасүрэн, Х.Болорчулуун нар мэдээлэл хийлээ. МАН-ын удирдлагуудаас урилга ирснийг бодолцож үзээд МАН-д дахин элссэн гэдгийг УИХ-ын Ц.Даваасүрэн мэдээллийн эхэнд онцлов. Тэрбээр энэ талаар “Бид хоёр бол МАН-ын гишүүн байсан хүмүүс. Тиймээс эргээд эвлэрч, хамтарч ажиллъя л гэж байгаа юм. Яагаад дахин хамтарч болохгүй гэж. Хамгийн чухал нь МАН-ын сонгуулийн мөрийн хөтөлбөрт бид хоёрын бодол, саналыг тусгаж байгаа. Хэд, хэдэн асуудалд ч санал нэгдсэн. Тухайлбал, бидний хамгийн ихээр эсэргүүцэж ирсэн УИХ-д намын жагсаалтаар сонгогддог байдлыг халах дээр санал нэгдсэн. Монгол мал хөтөлбөр, малчдын талаар төрөөс баримтлах бодлогын баримт бичгээ үргэлжлүүлээд явъя гэж байгаа. Орон сууцны хөтөлбөрийг хөдөөд төвлөрүүлье гэдэгт санал нэгдсэн. Цаашилбал Халх голыг хөдөө аж, ахуйн органик бүс болгож өөрчлөх, чөлөөт бүсийн статусыг нь байхгүй болгох гэдэг зарчмын зүйл дээр санал нэгдэж байгаа юм” гэв.

МАН-д элссэнээр бие даагчдын баримталж ирсэн байр, суурьд ямар ч өөрчлөлт орохгүй гэж тэд хэлэв. Бид энэ намыг олон түмний итгэлийг хүлээсэн нам болгохын тулд ажиллана. Мөрийн хөтөлбөрүүдэд биднийг дэмжиж ирсэн иргэдийн саналыг тусгаж байгаа учир бид хамтарч байгаа. Хэдийгээр намд элссэн ч гэсэн Монгол улсын язгуур эрх ашиг байнга нэгдүгээрт байх болно. Өнөөдрийн бидний хийж буй энэ алхам  харийнхантай нийлж баялагаа цөлмөж байгаа хүмүүсийн үйлдлээс тэс өөр зүйл. Бид Монгол дотроо л учраа ололцох гэж байна. Бидний зарчим бол сонгогчдын эрх ашгийг нэгдүгээрт тавих юм гэж Ц.Даваасүрэн гишүүн энэ үеэр хэллээ.

Үүний дараа сэтгүүчдийн сонирхсон асуултад хариуллаа.

- Та хоёр 2016 оны сонгуульд хуучин тойрогтоо нэр дэвших үү. Мөн ирэх долоо хоногоос МАН-ын бүлгийн үйл ажиллагаанд албан ёсоор оролцоод явах уу?

- Хуучин тойргоосоо гэж ойлгож болно. Бүлэгт нэгдээд явна. Ер нь бол бидэнд тийм боломж байсан. МАН сонгуульд ялчихсан сайдаа хувиарлаж байхад нь орж бялуу хуваах гээд байгаа юм биш. Цөөнхтэй нэгдээд сонгуульд өрсөлдөх гэж байгаа юм.
 

- Та хоёр өчигдөр МАН-ын Бага хуралд оролцсон. Ц.Даваасүрэн таныг УЗ-ийн гишүүнээр сонгосон гэдэг нь үнэн үү ?

- Гишүүдийн 93 хувийн саналаар дэмжигдсэн. Бодлогын түвшинд бидний саналыг сонсож явъя гэдэг үүднээс УЗ-дөө багтаасан.

- Г.Уянга гишүүн та хоёрыг намдаа урьсан гэсэн. Түүний саналыг хүлээж авахад юу саад болов?

- Хугацаа тулсан. Энэ удаагийн сонгууль нэг ялгаатай. Би Г.Уянгад ч хэлж байсан. Бидний зорилго бол нэг шүү дээ. Хэрэгжүүлэх арга замууд нь ялгарчихаад байгаа болохоос. Орон нутгийн сонгууль ИТХ-ын сонгуультай хамт болно. Тэгэхээр шинэ намд Баян-Өлгий, Ховд, Увсад ИТХ-ын 31 хүнтэй багаа бүрдүүлсэн шинэ нам байна уу. Байхгүй байна.  Үлдэж байгаа 7 хоногт ийм өөрчлөлтийг хийх ямар ч боломж байхгүй. Г.Уянга бид нар Нэгдмэл Монгол-Бие даасан нам байгуулах гэж оролдсон боловч бүртгэж өгөөгүй. Г.Уянга гишүүний нам бол Улаанбаатарын түвшинд л ажиллахаас өөр аргагүй байна.

- Ц.Даваасүрэн гишүүн дөрвөн жилийн өмнө намаасаа гарч байсан. Тэр үеэсээ хойш МАН өөрчлөгдсөн үү?

- Миний байсан үеэс өөр болсон. Намайг хөөсөн намын дарга нь ч одоо ажиллахгүй байгаа.

ТЭнхэлээ