УИХ-ын гишүүн Г.Уянга МҮАН-аас гарч Тусгаар, тогтнол эв нэгдлийн намын дарга болсон. Улсын дээд шүүх тус намыг нэг жилийн өмнө бүртгэсэн бөгөөд хэн үүсгэн байгуулсан гэдэг нь өнөөдрийг хүртэл тодорхойгүй байсан юм. Анхны дарга нь  Ц.Баянбилэг гэх хүн бөгөөд тэрбээр 10 хоногийн өмнө Г.Уянгад ажлаа хүлээлгэж өгчээ. Тэгвэл тус нам нь УИХ-ын гишүүн Х.Баттулгын “халаасны нам” гэдэг нь тодорхой болсоор байна. Тус нам өнгөрсөн даваа гаригт анхны өргөтгөсөн хуралдаанаа хийсэн юм. АН-ын ҮЗХ,  МАН-ын Бага хуралтай зэрэгцэн хийсэн тус намын хуралдааныг "С1" телевизээр шууд дамжуулсан бөгөөд хуралд УИХ-ын гишүүн Л.Цогоос гадна Х.Баттулга гишүүний хөтөлдөг "Монгол тулгатны 100 эрхэм" нэвтрүүлгийн зочид очиж шууд дамжуулалтын найруулагчаар Б.Баатар ажилласан нь Х.Баттулгынх гэдгийг олон нийтэд ил болгосон. Энэ үеэр тус намын дарга Г.Уянгын "Х.Баттулга гишүүнийг ирвэл манай нам хоёр алгаа тосоод хүлээж авна" хэмээн хэлсэн нь дээрх таамаглалыг бүрэн баталж,  энэ бол аль эрт төлөвлөгдсөн зохиол гэдгийг батлав.

Дээрхээс дүгнэвэл Х.Баттулга гишүүн АН-аас гарах бэлтгэлээ  аль нэг жилийн өмнө хийж байсан гэдэг нь тодорхой байна. Тодруулбал, үүрээ засаад эхэлчихсэн байж. Харин Г.Уянга гишүүн Х.Баттулгын үүсгэн байгуулсан намд л уригдан очиж үйл ажиллагааг нь илээр явуулж байна. Ойр тойрныхныг нь шалгаж, цагдаж байгаа хүндхэн үед хатуу байр сууринаасаа ухрахгүйгээ үйлдлээрээ илэрхийлж “АН-аас гарна. Болохгүй бол бие даана шүү” гэсэн анхааруулгыг намынхандаа өгсөн Х.Баттулга улс төрийн өөр нүүдлийг Г.Уянгаар дамжуулан хийж буй нь энэ. Намдаа гомдсон тэрбээр АН-ын ҮЗХ-ны хуралд суугаагүй нь ч үүнтэй холбоотой. Х.Баттулгын туслахыг хориход мөн “Баянгол” зочид буудал дахь “Түмэн хишигтэн”, “Баялагийн хувь” компаниудыг нь шалгахад Г.Уянга дагаж гүйн хамгаалж, хаацайлж дуугаараад байсан нь бас л ийм  учиртай байж. Эх сурвалжийн мэдээлж буйгаар Тусгаар тогтнол, эв нэгдлийн намд МоАХ-ынхан болох УИХ-ын гишүүн Д.Ганбат, Л.Эрдэнэчимэг гэх мэт нөхөд Х.Баттулгыг дагаж очиж магадгүй гэх мэдээлэл байна. Гэхдээ тэд ийм шийдвэрийг гаргатлаа удна. АН гэх том айлаас өрх тусгаарлах тийм амар биш. Гэхдээ Х.Баттулгад төлөвлөсөн зүйл бий биз.

Одоогоор мянга гаруй гишүүнтэй гэж буй уг намын гишүүд хэн бэ гэдэг асуулт олны анхаарал татна. Тус намын хуралд улс төр, бизнес, спортын хүрээнийхэн, тэр дундаа алдар цуутай ахмадууд цөөнгүй очсон ч чухам яг гишүүн болж элссэн эсэх нь эргэлзээтэй байгаа юм.  УГЗ Д. Амбасэлмаа, Хөдөлмөрийн баатар Ж.Гүррагчаа, Г.Хайдав, хуульч, өмгөөлөгч С.Нарангэрэл, УИХ-ын гишүүн Л.Цог, “Херо” Б.Баатар, Х.Цагаанбаатар нар очжээ. Өөрөөр хэлбэл, Хөдөлмөрийн баатрууд, гавъяатууд, намаасаа шахагдсан хүмүүсийн нэгдэл байж магадгүй юм гэж зарим хүмүүс үзэж байна. Мөн Нарантуулын босс Ш.Сайхансамбууг тус намд элссэн гэх мэдээлэл байгаа юм. Өө, зайгүй сүлжилдэх болсон Х.Баттулга, Г.Уянга хоёрын хоршил хаа хүртэл үргэлжлэхийг хэлэхээд эрт байна.

Т.Сар