ОХУ-ын Ерөнхийлөгч Владимир Путин өчигдөр 16 орны элчээр томилогдож буй элчин сайд нарын итгэмжлэх жуух бичгийг хүлээн авлаа. Тухайлбал, Их Британи, Япон, Габон, Молдав, Тайланд, Болив, Энэтхэг, Узбекстан, Уругвай, Австрали, Пакистан, Киргизстан, Индонез, Бүгд Найрамдах Того Улс, Бүгд Найрамдах Самоа Улсын зэрэг 16 орны Элчин сайдууд Кремлийн ордны Александрын танхимд албан ёсны cтатусаа авчээ. Энэ үеэр Монгол Улсаас ОХУ-д суух Онц бөгөөд Бүрэн эрхт Элчин сайдаар томилогдсон Б.Дэлгэрмаа Итгэмжлэх жуух бичгээ ОХУ-ын төрийн тэргүүнд өргөн барьсан байна. Ерөнхийлөгч Ц.Элбэгдорж бүрэн эрхийнхээ хүрээнд Монгол Улсаас ОХУ-д суугаа Онц бөгөөд Бүрэн эрхт Элчин сайд Ш.Алтангэрэлийг эгүүлэн татаж, Ерөнхий сайдын ахлах зөвлөхөөр ажиллаж байсан Б.Дэлгэрмааг томилох саналыг УИХ-тай зөвшилцөхөөр өнгөрсөн оны арванхоёрдугаар сард хүргүүлснийг гишүүдийн олонх дэмжсэн байдаг. Б.Дэлгэрмаа нь хууль, эрх зүй, улс төрийн салбарт олон жил ажилласан туршлагатай нэгэн юм. 1996-2000 онд УИХ-ын гишүүнээр ажиллаж байсан тэрбээр 2012-2014 онд Монгол Улсаас Сингапур улсад суух Онц бөгөөд Бүрэн эрхт Элчин сайдаар ажилласан туршлагатай. Итгэмжлэх жуух бичиг хүлээн авах ёслолын ажиллагааг Кремльд жилд 2-3 удаа зохион байгуулдаг юм байна.