Хуулийн дагуу намууд өчигдөр мөрийн хөтөлбөрөө Үндэсний аудитын газарт хүлээлгэн өгсөн байна. Эрх чөлөөг хэрэгжүүлэгч намынхан хамгийн эхэнд буюу 11:30 цагт мөрийн хөтөлбөрөө Үндэсний аудитын газарт хүргүүлжээ.

Харин АН-ынхан мөрийн хөтөлбөрөө 18:00 цагийн үед хүргүүлсэн бол үүнээс өмнө МАН-аас УИХ дахь МАН-ын бүлгийн дарга С.Баямбацогт тэргүүтэй хүмүүс аудитыг зорьжээ. АН-ынхан "Монгол хүн 2020" хөтөлбөрөө өргөжүүлсэн бол МАН мөрийн хөтөлбөртөө цалинтай ээж, бүх оюутанд 70 мянган төгрөг олгох асуудлыг тусгажээ. Мөн 1072 хувьцааг амь оруулах, үр өгөөжийг гаргах асуудлыг онцолсон байна. Тэгвэл МАХН-ынхан 17:10 цагийн үед 10+30+60=1000 Арван жилийн дотор 60 тэрбум ам.доллар зарцуулж, хөгжлөөрөө дэлхийд эхний 30 орны тоонд багтана, Мянганы төмөр зам барих ажлаа эхлүүлнэ, орон сууцгүй байгаа бүх өрхийг “О” түрээсийн зарчмаар орон сууцтай болгох, 150 000 хүнтэй аж үйлдвэр инновацийн цогцолбор найман хотгой болгох зэрэг бодлогууд тусгасан мөрийн хөтөлбөрөө хүргүүлсэн байна.

Энэ үеэр Эх орончдын эвсэл ч Үндэсний аудитын газарт ханджээ. Тэд төр, засгийн 20 жилийн алдаа оноог засч, нийгмийг сууриар нь өөрчлөх хөтөлбөр боловсруулсан гэнэ. Харин Монголын Ногоон намынхан ирээдүйн сан байгуулж нөхөн сэргээгдэх байгалийн баялгийн 10 хувийг энэ санд төвлөрүүлэхээс гадна ураны асуудлыг хөндсөн мөрийн хөтөлбөр хүргүүлжээ.