УИХ-ын чуулганы хуралдаанаар Засгийн газраас өргөн мэдүүлсэн Дипломат албаны тухай /шинэчилсэн найруулга/ болон холбогдох бусад хуулийн төслүүдийн хэлэлцэх эсэхийг хэлэлцэж гишүүдийн 70 хувийн саналаар дэмжлээ.

Хэлэлцэж буй асуудалтай холбогдуулан гишүүд асуулт асууж, үг хэлэв.

Тухайлбал, УИХ-ын гишүүн Ц.Даваасүрэн: Гадаад хэргийн яамны төрийн нарийн бичгийн дарга нь дипломат албаны хамгийн дээд мэргэжилтэн байна гэж хуулинд заасан байдаг. Үүнийг танай яам хэрэгжүүлж чадаж байна уу. Мөн ОХУ-д элчин сайдаар сууж байсан н.Алтангэрэлийг эгүүлэн татсан нь УИХ-ын түвшинд асуудал дагуулсан. Энэ ямар учиртай юм бэ?

ГХ-ийн сайд Л.Пүрэвсүрэн: Элчин сайдыг эгүүлэн татахыг хуулийн дагуу шийдвэрлэдэг. Мөн Ерөнхийлөгчтэй зөвшилцөнө. Төрийн нарийн бичгийн даргын хувьд залгамж, халаагаараа явж байгаа.

УИХ-ын гишүүн Д.Ганхуяг: Гадаад харилцааг эдийн засагжуулах нь их чухал. Энэ үйл ажиллагааны хүрээнд дорвитой ажил хийж чадахгүй байна гэж харж байна. Цаашид ямар ажил хийх вэ?. Элчин сайдын яамдын ажлыг дүгнэдэг журам байдаг уу. Элчин сайдын яамдынхан бол өөрөө өөртөө үйлчилдэг өөр хэнийг ч хүлээж авдаггүй ийм хэсэг бүлэг хүмүүс болсон байна.

ГХ-ийн сайд Л.Пүрэвсүрэн: Эдийн засагжуулах ажил бол гадаад бодлогын тэргүүлэх чиглэл юм. Тиймээс миний бие Монгол улсын гадаад бодлогыг эдийн засагжуулах хөтөлбөрийг боловсруулаад ажиллаж эхлээд байна. Чөлөөт худалдааны хэлэлцээрийг Японтой хийгээд хамтран ажиллаж байна. Мөн Хятадын хэлэлцээр хийгээд явж байна.

УИХ-ын гишүүн С.Дэмбэрэл: Эдийн засагжуулах гэж оновчгүй нэр томъёог хэрэглэж байна. Гадаад харилцаа эдийн засгийн ажлыг хийх л ёстой. Элчин сайдын нарын үндсэн чиг үүрэгт энэ чиглэлийн ажлыг тусгаж өгөх ёстой болов уу.

УИХ-ын гишүүн Д.Оюунгэрэл: Дипломат албанд ажилладаг хүмүүсийн амьдрал, ахуй хангамжид санаа тавьж байгаа нь сайшаалтай. Цаашид эмэгтэйчүүдийг дипломат албанд ажиллахад дэмжиж ажилладаг баймаар байна. Энэ чиглэлд эмэгтэй ажилчдын тоо тун цөөн байдаг.

УИХ-ын Б.Бат-Эрдэнэ: Гадны орнуудад сууж буй элчин сайдын яамд иргэдийнхээ эрх ашгийг хамгаалж ажилладаггүй. Эрх, мэдэлтэй хөрөнгө мөнгөтэй хүмүүсийг очихоор хөлөө хугалах шахам гүйнэ. Харин энгийн иргэддээ ерөөсөө үйлчилдэггүй. Энэ тал дээрээ анхаармаар байна. 

Гишүүд үг хэлж дууссаны дараа Төрийн албаны тухай хуульд нэмэлт оруулах болон Дипломат албаны тухай /шинэчилсэн найруулга/ болон холбогдох бусад хуулийн төслүүдийг дэмжих эсэхээр санал хураахад гишүүдийн олонх нь буюу 70 хувийн саналаар дэмжлээ. Хуулийн төслийг анхны хэлэлцүүлэгт бэлтгүүлэхээр байнгын хороонд шилжүүллээ.

Т.Энхэлээ