Барилга, хот байгуулалтын яамны Төрийн нарийн бичгийн дарга асан Р.Эрдэнэбүрэнг энэ сарын 1-ны өдөр АТГ-аас саатуулсан. Тэгвэл түүнийг өнгөрсөн пүрэв гаригт батлан даалтад гаргажээ.

Р.Эрдэнэбүрэнг Барилга, хот байгуулалтын яамны Төрийн нарийн бичгийн даргаар ажиллаж байхдаа “Барилгын салбарыг дэмжих, улмаар орон сууцны үнийг тогтворжуулах” дэд хөтөлбөрийг хэрэгжүүлэх ажлын хүрээнд хууль бус шийдвэр гарган, давтан үйлдлээр бусдаас хээл хахууль авсан байж болзошгүй үндэслэлээр эрүүгийн хуулийн тусгай ангийн 268 дугаар зүйлийн 268.2-д зааснаар шалгаж байгаа юм.

Р.Эрдэнбүрэн 2012 оны сонгуулийн дараачаас Шинэчлэлийн Засгийн газарт Барилга хот байгуулалтын яамны Төрийн нарийн бичгийн даргаар ажиллаж байгаад өнгөрөгч оны арванхоёрдугаар сард УИХ-д нэр дэвшихээр ажлаа хүлээлгэн өгч Ерөнхий сайд Ч.Сайханбилэгийн зөвлөхөөр ажиллах болсон юм. Тэр ирэх сонгуулиар өөрийн төрсөн нутаг Дундговь аймгаас УИХ-д нэрээ дэвшүүлэхээр төлөвлөж байсан ч түүнийг АТГ-аас баривчлан саатуулсны дараа АН-ын удирдлагууд УИХ-ын гишүүн Б.Наранхүүг тус аймгаас дахин нэр дэвшүүлэхээр болсон байна.