Ардчилсан нам 2016 оны УИХ, Орон нутгийн сонгуульд оролцох мөрийн хөтөлбөр болон холбогдох бусад бичиг баримтыг өнөөдөр морин цагт Сонгуулийн Ерөнхий хорооны дарга Ч.Содномцэрэнд гардууллаа.  Дараа нь УИХ-ын дарга, Ардчилсан намын дарга З.Энхболд, Нийслэлийн Ардчилсан намын дарга, Улаанбаатар хотын захирагч Э.Бат-Үүл, АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр, УИХ-ын гишүүн, УИХ дахь АН-ын бүлгийн дарга Б.Гарамгайбаатар, дэд дарга С.Одонтуяа болон УИХ дахь АН-ын бүлгийн гишүүд сэтгүүлчдэд мэдээлэл хийсэн юм.

Тус намын дарга З.Энхболд намынхаа мөрийн хөтөлбөрийн талаар "Ардчилсан нам Сонгуулийн тухай хуульд заасны дагуу 2016 оны УИХ-ын ээлжит сонгуульд оролцох, бүртгүүлэх бичиг баримтаа мөн Үндэсний Аудитын газраар хянуулсан мөрийн хөтөлбөрөө хянуулаад Сонгуулийн Ерөнхий хороонд өглөө. Бид уламжлалаа баримтлаад, бэлэгдлээ эрхэмлээд их үйлсийг эхлүүлэх, бүтээн босгох, барилдлага төгөлдөр, биелэл учрал бүрдсэн өдрийг саатан хүлээж байгаад өнөөдөр өгч байна. Ардчилсан нам экспортын 90 хувийг уул уурхайн түүхий эдийг эзэлсэн хөөсөрсөн эдийн засгийг дөрвөн жилийн өмнө хүлээж авсан. Уул уурхайн түүхий эдийн үнэ хоёроос тав дахин унаж эдийн засгийн хөөс хагарсан сорилтын жилүүдийг Ардчилсан нам ард түмэнтэйгээ цуг тууллаа. Эдийн засгийн бэрхшээлийг хараад бид гар хумхин суусангүй. Их бүтээн байгуулалтыг өрнүүлж, монгол хүнээ ажилтай орлоготой байлгахын төлөө бодлого үйл ажиллагаагаа чиглүүлж ирлээ. Манай нам 2012 онд улс орны хэтийг харж холын бодлоор боловсруулсан “Монгол хүн-2020” хөтөлбөрөө улам төгөлдөржүүлэн иргэддээ халамжид найддаг биш бүтээдэг, тэр хэрээрээ тогтвортой орлоготой болох бодлогыг баримталж ажиллалаа. Баялаг бүтээдэг ард түмэн баталгаатай амьдарч чадна гэж Ардчилсан нам үзлээ. “Монгол хүн-2020” хөтөлбөр шинэ шатанд гарч хэрэгжинэ. Өмнөх жилүүдийн туршлага, бодитой тооцоо судалгаанд үндэслэсэн “Монгол хүн-2020” хөтөлбөрөө хэрэгжүүлэхийн тулд Ардчилсан намын дарга миний бие сонгуулийн компаниа удирдаж, сонгуулийн олон менежерүүдтэйгээ, намынхаа олон зуун мянган гишүүдтэйгээ сонгуулийнхаа нүр их ажлын ард гарах болно. Бид амжилттай оролцож ард түмнээсээ олонхийн санал авна гэдэгт итгэж байгаа” гэлээ.

Үүний дараа сэтгүүлчдийн сонирхсон асуултад хариуллаа.

-Мөрийн хөтөлбөрөөсөө танилцуулж болох уу. Хямралтай уялдуулаан ямар  заалт орсон бэ?

- 100 жилд тохиолддог түүхий эдийн гурван супер циклийн үнэ унаж байхад бид олонхи болсон. Засгийн эрхийг авсан уу гэсэн шиг уул уурхайн бүх түүхий эдийн үнэ унасан. Ийм хэцүү үед бид эдийн засгийг бүтээдэг, солонгоруулах гэж ажилласан. Бид өнгөрсөн дөрвөн жил халамжийн мөнгө тараадаггүй болохыг зорьсон. Дөрвөн жилийн өндөрлөгөөс харахад энэ их ажлын ард гарсан байна. Баялаг бүтээдэг иргэдийг дэмжих, уул уурхайн бус экспортыг хоёр дахин нэмэгдүүлэхээр мөрийн хөтөлбөрөө боловсруулсан. Энэ дөрвөн жилд бид эдийн засгийн дэд бүтцийн суурийг тавилаа. Баялаг бүтээдэг олон мянган үйлдвэрийг ашиглалтад орууллаа. Эдгээр ажлууд цаашдаа улам эрч, хүчтэй үргэлжлэн ажиллана.

-Ирэх жилүүдэд өөр ямар асуудал шийдэх вэ. Өмнөх мөрийн хөтөлбөрөөс юугаараа ялгаатай вэ?

-Дэлхийн эдийн засаг унасан, цаашид сэргэх төлөвгүй байгаа нөхцөлд дахин дөрвөн жил амьдрах гэж байна. Аз таардаг шиг гэнэтийн 17 хувийн эдийн засгийн өсөлт дэлхийн аль ч улсад байхгүй болж байна. Өсөлт нь зогссон дэлхийн эдийн засагт яаж амьдрах вэ гэдгээ бодож мөрийн хөтөлбөрөө хийсэн. Уул уурхайн бус салбаруудаа хөгжүүлж, экспортыг нэн тэргүүнд гэдэг зорилтыг тавьж байгаа. Улам олон хүнийг ажилтай болгох ажлыг хийнэ.

-Өмнөх мөрийн хөтөлбөрийн хэдэн хувь нь биелсэн гэж үзэж байгаа вэ?

-2020 гэдэг хөтөлбөрийг 100 хувь биелүүлэх боломж үгүй. Учир нь энэ найман жилийн хөтөлбөр байсан. Бид "2020" мөрийн хөтөлбөрийн биелэлтийнхээ хувийг гаргаж байгаа. Зарим зорилт 100 хувь биелэсэн бол зарим нь 50, 60 хувьтай байна. Огт биелээгүй ч зорилт байна. Ялангуяа түүхий эдийн үнэтэй холбоотойгоор мөнгө шаардлагатай ажлууд тасалдсан байна. Үүнийг сонгуулийн сурталчилгаа эхлэх үеэр ард түмэндээ тайлагнана. Хуульд заасан сурталчилгааны хугацаа эхлэхээс өмнө мөрийн хөтөлбөрөө сурталчилж болохгүй. Гэхдээ ямар хэмжээгээр ард түмэнд сурталчилж болохыг Сонгуулийн ерөнхий хорооноос асууж байгаад дэлгэрэнгүй тайланг удахгүй хүргүүлнэ. Засгийн газрын мөрийн хөтөлбөрийн тайланг өнөөдөр УИХ-ын нэгдсэн чуулганаар хэлэлцнэ. Засгийн газрын мөрийн хөтөлбөр дотор АН-ын мөрийн хөтөлбөрийн нэлээн их хэсэг нь бий.

Т.Хулан