Ардчилсан нам өчигдөр сонгуульд оролцох мөрийн хөтөлбөр болон холбогдох бусад баримт бичгээ Сонгуулийн Ерөнхий хороонд өгөв. Өнөөдрийн байдлаар нийт 10 нам, эвсэл УИХ-ын 2016 оны сонгуульд оролцох хүсэлтээ ирүүлсэн.  Сонгуулийн Ерөнхий хорооноос намуудын мөрийн хөтөлбөрийг хуульд нийцсэн байна гэж дүгнэвэл намуудийн сонгуульд оролцох албан ёсны эрх нь нээгдэж байна гэсэн үг.

МАН-ынхан мөрийн хөтөлбөртөө иргэн бүрийн амьдралын үе шат бүрт зориулагдсан тодорхой бодлогыг тусгасан. Нийгмийн амьдралын бүх салаа мөчирт сэргэлт авчрах тооцоо судалгаатай мөрийн хөтөлбөр боловсруулсан гэж ярьж байгаа.

Харин АН 2012 оны сонгуульд дэвшүүлсэн “Монгол хүн 2020” хөтөлбөрөө үргэлжлүүлэн хэрэгжүүлэхээр болсон гэдгийг тус намын дарга З.Энхболд мэдэгдсэн. Тэрбээр “Манай нам 2012 онд улс орны хэтийг харж холын бодлоор боловсруулсан “Монгол хүн-2020” хөтөлбөрөө улам төгөлдөржүүлэн иргэддээ халамжид найддаг биш бүтээдэг, тэр хэрээрээ тогтвортой орлоготой болох бодлогыг баримталж ажиллалаа. “Монгол хүн-2020” хөтөлбөр шинэ шатанд гарч хэрэгжинэ” гэсэн нь өнөөдөр олны анхаарлыг татаж байна.

Тус нам өмнөх сонгуульд оролцсон “Монгол хүн 2020” хөтөлбөрөө жаахан засаад энэ жилийн сонгуулиар орох бололтой. Үүнийг сонссон улс төрийн хүрээнийхэн "АН-ыг ямар өрөвдөлтэй юм бэ" хэмээн нилээд шүүмжлэлтэй хандаж байгаа юм. Тодруулбал "Эрх барьж буй улс төрийн намд шинэ мөрийн хөтөлбөр боловсруулаад ороод ирэх хүч байсангүй юу. Эсвэл фракцийнхаа зодооныг зохицуулаад өөр мөрийн хөтөлбөр боловсруулах завгүй байв уу. Найман жилээр боловсруулсан мөрийн хөтөлбөр нь өнгөрсөн дөрвөн жил хэрэгжиж чадсан уу гэдэгт дүн тавих эрт ч бодитой хийгдсэн хэдэн том бүтээн байгуулалтаас өөр бариад зогсох зүйл байхгүй нь" гэцгээж байгаа юм.

“Монгол хүн 2020” хөтөлбөр бол “Ажилтай орлогтой монгол хүн”, “Эрүүл чийрэг монгол хүн”, “Эрдэм боловсролтой монгол хүн”, “Аюулгүй орчинтой монгол хүн”, “Эрх чөлөөтэй монгол хүн” гэсэн уриатай. Гэтэл өнгөрсөн хугацаанд эдгээр сайхан уриа нь ажил, хэрэг болж чадсан уу гэдэг эргэлзээтэй. Монгол хүнийг ажилтай, орлоготой, эрүүл чийрэг, эрдэм боловсролтой болгохоос илүүтэй нам доторх фракциудынхаа хэрүүлийг  зохицуулах гэж зовсон жилүүд л өнгөрлөө шүү дээ. Гэтэл огт хэрэгжиж гавиагүй мөрийн хөтөлбөрөө сайжруулаад дахиад оруулаад ирсэн нь тус намын нэр хүндэд муугаар нөлөөлж байна.

Тус намын дарга З.Энхболд 2012 оны “Монгол хүн 2020” мөрийн хөтөлбөрийг хэрэгжсэн эсэх талаар “-2020 гэдэг хөтөлбөрийг 100 хувь биелүүлэх боломж үгүй. Учир нь энэ найман жилийн хөтөлбөр байсан. Бид "2020" мөрийн хөтөлбөрийн биелэлтийнхээ хувийг гаргаж байгаа. Зарим зорилт 100 хувь биелэсэн бол зарим нь 50, 60 хувьтай байна. Огт биелээгүй ч зорилт байна” гэжээ. Гэтэл тус намын Ерөнхий нарийн бичгийн дарга Л.Эрхэмбаяр “Монгол хүн 2020” хөтөлбөрийн 85 хувь нь хэрэгжсэн гэсэн мэдээллийг хэвлэлээр өгсөн. Намын дарга, генсек хоёр нь хүртэл мөрийн хөтөлбөрийнхөө хэрэгжилтийн талаар нэгдсэн мэдээлэлгүй байхад АН-д хэн итгэж саналаа өгөх вэ. Ард түмэн дахиж хууртах уу.

Бас биелээгүй мөрийн хөтөлбөрийг ирэх дөрвөн жилд хэрэгжүүлж чадах уу гэдэгт эргэлзэж эхэлж байна. Ямартай ч АН шинэ мөрийн хөтөлбөр бус хэрэгжилт нь тэг заасан хуучин мөрийн хөтөлбөртэйгээ оролцох нь.  Цаашилбал өнгөрсөн хугацаанд ард түмний амьдралд ашиг, тусаа өгч чадаагүй мөрийн хөтөлбөрөө засаад орж байгаа нь тус намыг ялалт бус ялагдалд хүргэж мэдэхээр байна.

“Монгол хүн 2020” хөтөлбөрийг энд дарж үзнэ үү.

Т.Энхэлээ