УИХ-ын гишүүн Г.Уянга мэдээлэл хийлээ. Тэрбээр Ерөнхийлөгч Ц.Элбэгдоржийг Үндсэн хууль зөрчсөн гэх үндэслэлээр албан тушаалаас нь эгүүлэн татах хүсэлт гаргажээ.  Ерөнхийлөгч Ц.Элбэгдоржийг Канадын иргэн Каплаг өршөөсөн нь хууль зөрчсөн гэж тэрбээр үзсэн байна. Тиймээс Ерөнхийлөгчийн уг үйлдлийг хууль зөрчсөн эсэхээр Үндсэн хуулийн цэцэд хүсэлт гаргах тухай хүсэлтийг УИХ-д өргөн барьжээ. Уг хүсэлтийг өчигдөр Хууль зүйн байнгын хороогоор хэлэлцэхээр товлосон ч МАН-ын бүлэг завсарлага авсан юм. 

УИХ-ын гишүүн Г.Уянга энэ үеэр "Ерөнхийлөгч Ц.Элбэгдорж улсад их хэмжээний хохирол учруулсан гадаадын иргэнийг уучилсан. Тухайн үед нь би хоёр орны гадаад харилцаатай холбоотой асуудал хэмээн хүндэтгэлтэй хандсан. Гэтэл Жастин Каплад уучлал үзүүлчихээд байхад өрөө төлөхгүй байна. Энэ бол Монгол улсын төрийг дээрэлхсэн, дэндүү хүндэтгүй хандаж байгаа хэлбэр юм. Тиймээс уг асуудлыг УИХ хэлэлцэх ёстой гэж үзэж байгаа. Өчигдөр Хууль зүйн байнгын хорооны хуралдаанаар эл асуудлыг хэлэлцэх байсан ч МАН-ын бүлэг тав хоногийн завсарлага авсан. Ерөнхийлөгчийн зарлигийг хүчингүй болгох асуудлыг парламент хэлэлцэх ёстой гэсэн байр, суурийг би хатуу хадгалах болно" гэв. 

Дашрамд дуулгахад, УИХ-ын гишүүн Г.Уянга Тусгаар тогтнол-эв нэгдлийн намын даргын хувьд УИХ-ын гишүүн Л.Цогийг улстөрийн бодлогын зөвлөхөөр авч ажиллуулж байгаа аж. Л.Цог хүсэлтийг нь хүлээн авч зөвшөөрсөн хариу өгсөн байна. 

Т.Энхэлээ