Монгол Улсаас Мьянмарын Холбооны Бүгд Найрамдах Улсад суух Онц бөгөөд Бүрэн эрхт Элчин сайд Төмөрхүлэгийн Төгсбилгүүн Мьянмарын Холбооны Бүгд Найрамдах Улсын Ерөнхийлөгч Эрхэмсэг ноён Тин Чяу-д 2016 оны 4 дүгээр сарын 28-ны өдөр Итгэмжлэх жуух бичгээ Нэйпидо хотноо Ерөнхийлөгчийн ордонд өргөн барив.
Элчин сайд ИЖБ-ээ барьсантай холбогдуулан Мьянмарын Ерөнхийлөгчид бараалхах үеэрээ Монгол Улсын Ерөнхийлөгч Ц.Элбэгдоржийн чин сэтгэлийн мэндчилгээг түүнд уламжилж, Элчин сайдаар ажиллах хугацаандаа Монгол, Мьянмарын харилцаа, хамтын ажиллагааг бүхий л салбарт өргөжүүлэн хөгжүүлэхийн төлөө ажиллахаа илэрхийлэв. Мьянмарын Ерөнхийлөгч Тин Чяу Монгол Улсын Ерөнхийлөгчид талархал илэрхийлж, сайн сайхныг хүссэн хариу мэндчилгээг уламжлахыг Элчин сайдаас хүсээд түүнийг МХБНУ-д ажиллах хугацаанд нь Мьянмарын Засгийн газраас бүхий л талаар дэмжлэг, туслалцаа үзүүлэхээ илэрхийлэв.
Элчин сайд Т.Төгсбилгүүн Итгэмжлэх жуух бичгээ өргөн барьсантай холбогдуулан 2016 оны 4 дүгээр сарын 29-ны өдөр МХБНУ-ын Төрийн зөвлөх бөгөөд Гадаад хэргийн сайд хатагтай Аунг Сан Сү Чий, Гадаад хэргийн төрийн сайд Чяу Тин, Үндсэн хуулийн шүүхийн дарга Мё Нюнт нартай тус тус уулзаж, хоёр талын улс төр, худалдаа, эдийн засаг, хууль, эрх зүй болон бусад салбарын хамтын ажиллагааг бэхжүүлэх талаар санал солилцов.
Хоёр орны хооронд дипломат харилцаа тогтоосны 60 жилийн ой 2016 онд тохиож байгаа бөгөөд сүүлийн жилүүдэд Монгол-Мьянмарын харилцаа идэвхжин хөгжиж, өндөр, дээд түвшний харилцан айлчлалууд тогтмолжиж байгаа билээ. Мьянмар Улсад өрнөсөн ардчилсан өөрчлөлт, шинэчлэлийг дэмжихэд Монгол Улс өөрийн хуримтлуулсан туршлагаасаа хуваалцан, идэвхтэй хамтран ажиллаж байгаа болно.
