УИХ-ын гишүүн С.Ганбаатар Төрийн ордноо цаг үеийн асуудлаар мэдээлэл хийв. Тэрбээр "Хэвлэл мэдээллийн хэрэгслээр намайг том намуудад орж байгаа талаар багагүй мэдээллээ. МАНАН-д орсноос үхсэн нь дээр. МАН, АН-ынханд С.Ганбаатар биш, түүнд итгэж буй хүмүүсийн итгэл хэрэгтэй байж болно. МАН, АН-ын шударга олон дэмжигч намайг хайрладаг. Гэхдээ би МАН, АН-д элсэхгүй" гэлээ. Ийнхүү мэдээлэл хийсний дараа сэтгүүлчдийн сонирхсон асуултад хариулт өгсөн юм. 

-Сонгуульд та бие даан нэр дэвших үү?

-МАН, АН-ын эсрэг, ард түмний төлөө ямар ч хүчтэй эвсэж, эвлэхэд бэлэн байна.

-ХҮН-аас та гарчихсан юм уу?

-ХҮН-ыг хөл дээр нь босгож шинэ залуу хүмүүсийг улс төрд оруулахаар хичээж чармайж зүтгэсэн нь үнэн. Удирдаж, хариуцлага үүрч сонгуульд оруулъя гэдэг хүсэлтээ тавьсан. УДШ-д намайг намын даргаар бүртгээгүй, би жирийн гишүүнээр байгаа.

-Бие даан нэр дэвшихгүй, МАН, АН-д элсэхгүй гэхээр та МАХН-аас нэр дэвших юм уу?

-Миний хувьд Дархан-Уул аймагт нэр дэвшинэ. Харин хэрхэн гэдэг нь тодорхойгүй. Надад санал тавьсан эсэхийг МАХН-ынхнаас асуу. Би санал тавьсан хүмүүсийн итгэлийг алдаж болохгүй.

-Ч.Сайханбилэг Ерөнхий сайдыг өрсөлдөхийг уриалж эхэлсэн гэсэн үү?

- Улстөрчийг босоо байх уу хэвтээ байхуу гэдгийг урвагч Ерөнхий сайд шийддэггүй юм. Ч.Сайханбилэг, С.Ганбаатар хоёрын хэн нь босоо вэ гэдэг нь удахгүй тодорхой болно. Ч.Сайханбилэгийг Дархан-Уул аймагт ирж надтай өрсөлдөхийг урьж байна.