МАХН-ын Хяналт, ёс зүйн хорооны дарга Г.Давааням мэдээлэл хийлээ. Тэрбээр "УИХ-ын гишүүн Ч.Улаан Д.Тэрбишдагва нар МАХН-аас гарч байгаагаа улмаар "Шударга ёс" эвслийн бүлгээс гарч буйгаа мэдэгдээд 10 шахам хонолоо. Ч.Улаан Д.Тэрбишдагва нар нь МАХН-аас албан ёсоор чөлөөлөгдөөгүй” гэж мэдэгдсэн юм.

Тэрбээр энэ талаар доорх тайлбаруудыг хийв.

Нэгдүгээрт, намын дүрмийн 7-р зүйлийн 2-т МАХН-ын гишүүнээс гарах хүсэлтийг харьяалагдах намын анхан шатны байгууллагад бичгээр мэдэгдсэнээр намын гишүүний бүртгэлээс хасагдсанд тооцно гэсэн заалт бий,

Хоёрдугаарт, Д.Тэрбишдагва Ч.Улаан нар МАХН-ын бага чуулганаар сонгогдсон гишүүд. Тиймээс намын бага чуулганаар тэднийг бага чуулганы гишүүнээс чөлөөлөх хүртэл МАХН-ын бага чуулганы гишүүн хэвээрээ,  Д.Тэрбишдагва намын дэд дарга хэвээр байна гэсэн үг хэмээн мэдэгджээ.

УИХ-ын гишүүн Ч.Улаан Д.Тэрбишдагва нар намын гишүүнээсээ гарахыг Намын анхны шатны байгууллагаараа шийдвэрлүүлэх, намын сонгуульт ажлаа ээлжит бага чуулганаар чөлөөлүүлж байж дараагийн намд элсэх асуудал нь нээлттэй болно гэдгийг тэрбээр анхаарууллаа.
 

Т.Энхэлээ