Оюутолгойн далд уурхайн бүтээн байгуулалтын ажил өнгөрсөн бямба гарагт эхэлсэн.Үүнтэй холбогдуулан УИХ-ын гишүүн Ц.Даваасүрэн, Б.Бат-Эрдэнэ нар мэдээлэл хийлээ.

Далд уурхайн бүтээн байгуулалтад 6 тэрбум ам.доллар зарцуулахаар болоод байгаа талаар УИХ-ын гишүүн Ц.Даваасүрэн “Энэ мөнгийг олон улсын 15 банк санхүүгийн байгууллагаас авч байгаа. Ингэснээр Оюутолгойгоос манай улс 2021 онд хүртэх ёстой байсан ашиг 2037 он болж хойшлогдож байна. Гэтэл Оюутолгойн гэрээ 2038 онд дуусна. Ердөө ганцхан жил ашиг хүртэх нь. Тийм байтал манай Ерөнхий сайд баяр хөөртэйгээр үүнийг зарлан тунхаглаад байх юм” гэв.

Харин Б.Бат-Эрдэнэ "2008 оноос өнөөдрийг хүртэл тодорхой байр сууриа илэрхийлж ирсэн гишүүдийн төлөөлөл бол бид. Ерөнхий сайд Ч.Сайханбилэг 2015 оны 5 сарын 18-нд Дубайд очиж луйврын гэрээ байгуулсан. Дубайн төлөвлөгөө нэрээр өнгөлөн далдалсан гэрээ хийж Монголынхоо эрх ашгийг зөрчсөн. “Оюутолгой”-н төсөлтэй холбоотой ҮАБЗ-ийн тогтоол, УИХ, Засгийн  тогтоолууд гарсан байдаг. Гэтэл “Оюутолгой”-г барьцаанд тавьчихлаа. Ерөнхий сайд ийм ноцтой алдаатай шийдвэрийг гаргачихаад ирсэн. Муу үр дагавар гарчихаад байхад сайн болсон гээд сурталчилаад байж болохгүй. “Оюутолгой”-гоос монголчуудын хүртэх хувь тун бага байгаа болохоос биш, ажил зогсоогүй хөдөлж л байгаа шүү дээ. 2012 оноос өмнө бид Ерөнхий сайд Сү.Батболдын огцруулах асуудлыг тавьж байж “Оюутолгой”-н гэрээний ашигтай нөхцөлийг бүрдүүлж байсан. Гэтэл 2012 оноос хойш ажилласан нөхөд үүнийг үгүй хийлээ" хэмээлээ.