Хагас жил орчим эзэнгүй байсан ЭМС-ын сайдын сэнтий рүү АН-ынхан хэдийнэ санаархаж эхэлжээ. Энэхүү хүсэл нь ч биелэх бололтой. Уг нь энэхүү суудалд  МАХН-МҮАН-ын “Шударга ёс” эвсэлээс хүнээ томилох учиртай. Тиймээс ч өнгөрсөн долоо хоногт МАХН-аас албан ёсоор ЭМС-ын сайдад Монголын анагаах ухааны академийн Ерөнхийлөгч Ц.Лхагвасүрэнгийн нэрийг дэвшүүлж, Монгол Улсын сайд, ЗГХЭГ-ын дарга С.Баярцогт Эрүүл мэнд, спортын сайдыг томилуулах тухай тогтоолын төслийг УИХ-ын дарга З.Энхболдод өргөн барьсан.

Гэвч энэ асуудлыг хэлэлцэхгүй хойш тавьсаар эцэст нь өчигдөр сайдад нэр дэвшүүлсэн Ц.Лхагвасүрэнг дэмжсэнгүй. Тодруулбал, УИХ-ын Ниймийн бодлого, боловсрол соёл шинжлэх ухааны байнгын хорооны хуралдаанаар Эрүүл мэндийн сайдыг томилох асуудлыг хэлэлцсэн. Энэ үеэр байнгын хорооны дарга Д.Батцогт “Ц.Лхагвасүрэнгийн нэрийг “Шударга ёс” эвслийн бүлгээс өргөн барьсан. Гэвч эвсэл задарч одоогоор дөрвөн гишүүнтэй болоод байгаа. Нэгэнт ЭМС-ын сайдад Ц.Лхагвасүрэнг дэвшүүлэх асуудлыг Ерөнхий сайд өргөн барьсан учраас хэлэлцэх ёстой” хэмээсэн. Ингээд  санал хураалт явуулахад байнгын хорооны гишүүд уг асуудлыг дэмжээгүй юм.

ЭМС-ын сайдад нэр дэвшээд байсан Ц.Лхагвасүрэнг энэ салбарыг удирдаад явах чадвартай мэргэжлийн хүн гэдгийг хэлэх хүн олон байсан. Гэвч энэ суудалд өөрийн хүнээ тавих гэсэн эрхмүүд “Шударга ёс” эвслийг чадамжгүй болсон гэх нэрийдлээр нэр дэвшүүлсэн хүнийг нь дэмжсэнгүй.

 Ц.Лхагвасүрэн л Ерөнхий сайдын таалал нийцэж, сайд болох магадлалтай хэмээгдэж байсан ч эцэстээ “Шударга ёс” эвсэл энэ суудлаа АН-д алдах болоод байгаа юм.

Энэ асуудал эвсэл задрахаас өмнө, өдгөөгөөс хагас жил орчмын тэртээ яригдаж, МАХН-аас Н.Удвалаас эхлээд МАХН-ын нарийн бичгийн дарга Ц.Шаравдорж, УИХ-ын гишүүн асан Ж.Сүхбаатар, Гэмтэл согог судлалын үндэсний төвийн захирал асан С.Жамбалжав, УИХ-ын гишүүн О.Баасанхүү, Ц.Лхагвасүрэн нарыг томилох талаар яригдаж, заримынх нь нэрийг хүртэл танилцуулж байсан удаатай. Гэвч тэднээс зөвхөн Ц.Лхагвасүрэн л Ерөнхий сайдын таалал нийцэж, сайд болох магадлалтай хэмээгдэж байсан ч эцэстээ “Шударга ёс” эвсэл энэ суудлаа АН-д алдах болоод байгаа юм.

Уг нь ЭМС-ын сайдыг томилох асуудлыг “Шударга ёс” эвсэл задрахаас өмнө хэлэлцэх боломж байсан. Харин АН эвслийн задралыг хүлээж байсан болов уу гэлтэй хэлэлцэхгүй хойш тавьсаар ийнхүү эвсэл задарсны дараа хэлэлцэж, унагасан нь эрх мэдлийн төлөө, энэ суудлыг авах гэсэн санаархлаа биелүүлэхийн тулд өнөөдрийг хүртэл ЭМС-ын сайдыг томилохгүй явсан байна гэх хардлагыг ч төрүүлж байгаа юм.

Үүнийг нотлох мэт сайдын суудалд нэр дэвших эрхмийн нэр ч яригдаад эхэлсэн байна. Тодруулбал, тус салбарыг толгойлж байсан туршлагатай хэмээн ЭМС-ын яамны Төрийн нарийн бичгийн дарга С.Ламбаагийн нэр энэ суудалд яригдаж эхэлсэн гэдгийг эх сурвалжууд мэдээлсэн юм.  

Ийнхүү эрх баригчид сандал суудлын төлөө үзэлцэж байх хооронд толгойгүй яваа эрүүл мэндийн салбар уналтад орж, туйлдаад байна. Үүний нотолгоо нь ч хүн амын өвчлөлийн судалгаанаас бэлхнээ харагдах аж. Тухайлбал, халдварт бус өвчлөл хоёр дахин нэмэгдсэн бол амьсгалын замын өвчин 10 мянган хүнд 1579, хоол боловсруулах тогтолцооны өвчлөл 1133, зүрх судасны өвчлөл 954, гэмтэл, хордлого 567 ногдох болжээ. Түүнчлэн улаанбурхан өвчин газар авч, эл өвчнөөр одож буй хэдэн арван хүүхдийн амь нас ч энэ асуудалтай холбоогүй гэх баталгаа байхгүй юм. Тиймээс ЭМС-ын сайдыг суудлын төлөө тэмцэлдэхгүй нэг өдрийн өмнө ч гэсэн томилж, эзэнтэй болгох хэрэгтэй байна.  

24tsag.mn