МАХН-ын дарга Н.Энхбаярт холбогдох авилгалын шүүх хурал гурван удаа хойшлоод байгаа. Өмгөөлөгчөөсөө татгалзсан, бие нь муу, өмгөөлөгчөө сольсон гэх шалтгаанаар хойшлоод байсан шүүх хурлыг долдугаар сарын эхээр товлоно хэмээн Сүхбаатар дүүргийн шүүхээс мэдэгдэж байсан. Гэвч Н.Энхбаяр шүүх хурлыг долдугаар сарын 18 хүртэл хойшлуулах саналаа Сүхбаатар дүүргийн шүүхэд хүргүүлсэн байжээ. Мөн энэ хугацаанд хавтаст хэрэгтэйгээ бүрэн танилцаж, шүүх хурлын хойшлуулахгүй гэсэн ам мөчгөө өгсөн байна. Иймд шүүх бүрэлдэхүүн хүсэлтийг хүлээн авч, шүүх хурлыг долдугаар сарын 18-нд хийхээр товлосон хэмээн баттай эх сурвалж мэдээллээ. Хэдийгээр өмнөх шүүх хуралд МАХН-ын дарга Н.Энхбаяр хурлыг хойшлуулах хүсэлтийг гаргахдаа сонгуулийн дараа товлож өгөөч ээ хэмээн шүүх бүрэлдэхүүнээс хүсч байсан. Гэвч улсын яллагч Е.Сагсай уг хүсэлтийг хүлээн авахгүй гэдгээ мэдэгдэж байсан ч ийнхүү хойшлуулаад байгаа билээ. Түүнийг Эрүүгийн хуулийн тусгай ангийн 150.3, 263.2-т заасан хүндэвтэр зүйл ангиар буруутгаад буй. Хэрвээ шүүхээр гэм буруутай нь тогтоогдвол хуулийнхаа дагуу бүх эд хөрөнгийг хурааж, тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таваас дээш арван жил хүртэл хугацаагаар хорих ялаар шийтгүүлэх аж. Түүнтэй хамт До.Чулаанбаатар, Ж.Мягмаржаргал, Д.Дуламсүрэн нар мөн шүүгдэх юм.Б.Чимэг
