Ерөнхийлөгч Ц.Элбэгдорж өнгөрсөн бямба гаригт Дархан-Уул аймагт ажиллахдаа иргэдтэй уулзалт хийж, энэ үеэр ажлын тайлангаа тавьсан. Хэдийгээр түүний уулзалтад Дархан-Уул аймгийн иргэд оролцсон ч тэднээр төлөөлүүлэн Монгол Улсын иргэдэд ажлаа тайлагнаж буйгаа тэрбээр онцолсон юм.

Энэ үеэр иргэд Ерөнхийлөгч Ц.Элбэгдоржоос оффшор дансны асуудлаар ямар байр, суурьтай байгааг нь тодруулж тус бүсэд компанитай хүмүүст хэрхэн хариуцлага тооцохыг асуусан байна. Харин Ерөнхийлөгч Ц.Элбэгдорж иргэдийн асуултад хариулахдаа санаанд оромгүй хариултыг өгсөн нь өнөөдөр улс төрийн хүрээний сонирхол татсан сэдэв болоод байгаа юм. 

Түүний уг ярианаас учир битүүлэг байсан хэд, хэдэн зүйл тодорхой боллоо. Тодруулбал,  улс төрчдийг оффшор бүсэд данстай байхыг  хориглосон хуулийг гаргахад Ерөнхийлөгч өөрийн зүгээс бүх чадлаараа зүгээс дэмжлэг үзүүлэх нь тодорхой байна.

Нэгдүгээрт, Саяхан дуулиан шуугиан болж, мэргэн бууч хүртэл байрлуулсан байсан хэмээн "Том онигоо"-нд орсон УИХ-ын гишүүн Х.Баттулгын гэгдэх асуудал намжлаа. Саарал ордонд хөвөрч буй дам яриагаар бол нэгэн цагт Ерөнхийлөгч Ц.Элбэгдоржийн баруун гар болж асан Х.Баттулга Эбэ ахтайгаа хэл амаа ололцож, дээрх асуудлаа цэглэсэн гэх мэдээлэл байгаа юм. Тэгэхээр Х.Баттулгыг жийлцэхэд багагүй хувь нэмрээ оруулсан С.Баярцогтыг улстөрөөс арчих төлөвлөгөө Ц.Элбэгдорж, Х.Баттулга 2-т байгааг үгүйсгэх аргагүй.

Хоёрдугаарт, Тэрбээр намын нөхөр С.Баярцогтыгоо ирэх сонгуульд нэр дэвшүүлэхийн эсрэг байр, суурьтай байгаа юм байна.  С.Баярцогт төрд, АН-д гай болж байгаа нь үнэн билээ. Хийсэн хэргүүд нь баримт нотолгоотойгоо илэрчихээд байхад албан тушаал, авлигалд шунасаар байна хэмээн түүнийг шүүмжлэгчид олон. Түүний энэ дансыг олон улсын эрэн сурвалжлах нийгэмлэгийн сэтгүүлчид илрүүлээгүй бол Монголчууд өнөөг болтол мэдэхгүй байсан. Магадгүй С.Баярцогт өдийд Ерөнхий сайд болчихсон байсан байх. Гадаадад данстай нь илэрмэгц ард түмнээсээ уучлал гуйж УИХ-ын дэд даргаа өгч байсан хүн өнгөрсөн жил гэнэтхэн ЗГХЭГ-ын дарга болоод дэвшсэн. Жил хагасын дараа шүү дээ. Нөгөө өндөр албан тушаал хаших ёс суртахууны эрхгүй гэж ярьж явснаа мартаад ЗГХЭГ-ын дарга болсон гэсэн үг. Түүнийг УИХ-аас ч хөөх ёстой гэж олон түмэн үзсээр ирсэн. Одоо ч тэгж бодож байна. Хамгийн хачирхалтай нь С.Баярцогт гадаад дахь нууц дансныхаа мэдээлэл дээр China гэж бичсэн байсан. Энэ ганц мэдээлэл Монгол түмний бухимдлыг өнөөдрийг хүртэл төрүүлж байгаа. Өөрийгөө China гэж бичээд явж байгаа хүнд итгэж болох уу? Ийм хүнээр Монгол төрийг удирдуулж болох уу? гээд л. Тэгээд ч төрийн өндөр албан тушаал хашиж байгаа хүн оффшор данстай байж, түүнийгээ ард түмнээс нууж, өөрийгөө China гэж бичсэн нь хуулийн болоод ёс суртахууны асар том зөрчил. Ийм хүнд төр тэргүүлэх эрх байхгүй гэж ард түмэн үзэж байгаа. Харин С.Баярцогт УИХ-ын дэд дарга гэх билэгдлийн чанартай албан тушаалаа өгсөн болоод бүр илүү ахиж одоо Засгийн газрын хоёрдахь эрх мэдэлтэн болчихсон явна. Ирэх сонгуульд Сэлэнгэ аймагт хүч үзэхээр бэлтгэж байгаа.

С.Баярцогт хариуцлага хүлээх ёстой ч Ерөнхийлөгч түүний нэр дэвших, дэвшихгүйг шийддэг, дэвшихгүй байхыг нь сануулаад явдаг хүн ч бас биш юм.  Хуульд хориг тавихаас бусад үед ерөнхийлөгч УИХ-ын тэр дундаа гишүүдэд заавар чиглэл өгөх эрх байхгүй. Энэ үүднээс ерөнхийлөгч эрх мэдлээ хэтрүүлж АН-ын дарга шиг загнасан нь ч бас үнэн байна. Бүх зүйлд оролцож буруутанд хариуцлага тооцоод явах албан тушаалтан нь ерөнхийлөгч биш л гэсэн үг.

Ерөнхийлөгч Ц.Элбэгдорж С.Баярцогтын нэрийг цохож ард иргэдийн өмнө тодотгож ярьсан нь зүгээр нэг тохиолдол биш. Тэр тодорхой шалтгаантайгаар С.Баярцогтыг буруутгаж дуугарсан нь том шалтгаантай. Сүүлийн өдрүүдэд АН-ынхан дотроо томоохон зодооныг үүсгэж сонгуульд хэнийг хаана, нэр дэвшүүлэх цаашлаад сонгуулийн кампанит ажлыг хэн удирдах зэргээр нилээн том тэмцлийг нам дотроо эхлүүлээд байгаа аж. Эх сурвалжийн мэдээлж буйгаар тус намд Ерөнхийлөгчөөс чиглэл ирж С.Баярцогт, Ч.Сайханбилэг нарыг шахах ажиллагаа явагдаж байгаа гэнэ.  Мөн намын дарга З.Энхболд бүх талаар шахагдаж байгаа сурагтай. Тэгэхээр Ерөнхийлөгч Ц.Элбэгдорж АН-ын үйл ажиллагаанд албан бусаар оролцож эхэлсэн нь тодорхой байна. Бас нам дотроо зарим хүмүүстэй дайтаж эхэлсэн нь Дарханд хэлсэн үг болон сүүлийн үед хийж буй үйлдлээс нь харагдаж байгаа юм.

Дашрамд дурдахад, Нэгэн өмгөөлөгчийн хүсэлтээр Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсээс оффшор бүсэд данстай нь илэрсэн 49 эрхмийг өчигдрөөс шалгаж эхэлжээ.

Видео.

24tsag.mn