Улс төрийн намууд өнөөдрөөс сонгуульд нэр дэвшигчдээ тодруулна. Нэр дэвшүүлэх үйл явц энэ сарын 28-ны өдөр дуусна. Өнгөрсөн долоо хоногт МАН-ын Бага хурал хуралдахаар төлөвлөж байсан ч хойшилсон. Ардчилсан нам ҮЗХ-гоо энэ долоо хоногийн сүүлчээр хуралдуулна гэсэн мэдээлэл байна. Нэр дэвшигчдийн мэдээлэл эцсийн байдлаар тодорхой болоогүй ч намууд уг асуудлаар дотооддоо ярилцаж хэнийг, хаана нэр дэвшүүлэхээ бараг тодорхой болгосон байна. Тухайлбал, АН-ын удирдлагууд оффшор бүсэд данстай хүмүүсээ УИХ-ын сонгуульд өрсөлдүүлэхгүй гэх шийдвэрийг гаргажээ.

Энэ талаар тус намын дарга З.Энхболд телевизийн нэвтрүүлэгт орох үеэрээ “Би оффшор данс эзэмшигчдийн эсрэг байр суурьтай байна. Манай нам оффшор дансны асуудалд нэр холбогдсон хүмүүсийг УИХ-ийн сонгуульд нэр дэвшүүлэхгүй. Тиймээс С.Баярцогтыг УИХ-ын сонгуульд нэр дэвшүүлэхгүй" гэсэн юм.

Тэрбээр мөн өөрийн цахим хаягтаа “Тавдугаар сарын 23-аас сонгуульд нэр дэвшүүлж эхэлнэ. Оффшор бүсэд данстай хүнийг Ардчилсан нам нэр дэвшүүлэхгүй. Бусад намуудыг уриалж байна” хэмээн бичжээ.

Үүнээс үзвэл АН-ын дарга оффшор бүсэд данстай хүмүүсээ энэ удаагийн сонгуулиас жийх нь тодорхой байна. Цаашилбал, оффшорын асуудлаар бусдыгаа манлайлж буй С.Баярцогтыгоо нэр дэвшүүлэхгүй гэдгийг нэр цохон байж хэллээ. Тэгэхээр энэ удаагийн сонгуульд С.Баярцогт,  Кёкүшюзан Д.Батбаяр тэргүүтэй АН-ын гишүүд УИХ-ын сонгуульд нэр дэвшихгүй нь тодорхой боллоо.

АН-ынхан арав гаруй хоногийн өмнөөс шөнө, өдөргүй албан бусаар хуралдаж нэр дэвшигчдийнхээ асуудлыг ярилцсан гэж эх сурвалжууд хэлж буй. Ингэхдээ Ерөнхийлөгч Ц.Элбэгдорж намдаа заавар өгч С.Баярцогтыг нэр дэвшүүлж болохгүй гэж “тушаасан” гэдэг. Мөн ирэх сонгуульд АН-ыг удирдаж орох тэргүүн хүнээр З.Энхболдыг ажиллуулж болохгүй гэх шахалтыг Ерөнхийлөгчөөс өгсөн гэж байгаа юм.

Сүүлийн үед АТГ-ын даргыг томилох асуудлаас эхлээд олон зүйл дээр зөрчилдөх болсон тэд хэн нь, хэнийгээ үзэхээр тулалдаж буй. Харин энэ удаа УИХ-ын дарга З.Энхболд Ерөнхийлөгчид бууж өгч, зааврынх нь дагуу ажиллажээ.

Ерөнхийлөгч Ц.Элбэгдоржийн хувьд АН-ын нэр хүндийг унагаж буй төрчдийг зайлуулах болсон гэдгийг аль эрт мэдэгдсэн. Тэрбээр хоёр долоо хоногийн өмнө Дарханы иргэдтэй уулзах үеэрээ "Би С.Баярцогтыг УИХ-ын сонгуульд нэр дэвшихгүйгээр оффшор дансны асуудлаа шалгуулах хэрэгтэй гэж хэлсэн" гэж хэлсэн билээ. Энэ үеэс түүний бүх санаа тодорхой болсон юм.

Гэхдээ сонгуульд нэр дэвшүүлж болохгүй хүмүүсийн нэрсийн жагсаалт С.Баярцогтоор дуусгавар болох ёсгүй. Учир нь АН-д оффшор бүсэд данстай, авлига хээл хахуульд нэр нь холбогдсон олон хүн бий. Улсын мөнгийг хэдэн тэрбумаар идчихсэн гэх хэрэгт  холбогдон хууль хяналтын байгууллагаар шалгуулж буй хүмүүс ч бий. Тэднийгээ ч мөн нэр дэвшүүлэхгүй гэвэл АН авлигачдаасаа мөн хууль бус үйл ажиллагаа явуулдаг хүмүүсээсээ салж байна гэж харж болох нь. Улс төрийн ёс зүй гаргаж жинхэнэ утгаараа төлөвшиж байна гэж иргэд харах болно. Харин ганц С.Баярцогтыг шийтгээд өнгөрвөл шударга бус зүйл болно.

МАН ч мөн ялгаагүй. Тус нам оффшор бүсэд данстай хүмүүсийнхээ асуудлаар ямар, байр суурийг илэрхийлэх нь олны анхаарлыг ихээхэн татаж байна.

С.Баярцогт нь оффшор бүсэд данстай болох нь 2013 онд олон нийтэл ил болж тухайн үед ёс зүйн хариуцлага хүлээж УИХ-ын дэд даргаасаа чөлөөлөгдөж байсан юм.

24tsag.mn