Ерөнхий сайд Ч.Сайханбилэг нэгэн албан хүсэлтийг УИХ дахь Ардчилсан намын бүлгийн дарга Б.Гарамгайбаатарт өчигдөр хүргүүлсэн байна. Тус хүсэлтэд Шадар сайд Ц.Оюунбаатар, Барилга хот байгуулалтын сайд З.Баянсэлэнгэ, Батлан хамгаалахын сайд Ц.Цолмон Засгийн газрын гишүүнээс чөлөөлөх талаар дурджээ.

Ерөнхий сайд Ч.Сайханбилэгийн хүсэлт бол АН-ын байр, суурь гэсэн үг. Тэгэхээр АН-ынхан үлдсэн хоёр сарын хугацаанд Засгийн газраас МАХН-ыг явуулахаар шийдсэн нь тодорхой байна.  УИХ дахь МАХН-МҮАН-ын "Шударга ёс" эвслийн бүлэг задарч, эрх зүйн чадамжгүй болсон тул гишүүдийг нь Засгийн газраас явуулах нь зүйтэй гэж Ерөнхий сайд Ч.Сайханбилэг үзэж байгаа аж.

Тэрбээр хүсэлтдээ "Улс төрийн үйл явдал өрнөж, Улсын Их Хурлын 2016 оны ээлжит сонгууль болоход 40-өөд хоногийн хугацаа үлдээд байгаа энэ цаг үед хамтарч Засгийн газар байгуулсан нам, эвслээс МАХН-МҮАН-ын  "Шударга ёс" эвслийн бүлэг татан буугдаж звслийн нэг субьект МҮАН Улсын Их Хурлын 2016 оны ээлжит сонгуульд Ардчилсан намыг дэмжиж оролцохоор шийдвэрлээд байна. Харин МАХН-ын хувьд Улсын Их Хурлын 2016 оны сонгуульд бие даан оролцохоор шийдвэрлэсэн тул улс төрийн соёл дэлхий нийтэд баримталдаг нийтлэг жишгийг харгалзан Монгол Улсын Үндсэн хуулийн Гучин есдүгээр зүйлийн 3 дахь хэсэг. Засгийн газрын тухай хуулийн 23 дугаар зүйлийн 1 дэх хэсгийн 1-д заасан бүрэн эрхийнхээ дагуу Шударга ёс эвслийн бүлгээс томилогдсон Засгийн газрын гишүүдийг чөлөөлөх хүсэлтэй байна" гэж  тодотгосон байна.

Мөн ойрын өдрүүдэд дээрх гурван сайдыг Засгийн газрын гишүүнээс чөлөөлүүлэх саналаа Улсын Их Хуралд ойрын хугацаанд өргөн мэдүүлэхээр шийдвэрлэснийг үүгээр мэдэгдье гэжээ. УИХ-д өргөн барина хэмээн албан бичигтээ дурджээ. УИХ ч уг асуудлыг дэмжих нь тодорхой.

Одоо тэдний оронд хоёр сарын хугацаатайгаар хэнийг сайдын суудалд томилох эсэх нь анхаарал татаж байна. Эх сурвалжуудын мэдээлж буйгаар МҮАН-аас АН-д элссэн М.Сономпилийг Батлан хамгаалахын сайдаар томилж магадгүй аж. Харин Барилга хот байгуулалтын сайдад МҮДН-ээс хэн нэгнийг томилохоор ярилцаж байгаа бол Шадар сайдад Шонхор фракциас томилгоо хийгдэх гэнэ.

Т.Энхэлээ