“МОНГОЛ УЛСЫН ХӨРӨНГӨ ОРУУЛАЛТЫН ЦАХИМ ХӨТӨЧ СИСТЕМ” өнөөдрөөс ажиллаж эхэлж байна. Нээлтийн ажиллагаанд Монгол Улсын Ерөнхий сайд Ч.Сайханбилэг оролцлоо.
Олон улсын тавцанд ялангуяа, эдийн засгийн хувьд манай орон гадаадын хөрөнгө оруулагчдын сонирхлыг татсан хэвээр байна. Засгийн газар гадаадын шууд хөрөнгө оруулалтыг эдийн засгийн тогтвортой хөгжлийн гол түлхүүр хэмээн үзэж, хөрөнгө оруулалтыг бүх талаар дэмжих бодлого баримталж байна. 2013 онд Хөрөнгө оруулалтын тухай хууль баталсан, энэ хуулиар хөрөнгө оруулагчдыг хамгаалах, дэмжих тогтолцоог бий болгож, татварын болон татварын бус хөнгөлөлтүүдийг үзүүлж, зах зээлийг чөлөөлж, бизнес эрхлэх зардал, хүнд суртлыг багасгасан. Дэлхийн банкнаас гаргадаг Бизнес эрхлэх нь 2016 тайланд дэлхийн 189 улсаас манай улс 56 дугаарт жагсаж, хөрөнгө оруулагчийг хамгааллах тогтолцоогоороо 18 дугаарт бичигдэж байгаа нь манай хуулийн орчинд олон улсаас өгч буй өндөр үнэлгээ юм Ерөнхий сайд хэллээ.
Оюутолгой төсөл Монголын эдийн засгийг тэлэхэд ихээхэн чухал үүрэг гүйцэтгэсэн. Цаашид гүний уурхайн бүтээн байгуулалт мөн л эдийн засагт эерэг нөлөө авчрахын зэрэгцээ гадаадын хөрөнгө оруулагчдыг чиглүүлэгч гол төсөл байх болно гэдгийг тэмдэглэлээ.
Дэд бүтцийн салбарт олон олон бүтээн байгуулалтууд бий болж байна. Төслүүд нэмэгдэх хэмжээгээр гадаадын хөрөнгө оруулалт татах, хөрөнгө оруулагчдад дэмжлэг үзүүлэх шаардлага зайлшгүй тавигдах болсон. Хөрөнгө оруулалтын хуулийн хүрээнд 2015 оны байдлаар Хөрөнгө оруулалтын 3 гэрээ байгуулж, тогтворжуулах 8 гэрчилгээг хөрөнгө оруулагчдад олгожээ. Эдгээр төслийн хөрөнгө оруулалтын дүн 3 тэрбум ам.доллар байна. Түүнчлэн концессын 20 гаруй гэрээ байгуулсан бөгөөд эдгээрийн хувийн хэвшлээс хөрөнгө гаргаж, улсын төсвөөс огт дэмжлэг авахгүйгээр хэрэгжүүлэх /BOT/ төслүүдийн хөрөнгө оруулалтын дүн 4 орчим тэрбум ам.доллар байгаа юм
Монгол Улсын Засгийн газар эдийн засгаа төрөлжүүлэхэд ихээхэн анхаарал тавьж байна. Уул уурхайн салбар манай эдийн засгийн гол хөдөлгөх хүч гэдэг нь ойлгомжтой ч, худалдаа, аж үйлдвэрийн салбараа хөгжүүлэх нь нэн тулгамдсан асуудал болоод байна.
Хөдөө аж ахуй, органик, байгалийн жинхэнэ бүтээгдэхүүн бүхий хүнсний үйлдвэрлэл, асар их нөөц бүхий сэргээгдэх эрчим хүч, өсөн дэвжиж буй банк санхүүгийн салбар, хэрэгцээ шаардлага нь ихэссэн эрүүл мэндийн салбар, нөөц бололцоо ихтэй аялал жуулчлалын салбар, асар хурдтай хөгжиж буй мэдээлэл технологийн салбар, өндөр ашиг бүхий дэд бүтцийн салбар зэрэг олон бизнесийн салбаруудад хөрөнгө оруулалт шаардлагатай байна гэж Ерөнхий сайд хэллээ.
Засгийн газар нүүрсний ордуудыг эрчим хүч үйлдвэрлэхэд чиглүүлж байна. Тухайлбал, 700 MWT Багануурын цахилгаан станц, 60 MWT Увсын цахилгаан станц, Улаанбаатарын 5 дугаар цахилгаан станц, Тэлмэний цахилгаан станц зэрэг Концессын гэрээнүүдийг байгуулсан байна. Бөөрөлжүүтийн цахилгаан станцын Хөрөнгө оруулалтын гэрээнд өнөөдөр гарын үсэг зурах юм.
Хөрөнгө оруулалтын хуулинд цахим нэг цонхны үйлчилгээ үзүүлэхээр заасан. Энэ ажлын бас нэгэн үргэлжлэл нь өнөөдөр хэрэгжиж байна. Монгол улсад гадаадын хөрөнгө оруулагчдыг татах, таатай нөхцөл бүрдүүлэхэд тэднийг бодит, шинэлэг, зөв, хүртээмжтэй мэдээллээр хангах нь зайлшгүй хийх ёстой ажлуудын нэг юм гэдгийг онцлоод Монгол Улсын Засгийн газар тэр дундаа Хөрөнгө оруулалтын газар ЮНКТАД-тай хамтран хэрэгжүүлж буй “МОНГОЛ УЛСЫН ХӨРӨНГӨ ОРУУЛАЛТЫН ЦАХИМ ХӨТӨЧ СИСТЕМ” үнэтэй хувь нэмэр оруулна гэдэгт итгэлтэй байгаагаа илэрхийллээ.
