АСЕМ-ын дээд түвшний 11 дүгээр уулзалтын салбар хуралдаан болох Сангийн сайд нарын уулзалт өнөөдөр эхэлж байгаатай холбогдуулан АСЕМ-ын Бэлтгэл ажлын албаны орлогч дарга Б.Баясгалан , ГХЯ-ны Ёслолын газрын захирал, АСЕМ-ын Аюулгүй байдал, ёслол хил нэвтрэх асуудал хариуцсан нарийн бичгийн дарга Д.Тэгшжаргал нар мэдээлэл хийлээ.

Сайн сайд нарын уулзалт нь “Ази, Европын хөгжлийн төлөөх түншлэл” сэдвийн доор болж байгаа бөгөөд АСЕМ-ын уулзалтын хүрээн дэх уулзалтуудаас ач холбогдлоороо гурав дахь түвшний уулзалт болохыг мэдээллийн эхэнд онцлов. Уулзалтад АСЕМ-ын гишүүн 43 орны 210 гаруй төлөөлөгчид болон Япон, Эстони, Мальт улсын Сангийн сайд нар, найман улсын Сангийн дэд сайд нар, мөн олон улсын 12 банк санхүүгийн байгууллагын төлөөлөгч оролцохоор ирээд байгааг тодотгосон юм.

Уулзалтын хүрээнд гурван салбар хуралдаан болно. Тодруулбал,  

-Ази Европ тивийн макро эдийн засгийн хөгжил ба боломж

-Дэлхий нийтийн болон бүс нутгийн түвшинд санхүүгийн тогтвортой байдлыг хангах нь

-Ази болон Европын таатай харилцаа ба хамтын ажиллагаа сэдвээр тус тус хуралдах аж.

АСЕМ-ын Аюулгүй байдал, ёслол хил нэвтрэх асуудал хариуцсан нарийн бичгийн дарга Д.Тэгшжаргал Сангийн сайд нарын 12 дахь уулзалт болон АСЕМ-ын 11 дэх уулзалтын бэлтгэл ажлын талаар “АСЕМ-ын бэлтгэл ажлыг хангах үндэсний хороог Ерөнхий сайд ахалж байгаа. Дээд түвшний уулзалтын хүрээнд хэд хэдэн арга хэмжээ зохиогдохын нэг нь Сангийн сайд нарын 12 дахь удаагийн уулзалт юм. Эдгээр уулзалтын бүхий л талын бэлтгэл ажлыг Гадаад хэргийн яамны Ёслолын алба хариуцан ажиллаж байна. Бэлтгэл ажил төлөвлөгөөний дагуу жигд хангагдаад явж байна.

АСЕМ-ын дээд түвшний уулзалтад нийтдээ 51 орон, АСЕМ ба Европын холбоо гэсэн хоёр олон улсын байгууллага, одоогийн байдлаар нийтдээ 49 түнш уулзалтад оролцохоор мэдүүлгээ ирүүлсэн. Зарим орны төлөөлөгчид тусгай үүргийн онгоцоор хүрэлцэн ирэхээр байгаа. Манай алба зочид төлөөлөгчдийг онгоцноос буухаас уулзалт дуусах хүртэлх бүхий асуудлыг хариуцан ажиллаж байна. Манай улсад ирэх төр засгийн өндөр дээд түвшний төлөөлөгчдөд өгөх бэлгийн сонголтыг хийж дууслаа. Бид аль болох үндэсний үйлдвэрлэгчдийнхээ хийж бүтээсэн эко, үнэ хямд бүтээгдэхүүнийг сонгоод байна" гэв.