Нийслэлийн Баянзүрх дүүргийн 1,2,3,7,21,27-р хороод буюу 49 дүгээр тойрогт Эрчим хүчний сайд Дашзэвэгийн Зоригт нэр дэвшиж байгаа билээ. Сонгуулийн сунгаа эхэлсэн энэ өдөр Д.Зоригт НИТХ-д Ардчилсан намаас Баянзүрх дүүргийн 7-р тойрогт нэр дэвшигч Түмэндэлгэрийн Батцогт, мөн НИТХ-д Баянзүрх дүүргийн 8-р тойргоос нэр дэвшигч Майнбаярын Тулгат нартай хамт нээлтийн ажиллагаандаа оролцлоо. Нээлтийн ажиллагаанд Баянзүрх дүүргийн Засаг дарга, Дүүргийн АН-ын дарга Д.Пүрэвдаваа хүрэлцэн ирж, нэр дэвшигчдээ дэмжиж байгаагаа илэрхийлэв. Нээлт эхнээсээ л иргэдийн хүлээлт байсан мэт дэмжигчдийн халуун дулаан үг, алга ташилтаар дүүрэн байлаа.

Иргэний үнэмлэхээ дөнгөж авсан залуусаас эхлээд ная гарсан настан буурлууд хүртэл нээлтийн үйл ажиллагаанд хүрэлцэн ирж, арга хэмжээний эхэнд АН-д шинээр элссэн залуус намын батлахаа УИХ-д нэр дэвшигч Д.Зоригт, НИТХ-д нэр дэвшигч Т.Батцогт, М.Тулгат нараас гардан авцгаасан юм. Үргэлжлүүлэн нэр дэвшигчид маань индэр дээрээс сонгогчдодоо хандан үг хэлж, тус дүүргийн настангууд нэр дэвшигчдэдээ амжилт хүсэн ерөөж, алд цэнхэр хадаг, ариун цагаан сүүгээ мэлтэлзүүлсэн мѳнгѳн аягатай өргөн барив.

Энэ үеэр Д.Зоригт сайд АН-ын мөрийн хөтөлбөрөө иргэддээ ихэд нухацтай талбайрлаж өгнө лээ. Түүний ярианаас үзвэл энэ удаа АН иргэд рүүгээ чиглэсэн их ажлыг хийхээр төлөвлөсөн байна. Тэр тусмаа АН-ын дэвшүүлж буй “5 Сайн”, бүр тодруулбал иргэд рүү хандсан “Сайн хашаа”, боловсролыг дэмжсэн “Сайн оюутан” иргэдийн бизнес эрхлэх үйл ажиллагааг дэмжсэн “Сайн бизнес” хөтөлбөрийг танилцуулахад иргэд ухайлан дэмжиж байсныг дурьдах хэрэгтэй. Тухайлбал АН гарч ирснээр “Сайн хашаа” хөтөлбөр хэрэгжиж, хашаатай иргэн бүр 15 сая төгрөгийн зээлийг 5 хувийн хүүтэй авч, эхний таван жил зээлээ огт төлөхгүй, зургаа дахь жилээс зээлийн эргэн төлөлт сард 100 мянган төгрөгөөр төлөгдөж эхлэх юм байна. Үүнд зориулж Засгийн газар 200 тэрбум төгрөг гаргахаар төсөвлөчихсөн сайхан мэдээ дуулгалаа. Өнгөрсөн 91 жилийн түүхэнд Монгол Улс 2934 км замыг барьсан бол АН засаг барьсан сүүлийн гуравхан жилд 3405 км тавьжээ. Ганцхан энэ жишээнээс харахад л АН төр барьснаар ямар их ажил амжуулж, бүтээж чаддагийг ойлгож болно.

“ХИЙСНЭЭ АХИУЛЖ, ХӨГЖЛӨӨ ХУРДАСГАЯ” - энэ бол нэр дэвшигч Д.Зоригтын сонгуулийн уриа. Нээлтийн үеэр нэр дэвшигч Д.Зоригтоос сэтгэгдлийг нь хуваалцахад тэрбээр “УИХ-ын ээлжит сонгуульд нийслэлийн Баянзүрх дүүргийн 49 дүгээр тойрогт нэр дэвшиж байна. НИТХ-д нэр дэвшиж буй Т.Батцогт, М.Тулгат нартайгаа хамтарч нээлтээ хийлээ. Баянзүрхчүүдийг төлөөлсөн манай дэмжигч, сонгогчид, жирийн иргэд заалаар дүүрэн байсанд баяртай байна. Сонгуулийнхаа сурталчилгааг хуулийн дагуу явуулж, иргэдтэйгээ уулзана, АН-аас дэвшүүлж буй сонгуулийн мөрийн хөтөлбөрөө аль болох олон хүнд хүргэж, итгэл үнэмшлийг нь авч, цаашдаа хэрэгжүүлж ажиллана” хэмээж байв.

Мөн тус дүүргийн хоёрдугаар хорооны өндөр настан С.Шакин гуайгаас АН болон Д.Зоригт сайдын талаар тодруулахад “Миний бие АН-ын нөхдийн хийсэн ажлаар бахархаж байна. Яагаад гэвэл бүтээн байгуулалтыг маш сайн хийж, улсаа хөгжүүлж чадлаа. Манай дүүргийн хоёрдугаар хорооны казак иргэд АН-аа дэмжинэ гэдэгт би огт эргэлзэхгүй. Нэр дэвшигчээ ялна гэдэгт бүрэн итгэлтэй байна. Д.Зоригтын тухайд эрчим хүчний салбарт их ажил амжуулсан чадварлаг удирдагч. Зан, мөн чанарыг нь ч мэддэгийн хувьд Д.Зоригт сайдаа УИХ-д ахин гарахад нь бид дэмжинэ” гэж хэллээ.

Д.Зоригтын хувьд УИХ-д хоёронтоо сонгогдсон туршлагатай, тулхтай улстөрч юм. Тэрбээр УИХ-д ажиллахдаа Монгол Улсын эдийн засаг, хөрөнгө оруулалтын асуудалд гол анхаарлаа хандуулж ирсэн нэгэн. Эрчим хүчний салбарын сайдаар томилогдсон өнгөрсөн хоёр жилийн хугацаанд энэ салбарыг анх удаа алдагдалгүй ажиллуулсан гавьяатай юм. Очсон газар болгоноо өөдлүүлдэг чадварлаг менежер, ухаалаг удирдагч Д.Зоригтод Баянзүрх дүүргийн иргэд сонгогчид итгэл найдвар хүлээлгэж байна.

Ямартай ч заал дүүрэн хүрэлцэн ирсэн Баянзүрх дүүргийн иргэд Д.Зоригт сайдаа, мөн НИТХ-д дэвшиж буй Т.Батцогт, М.Тулгат нараа нэг сэтгэл, зүрхээр дэмжиж, ирэх дөрвөн жилд АН-аа ахиулан гарган, бүр олонх болгоод Монгол Улсаа хөгжүүлэхийн төлөө зүтгэнэ гэдгээ илэрхийлцгээж байлаа.

Нээлтийн үйл ажиллагааны төгсгөлд нийслэлийн Баянзүрхчүүд нэг зүрх сэтгэлээр УИХ-ын 49-р тойрогт нэр дэвшигч Эрчим хүчний сайд Д.Зоригтыг дэмжинэ гэдгээ илэрхийлэв.