Засгийн газрын өнөөдрийн хуралдаанаар Монгол Улсын нийгэм эдийн засагт чухал ач холбогдолтой асуудлуудыг хэлэлцэх нь. Хуралдаанаар Тавантолгойн цахилгаан станц төслийн хөрөнгө оруулалтын гэрээний тухай хэлэлцэхээр товложээ. Тавантолгойн цахилгаан станц төслийн удирдах хорооноос хөрөнгө оруулагчаар Японы “Marubeni” корпорацыг шалгаруулснаар Өмнөговь дахь бүтээн байгуулалтын ажил нэг шат ахисан юм. Өнгөрсөн оны тавдугаар сард Засгийн газар, "Рио Тинто”-той Оюутолгойн далд уурхайн бүтээн байгуулалтын төлөвлөгөөг батлах үеэр "Туркойз хилл ресурс” Тавантолгойн цахилгаан станц төсөлд хөрөнгө оруулалтын баталгаа гаргаж тохиролцсон байдаг. Засгийн газар том чадлын цахилгаан станцыг гэрээг хэлэлцэн шийдвэрлэснээр Оюутолгой, Тавантолгой зэрэг эрчим хүчний өндөр хэрэглээтэй компанидыг цахилгаанаар хангаад зогсохгүй, гадагшаа урсаж байгаа их валютын урсгалыг хаах бололцоо бүрдэх юм. Мөн хуралдаанаар 30 жил яриа төдий байсан зэсийн баяжмал хайлуулах, цэвэршүүлэх үйлдвэрийн хөрөнгө оруулагчийг сонгон шалгаруулах эрхийг Аж үйлдвэрийн яаманд олгох асуудлыг хэлэлцүүлэх аж. Зэс түшиглэсэн экспорттой Монгол Улсын хувьд баяжмал хайлуулах цэвэршүүлэх үйлдвэртэй байгуулснаар Эрдэнэт, Оюутолгойн зэсийг алтнаас нь ялгаж, авах бололцоо бүрдэнэ гэж үздэг. Тус үйддвэрийг Хэнтий аймгийн Бор-Өндөр суманд байгуулах тов гарсан бөгөөд зэсийн баяжмал цэвэршүүлэх үйлдвэр ашиглалтад орсноор жилд 23 хувийн ашиг өгнө гэсэн урьдчилсан тооцоог Аж үйлдвэрийн яамнаас гаргасан. Төслийн ТЭЗҮ-д оруулалтын зардлаа есөн жилийн хугацаанд нөхөх боломжтой хэмээн тусгажээ. Иймд хөрөнгө оруулагчийг шалгаруулах ажил эхлүүлэх л үлдээд байгаа юм.