Уругвай улсын Засгийн газар хар тамхины төрлийн ургамал болох марихуан тарьж иргэдийнхээ хэрэгцээг хангахаар болжээ. Тус улсын гурван сая хүн амын хэрэгцээнд жилдээ 27 тонн марихуан шаардлагатай бөгөөд үүнийг тарихад зориулж 100 га газар чөлөөлөхөөр болсон байна. Олсны ургамлаас гаргаж авдаг хар   тамхины хэрэглээг зөвшөөрөх хуулийн төслийг парламент баталбал тариалалтыг ирэх есдүгээр сард эхлүүлж, анхны ургацаа хагас жилийн дараа авахаа Засгийн газар мэдэгдээд байна. Марихуаны хэрэглээ, худалдааг чөлөөлснөөр гэмт хэргийн түвшнийг бууруулна хэмээн Уругвайн эрх баригчид үзэж байгаа аж.  Мөн мансууруулах бодисыг хар захаар худалдаалах нь тус улсын хүн амд хөнгөн төрлийн хар тамхины хэрэглээг зөвшөөрснөөс илүү хор уршиг учруулж байна хэмээжээ.  Тарьж авсан марихуаныг хувийн компаниуд Засгийн газрын хатуу хяналтын доор, зөвхөн бүртгэлтэй хар тамхичдад худалдаалах бөгөөд нэг хүнд сар тутам худалдах хэмжээг 30 граммаас дээшгүйгээр тогтоосон байна.  Гадаадын иргэдэд марихуаныг худалдахгүй гэнэ. Түүнчлэн  тариалалтад төрийн албан хаагчдыг дайчлах уу, эсвэл хувийн компаниудад хариуцуулах уу гэдгийг одоогоор шийдээгүй байгаа аж.