УИХ-ын дарга, Ардчилсан намын дарга З.Энхболд өнөөдөр /2016.06.14/ Баянгол дүүргийн 18 дугаар хорооны иргэд, сонгогчидтой уулзалт хийв. Тэрээр эхлээд 2012-2016 онд Ардчилсан нам хийж бүтээсэн ажлаа тайлагнав. Дээрх хугацаанд эдийн засгийн бүтцийн шинэчлэл, мөнгөний бодлогын шинэчлэл, засгийн газрын санхүүжилтийн талаар мэдээлэл өглөө. Мөн амаргүй дөрвөн жилд амжуулсан 10 ажлаа тайлбарлав. Ардчилсан намын хийж, бүтээж чадсан дээрх 10 ажил нь нийгмийн давхарга бүрт хүрсэн бөгөөд цаашид ч тасралтгүй үргэлжлэх бөгөөд иргэдэд үр өгөөжөө өгсөөр байх юм. Дээрх ажлуудын үр дүнгээр өнөөдөр барилгын салбарт 96 мянга, аж үйлдвэрийн салбарт 6123 ажлын байр нэмэгджээ.

1921-1996 он хүртэлх 75 жилийн хугацаанд 100 мянган өрх орон сууцанд орж байсан бол Ардчилсан нам 2012 оноос сонгуулиар олуулаа болсноор нэг жилдээ 25 мянган өрх орон сууцанд орсон байна. Цаашид ипотекийн орон сууцнаас гадна төрийн түрээсийн орон сууцанд 929 байрыг шилжүүлсэн бөгөөд энэ хөтөлбөр нь энэ оны 3 сараас эхлэн хэрэгжиж эхлээд байгаа юм.

Ардчилсан нам барилгын салбарыг дэмжих цогц бодлогыг ийнхүү хэрэгжүүлсний зэрэгцээ өнгөрсөн 3 жилийн хугацаанд нийтдээ 2720 км зам тавьсан. Энэ ондоо 1284 км замыг нэмж тавьснаар энэ 4 жилийн хугацаанд 4000 гаруй км замыг ашиглалтад оруулж байгаа юм. гэтэл 1921-2012 он хүртэлх 91 жилд нийт 2964 км зам тавьж байжээ. Энэ бүхнээс харахад Ардчилсан намын хийсэн бүтээсэн бүхэн тоо, статистикаар харагдаж байгааг УИХ-ын дарга, Ардчилсан намын дарга танилцуулав.

З.Энхболд: Улаанбаатар хотод 24 уулзварыг шинэчилсэн нь иргэд шатахуунаас жил бүр 25.3 тэрбум төгрөг хэмнэх боломж олгосон

Мөн өнгөрсөн хугацаанд Улаанбаатар хотод 24 уулзварыг шинэчлэн барьсан, ингэснээр иргэд зөвхөн шатахуунаас жил бүр 25.3 тэрбум төгрөг хэмнэж байгаа юм. Мөн УИХ-ын дарга хэдийгээр энэ хугацаанд дэлхийн зах зээл дээр түүхий эдийн үнэ унасан жилүүд байсан ч 127 цэцэрлэг, 79 сургууль, 33 спорт заал ашиглалтад оруулж чаджээ.

Мөн тус хугацаанд орон нутагт эрх мэдлийг олгосны зэрэгцээ 2012 онтой харьцуулахад орон нутгийн төсөв 2.5 дахин нэмэгдсэний зэрэгцээ ахмад настнуудыг дэмжин тэтгэврийг 2013, 2015, 2016 онд нэрлэсэн үнээр нэмж чаджээ.

Ардчилсан намын энэ сонгуулийн мөрийн хөтөлбөр бол 2012 онд дэвшүүлсэн мөрийн хөтөлбөрийн шууд үргэлжлэл болж байгааг онцлов.

С.Эрдэнэ: 52 хууль санаачилснаас 31 нь хууль болон батлагдсан

УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ уулзалтын үеэр иргэдэд хүн амын хөгжлийн талаар хийсэн ажлаа тайлагналаа. Зөв оновчтой бодлогоо тодорхойлж, эдгээр бодлогоо хэрэгжүүлэх зорилттой шийдлийн баг Баянгол дүүрэгт нэр дэвшиж байна. Энэ багийн хүчтэй төлөөлөл нь УИХ-ын дарга, Ардчилсан намын дарга З.Энхболд юм. Өнгөрсөн жилүүдэд УИХ иргэд рүү чиглэсэн, хүн амынхаа хөгжлийг дэмжсэн бас хамгаалсан олон хуулийг баталсан. Би өнгөрсөн хугацаанд нийт 52 хуулийг санаачилж, үүнээс 31 хууль нь батлагдсан байна. Энэ нь Баянгол дүүргээсээ сонгогдсон та бүхний дуу хоолойг тусгаж, хуулиа баталж ирсний баталгаа гэлээ.  Мөн УИХ-ын гишүүн С.Эрдэнэ, хамтын тэтгэвэрийн тухай хуулийн талаар мэдээлэл өгөв. Энэ хууль бол ахмад настны нийгмийн хамгааллын тухай хууль болж чадсан. Мөн иргэд та бүхэнд асар чухал эрүүл мэндийн даатгалын тухай хуулийг батлуулсан. Энэ хууль нь тийм амар хялбар замыг туулж батлагдаагүй. 4 жилийн турш боловсруулан, их хүч хөдөлмөр орсон хууль юм. Энэ хуулиар та бүхэн 81 төрлийн эмчилгээ, үйлчилгээний зардлаа өөрөө түрийвчнээсээ гаргахгүйгээр эрүүл мэндийн даатгалын сангаас төлүүлэхээр болсон. Хуулийн дагуу иргэдэд эрүүл мэндийн цахим карт олгогдоно. Энэхүү картанд Монгол Улсын иргэн хүн төрсөн цагаас нь тэдний эрүүл мэндийн холбогдолтой мэдээлэл нь хадгалагдах  хэмээн хуулийн талаар мэдээлэл өгөв.

Уулзалтын төгсгөлд иргэдийн сонирхсон асуултад хариулт өгөв. Баянгол дүүргийн 18 дугаар хорооны иргэн н.Баатархүү хэлэхдээ, Өнгөрсөн 4 жилийн дөрвөн жилд хийж, бүтээсэн ажилд нь талархал илэрхийлэхээр уулзалтад зорин ирсэн. Миний гэр бүлийн гишүүд л гэхэд ипотекийн зээлээр орон сууцтай болсон. Ер нь Баянгол дүүрэгт эмнэлэг, сургууль, зам, гудамж талбай, гэрэлтүүлэг  гээд та бүхний хийсэн ажил иргэд бидний нүдэн дээр илхэн байдаг. Иймээс ч би 18 дугаар хорооны иргэн хүний хувьд шийдлийн багаа тууштай дэмжинэ. Би шийдлийн багт итгэдэг гэлээ.Энэхүү уулзалтад НИТХ-ын 6 дугаар тойрогт нэр дэвшигч В.Ганбаатар нийслэлдээ хийж хэрэгжүүлэх 5 + төлөвлөгөөгөө дэлгэрэнгүй танилцууллаа. 

Эх сурвалж:Demparty.mn