УИХ-ын дарга, Ардчилсан намын дарга З.Энхболд өнөөдөр /2016.06.14/ нийслэлийн Баянгол дүүргийн 19 дүгээр хорооны иргэдтэй уулзалт хийлээ. УИХ-ын дарга З.Энхболд өчигдөр Баянгол дүүргийн 11, 15, 16, 23 дугаар хорооны иргэдтэй уулзалт хийсэн бол өнөөдөр тус дүүргийн 17,18 дугаар хорооны иргэдтэй тус тус уулзалт хийсэн юм. Ийнхүү уулзалтаа үргэлжлүүлэн 19 дүгээр хорооны иргэдэд ажлаа тайлагнаж, иргэдтэй санал солилцон, Ардчилсан намаас дэвшүүлсэн мөрийн хөтөлбөрөө танилцууллаа.

З.Энхболд: Баянгол дүүргийн эмнэлэг 1990 онд хоёр давхар чулуун байшин байсан бол одоо 9 давхар олон улсын жишигт нийцсэн эмнэлэг болжээ

УИХ-ын дарга уулзалтын эхэнд хэлэхдээ, Би өнөөдөр өглөө 250 ортой Баянгол дүүргийн Нэгдсэн эмнэлэгийн үйл ажиллагаатай танилцсан. Би Баянгол дүүрэгт амьдардаг байсан иргэний хувьд 1990 онд хүүхэддээ вакцин хийлгэхээр 2 давхар чулуун барилга бүхий эмнэлэгт очиж байсан. Харин өнөөдөр Баянгол дүүргийн Нэгдсэн эмнэлэгийн үйл ажиллагаатай танилцах үеэрээ тухайн үеийн эмнэлэгийн нөхцөл байдал эрс өөрчлөгдсөн, иргэд эх орондоо бид эмчлүүлэх боломж Баянгол дүүрэгт бүрдсэнийг харлаа. Баянгол дүүрэг бол нийслэлд баригдсан 7 эмнэлэгийн 2 нь  баригдсан дүүрэг мөн. Удахгүй энэ дүүрэгт ахмадын эмнэлэг сувилал, мөн 150 ортой хүүхдийн эмнэлэг тус тус ашиглалтад орно. Өмнө нь дүүрэгт юу хийдэг байсныг Сангийн яаман дээр хийдэг байсан бол одоо иргэд олон нийтийн оролцоотойгоор “Орон нутгийн хөгжлийн сан” байгуулснаар иргэн бүр амьдарч буй орчноо хөгжүүлэх хамтдаа шийдвэр гаргах эрхзүйн орчин бүрдсэн  УИХ-ын гишүүдийн тойрогт мөнгө олгодог байсныг болиулсан гэлээ.

Эрүүл мэндийн салбараас гадна боловсролын салбарын хөгжлийн талаарх мэдээлэл өгөв. Боловсролын салбарын хувьд өнгөрсөн хугацаанд “Зөв Монгол хүүхэд”, “Цөм хөтөлбөр”, “Авьяас”, “Ном”, “Багшийн хөгжил” хөтөлбөрүүдийг үргэлжлүүлнэ. Мөн ЕБС-д Steam буюу “Science technology, engineering, Arts and mathematics” лабораторийг нэвтрүүлэхээс гадна Японд 1000 инженер бэлтгэнэ. 1000 гэдэг тоо бол 1960-1990 онд хуучнаар СССР улсад бэлтгэсэн нийт монгол  мэргэжилтнүүдийн тоо юм. Иймээс бид цаашид Япон Улсын өндөр технологи, ноу-хауг суралцахын тулд тус улсад 1000 инженерийг сургахаар, бэлтгэхээр болсон  гэв.

“MADE IN MONGOLIA” нарны зайг Япон Улс руу экспортолж буй нь сайн экспорт

УИХ-ын дарга Баянгол дүүргийн 19 дүгээр хорооны иргэдтэй уулзалт хийх үеэрээ онцлон хэлж байсан асуудал бол “Сайн экспорт”-ын тухай байлаа. Тэрээр хэлэхдээ манай улсын залуус хийж бүтээж чадаж байна. Монгол гурван залуу “MADE IN MONGOLIA” нарны зайг үйлдвэрлээд Япон Улсад экспортолж байна. Энэ бол сайн экспортын жишээ. Монголчуудаа гадаадаас бараа, бүтээгдэхүүн худалдан авчирч зардагаа больцгооё, харин эх орондоо үйлдвэрлэж гадаад зах зээл рүү экспортлодог болцгооё. Бид түүхий нүүрс биш, бэлэн бүтээгдэхүүн экспортлодог болно. Энэ бол мөрөөдөл биш. Бид чадаж байгаагийн нэг жишээ бол Япон руу нарны зай экспортлож буй хэрэг юм.

Мөн Баянгол дүүргийн иргэний татварын хөнгөлөлтийн талаар асуусан асуултад УИХ-ын дарга, Ардчилсан намын дарга З.Энхболд хариулахдаа, УИХ-д угсрах үйлдвэрүүдийн татварын хөнгөлөлтийн тухай хуулийн төсөл УИХ-ын ээлжит чуулган завсарлахын өмнөхөн өргөн баригдсан. Автобус бол олон эд ангиас бүрддэг. Иймээс эдгээр автобусны угсарагддаг эд ангийг татвараас чөлөөлөх юм бол бид эх орондоо угсарч хийх боломж бүрдэнэ. Энэхүү саналыг Аж үйлдвэрийн яам дэмжин ажиллаж байна. Бид цаашид гадаадаас автобус худалдан авах шаардлагагүй болно хэмээн хариулав.

Иргэн Л.Халиунбаатар: Та бүхэн 20 жилийн өмнө иргэдэд орон сууцыг хувьчилсан, дахин 20 жилийн дараа залуусыг ипотекийн зээлээр орон сууцтай болголоо

Баянгол дүүргийн иргэн Л.Халиунбаатар 70 дугаар тойрогт нэр дэвшсэн нэр дэвшигчдэд хандан, дэлхийн зах зээл дээр түүхий эдийн үнэ маш их унасан байсан цаг үед Та бүхэн төрийг жолоодож, бүтээн байгуулалтыг эхлүүлсэнд талархал илэрхийлье гэлээ. Өнөөдрөөс 20 жилийн өмнө та бүхэн орон сууцыг иргэдэд хувьчилж байжээ, харин дахин 20 жилийн дараа залуу гэр бүлийг ипотекийн зээлээр орон сууцтай болголоо. Өрх гэрээ цогцлоож, үр хүүхэдтэй болсон залуус бидэнд үр хүүхдээ эмчлүүлэх Баянгол дүүргийн Нэгдсэн эмнэлэг, хүүхдийн эмнэлэг гээд олон эмнэлэг иргэдийн эрүүл мэндийн төлөө ажиллаж байгаа нь та бүхний хийсэн бүтээсэн зүйл. Цаашид Баянгол дүүргийн эхчүүдийн төрөх эмнэлэгийн асуудалд анхаарч, Эх нялхсын эрүүл мэндийн төвд төрүүлдэг байх асуудлыг шийдэж өгөөч хэмээн хүсэлт тавилаа. УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ хариулахдаа, таны хэлсэн саналыг бид ажил хэрэг болгохоор ажиллаж байгаа. Удахгүй 80 ортой ахмадын сувилал эмнэлэг, 150 ортой хүүхдийн эмнэлэг ашиглалтад орно гэлээ. УИХ-ын С. Одонтуяа энэ талаар хариулахдаа, Баянгол дүүргийн эмэгтэйчүүд, эхчүүд дүүрэгтээ төрөх тасагтай болвол эхчүүдэд их амар хялбар болно. Иймээс бид шинээр ашиглалтад орох 150 ортой хүүхдийн эмнэлэгтээ төрөх тасгийг нээхээр судалгаа хийж байгаа. Мөн Баянгол дүүргийн нутаг дэвсгэрт байрлах Цусны төв нэгдсэн төвд Австрийн засгийн газрын тусламжаар, тус улсын хамгийн сүүлийн үеийн технологийг суурилуулан оношилгоо хийж байгаа. Хүүхэд, жирэмсэн эмэгтэйчүүдэд үнэ төлбөргүй нарийн оношилгоо хийж байгааг мөн дуулгая гэлээ.

Баянгол дүүргийн иргэд мөн, нэр дэвшигчдээс 1072 хувьцааны талаар асуув. 1072 хувьцааны тодорхой хувийг зарж байгаа нь сонгуулийн үеэр хэлж буй амлалт уу, эсвэл үнэхээр биелэлээ олсон ажил мөн эсэхийг асуулаа. 

УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ хариулахдаа, Иргэн өөрөө хүсвэл энэ хувьцааны 30 хүртэлх хувийг худалдан авах эрхийг Засгийн газар шийдвэр гарган иргэддээ олгосон. Өөрөөр хэлбэл, иргэддээ нээлттэй шийдвэрийг гаргасан. Та хүсвэл зарж болно, зарахгүй ч байж болно. Таны зарсан хувьцаа Засгийн газарт хадгалагдана. Хэрвээ өнөөдөр 900 орчим төгрөг байгаа хувьцааны ханш өсч 2 сая төгрөгт хүрвэл та зарсан үнээрээ хувьцаагаа эргүүлэн худалдан авч болно. Энэ хувьцааг худалдах асуудал бол ямар ч хугацаа заагаагүй асуудал учраас та сонгуулийн дараа ч хувьцаагаа зарж, эргүүлэн худалдан авч болно. Иймээс энэ нь сонгуультай ямар ч холбоогүй гэдгийг Засгийн газрын гишүүний хувьд хариуцлагатайгаар мэдэгдье гэсэн юм. Мөн энэхүү уулзалтын үеэр УИХ-ын дарга, Ардчилсан намын дарга З.Энхболд, УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ, УИХ-ын гишүүн С.Одонтуяа, НИТХ-ийн сонгуулийн 6-р тойрогт Ардчилсан намаас нэр дэвшигч В.Ганбаатар нар иргэд, сонгогчдод Ардчилсан нам өнгөрсөн 4 жил хийж бүтээсэн бүтээн байгуулалтын ажлууд, ирэх 4 жилд үргэлжлүүлэн хийх ажлууд, мөрийн хөтөлбөр, зорилтуудаа танилцуулсан юм.

Эх сурвалж: demparty.mn