Уулзалтын эхэнд УИХ-ын дарга хэлсэн үгэндээ, УИХ-ын гишүүн М.Зоригт бол маш хурдтай бүтээлч хүн. Тэрээр өнгөрсөн хугацаанд Сүхбаатар аймгийн хөгжлийн автор болсон гишүүн. М.Зоригт гишүүн Зам тээврийн яамыг удирддаг бөгөөд түүний хийж бүтээж байгаа ажлууд иргэд олон нийтийн нүдэн дээр илт тод, нээлттэй байдаг. Харин 15 дугаар тойрогт нэр дэвшигч Б.Мөнхцэцэг нь Хөдөлмөр халамж, үйлчилгээний газрын дарга байхдаа ахмад настнуудын халамжийн асуудал,  Сургалтын төрийн санд ажиллаж байхдаа боловсролын чиглэлээр олон чухал ажлуудыг хийж чадсан эмэгтэй нэр дэвшигч юм гэлээ. Мөн тэрээр Ардчилсан нам өнгөрсөн 4 жилийн хугацаанд ямар ямар ажлыг амжуулав гэдэг асуудлын хүрээнд хийж хэрэгжүүлсэн ажлаа дүгнэн тайлагнав.

З.Энхболд: Дорнод аймагт өнгөрсөн 3 жилд нийт 1246 орон сууц шинээр баригдсан

Ардчилсан нам хэдийгээр 2012 онд дэлхийн зах зээл дээр уул уурхайн гаралтай түүхий эдийн үнэ унасан цаг үед засгийн эрхийг авсан ч хямралыг боломж болгон ашиглаж дараах ажлуудыг хийж чадсан гэв. Ардчилсан намын хийж бүтээсэн ажлуудаас жишээ татахад, уул уурхай гэдэг ганц тулгууртай эдийн засгаа  олон тулгууртай болгох эхлэлийг тавьсан. Орон сууцны 8%, 5%-ийн ипотекийн зээлийг амжилттай хэрэгжүүлж эхэлснээр барилгын салбарт ажиллах хүчний тоо 96 мянгад хүрсэн. Уул уурхай зогсонги байдалд орсны дараа тухайн хөдөлмөрийн зах зээлд буй иргэдийг хаашаа шингээх вэ гэдэг асуудал гарч ирсэн. Ипотекийн зээлийн ачаар эдгээр хүмүүс барилгын салбарт ажиллаж байна. 1921-1996 он хүртэлх 75 жилийн хугацаанд нийт 100 мянган өрх орон сууцтай болж байсан бол Ардчилсан нам нэг жилд 25 мянган өрхийг орон сууцанд оруулж чадсан байна. Ардын намаас ялгаатай нь Ардчилсан нам Ипотек байх ёстой, үргэлжлэх ёстой гэж үздэг, харин Ардын намын гишүүн Ипотекийн зээлийг “Нүгэл” гэж  хэлж байсан гэлээ. Аймаг бүрт 1000 айлын орон сууц хөтөлбөрийг биелүүлэх үүргийг 21 аймагт өгсөн. Дорнод аймаг бол аймаг бүрт 1000 айлын орон сууц хөтөлбөрийг давуулан биелүүлсэн буюу нийт 1246 орон сууц шинээр баригдсан байна. Ер нь ипотекийн зээлийн ачаар зөвхөн байранд орсон иргэд буй барилгын материал, барилга угсралтаас эхлээд барилгын мужаан, тавилгын үйлдвэр гээд олон хүнийг ажилтай, орлоготой байлгадаг гэв.

Мөн Ардчилсан нам, “Сайн малчин” хөтөлбөрийг хэрэгжүүлж, 10%-ийн малчны зээлийг олгож байгаа, “Сайн хашаа” хөтөлбөрийн хүрээнд 5%-ийн зээл, дэд бүтцийн хөгжил, ХАА-н үйлдвэрлэл, боловсруулах үйлдвэрлэлийг дэмжиж чадсан байна. Өөрөөр хэлбэл, өнгөрсөн 4 жилд нийт 1680 үйлдвэрийн төслийг дэмжиж, нийт 3405 км авто зам тавьж, 82 мянган өрхийг шинэ орон сууцтай болгож, 573 мянган хүн ажилласан жилээ нэмэгдүүлж чадсан нь өнгөрсөн 4 жилд хийгдсэн ажил юм. Түүнчлэн эрчим хүчний үйлдвэрлэлийг нэмсэн, орон нутагт эрх мэдлийг олгосон гэх мэт томоохон ажлуудын талаар танилцуулав.

15 аймгийг бага оврын агаарын хөлөгтэй болгож,160 гаруй сумдын тогтмол нислэгийг сэргээнэ

УИХ-ын дарга, Ардчилсан намын дарга З.Энхболд, Дорнод аймгийн иргэдэд зам тээврийн салбарт хийсэн болох хийж бүтээх ажлуудаа дэлгэрэнгүй танилцуулав. Тэрээр автозамын өнгөрсөн болон өнөөдрийн ялгааг фото зургаар олон нийтэд үзүүлэв. 1921-2012 он хүртэлх хугацаанд нийт 2964 км зам тавьсан бол, 2012-2015 он хүртэлх 3 жилд 2720 км зам тавьсан, 2016 онд үргэлжлүүлэн 1284 км зас тавихаар төлөвлөсөн.

Агаарын тээврийн зайлшгүй үйлчилгээний хөтөлбөр хэрэгжүүлж, 15 аймгийг бага оврын агаарын            хөлөгтэй         болгоно.         160      гаруй   сумдын           тогтмол нислэгийг сэргээхээр төлөвлөжээ. Үүний тулд 3 Land машины хэрэглэх хэмжээний түлшээр, асар их цаг хугацаа хэмнэн, зорчих боломжийг хангахын тулд энэхүү онгоцыг ашиглахаар төлөвлөж байгаагаа хэлэв.

Мөн Улаанбаатар төмөр замын нэвтрүүлэх чадварыг нэмэгдүүлэх зорилгоор Улаанбаатар хотын баруун урд талаар өнгөрөн гарах “Богдхан” төмөр замын төслийг хэрэгжүүлнэ. Төв Азийн бүс нутгийн тээврийн коридор 4С буюу Баруун-урт -Бичигт боомт чиглэлийн 277.2 км хатуу хучилттай авто замыг ашиглалтанд оруулна.Мөн Азийн авто замын сүлжээний АН3 коридор Алтанбулаг - Улаанбаатар - Замын-Үүд чиглэлийн 990 км хурдны авто замыг ашиглалтанд оруулна. Баян-Өлгий, Ховд, Увс, Завхан, Говь-Алтай, Дорнод аймгуудыг нийслэлтэй холбосон 1538,01 км хатуу хучилттай авто замыг барьж дуусгахаас гална бүх аймгуудад гудамж төсөл хэрэгжүүлэхээр төлөвлөснийг УИХ-ын дарга танилцуулав. Мөн ирэх 4 жилд Тавантолгой - Гашуунсухайт, Тавантолгой - Сайншанд - Хөөт - Чойбалсан, Хөөт - Бичигт,  Хөөт - Нөмрөг, Эрдэнэт – Овоотын чиглэлийн төмөр замын суурь бүтцийн бүтээн байгуулалтын санхүүжилтийг үе шаттай шийдвэрлэж, төмөр замын дотоодын сүлжээг өргөжүүлэхээр Ардчилсан намын мөрийн хөтөлбөрт тусгагдсаныг онцлов. Мөн Ардчилсан намын цаашид “Ахиулан хийх ажлууд”-аа танилцуулсан бөгөөд мөрийн хөтөлбөрийн эцсийн зорилго бол Хүн ард нь ажилтай, орлоготой, эдийн засаг нь тогтвортой, экспортлогч орон болох зорилт болохыг УИХ-ын дарга уулзалтын төгсгөлд онцлон тэмдэглэлээ.

Р.Амаржаргал: М.Зоригт гишүүн бол хийнэ гэснээ хийдэг, хийсэн бүтээснээ харуулдаг тийм л хүн

УИХ-ын дарга, Ардчилсан намын дарга З.Энхболд танилцуулга хийсний дараа УИХ-ын гишүүн Р.Амаржаргал үг хэлэв. Тэрээр хэлэхдээ, УИХ-ын сонгуулиас гадна, Аймгийн иргэдийн төлөөлөгчдийн хурлын сонгуульд нэр дэвшигчид энд цугласан байна. Үнэхээр ирэх жилүүдэд аймгийн хөгжилд үнэтэй хувь нэмэр оруулах, шижгэнэсэн сайхан залуус нэр дэвшиж байна. Дорнод аймгийн 15 дугаар тойрогт нэр дэвшиж буй Б.Мөнхцэцэг нь нийгмийн халамж, боловсролын чиглэлээр олон ажлуудыг хийсэн няхуур, нямбай, хөдөлмөрч шинж чанартай хүн. Тэрээр та бүхний итгэлийг дааж чадна. 14 дүгээр тойрогт нэр дэвшигч М.Зоригтыг хүн бүхэн мэднэ. Би түүний талаар товчхон хэлэхэд, М.Зоригт хийнэ гэснээ хийдэг л хүн. Өнөөдөр эх орондоо хайртай гэж хашгирдаг хүн өдөр өдрөөр нэмэгдэж, зүйрлэн хэлэхэд геометрийн прогрессоор өсч байна. Харин УИХ-ын гишүүн М.Зоригт  бол хийнэ гэснээ хийдэг, хийсэн бүхнээ харуулдаг, худлаа амладаггүй тийм л хүн. Та бүхэн ийм хүнийг УИХ-д орон нутгаа төлөөлөн илгээхэд орон нутгаа босгож, хөгжүүлж чадна. Манай намын мөрийн хөтөлбөр болох мөлжүүртэй, хийх юмтай мөрийн хөтөлбөр мөн. Бид өнгөрсөн 4 жилд мөрийн хөтөлбөрийнхөө хэрэгжилтийг бүрэн хангаж ирсэн, цаашид ч үргэлжлүүлэн хийнэ, бүтээнэ гэлээ.

Асашёрюү Дагвадорж: Наран ургах Дорнодын талаас

Ардчиллын хөх униар цэнхэртэх болтугай!

Монгол Улсын Хөдөлмөрийн баатар, Гавьяат тамирчин, Асашёрюү Дагвадорж хэлэхдээ, Монголчууд орлоготой, ашигтай, хөрөнгө мөнгөтэй байх ёстой. Бид хойд, урд хөршөөс гадна цаашаа гуравдахь зах зээл рүү гарах ёстой байна. Яагаад бид эх орондоо шинэ ажлын байр бий болгож, шинэ бүтээгдэхүүн үйлдвэрлээд гадаад зах зээл  рүү гаргаж болохгүй гэж. Монголчуудаа бид өнөөдөр хоосон амлаад хэрэггүй, харин хийж бүтээж харуулах цаг болсон. Түрүүн УИХ-ын дарга жишээ татсан. 1960-90 оны хооронд ЗХУ-д мэргэжилтнүүдийг бэлтгэж байсан гэж.  Харин цаашид бид Япон Улсад мянга мянган залуусыг дадлагажуулагчдыг илгээж, японы ард түмний хөдөлмөрч занг суралцах, японы соёл, техник, дэвшлийг суралцах нөхцөл бүрдээд байна. Тэд гурван жилийн дараа эх орондоо эргэж ирээд мэргэшсэн салбартаа ажиллаж эх орноо хөгжүүлэхэд хувь нэмрээ оруулах боловсон хүчин болж чадна. Наран ургах Дорнодын талаас Ардчиллын хөх униар цэнхэртэх болтугай хэмээн үгээ өндөрлөлөө.

Уулзалтын төсгөлд тус аймгаас нэр дэвшигч М.Зоригт, Б.Мөнхцэцэг нар сонгогчиддо хандан үг хэлсэн юм. УИХ-ын гишүүн М.Зоригт, Бид ялнаа. Бид хоёргүй сэтгэлээр нутаг орныхоо төлөө ажиллана. Нэр дэвшигч М.Зоригт, Б.Мөнхцэцэг бид хоёрт энд нүүрсний уурхай ч байхгүй, гурилын үйлдвэр ч байхгүй. Бид хоёргүй сэтгэлээр зөвхөн нутаг орныхоо төлөө ажиллана. Бидний баг Дорнод нутгаа дахин сэргээж, дахин босгож, мандуулж чадна гэлээ. Нэр дэвшигч Б.Мөнхцэцэг хэлэхдээ, Дорнодын талд би өссөн. УИХ-д эмэгтэйчүүдийн дуу хоолой чухал. Өнгөрсөн хугацаанд манай эмэгтэйчүүд гэр бүлийн чиглэлээр, хүүхдийн эрхийн болон нийгмийн хамгааллын чиглэлээр олон чухал хуулиудыг баталсан. Дорнодын ард түмэндээ зөв сонголт хийж, Ардчилсан намын “Монгол хүн 2020”  мөрийн хөтөлбөрийг үргэлжүүлэх боломжийг олгоно гэдэгт итгэж байгаагаа илэрхийллээ. Ийнхүү наран ургах Дорнод аймагт хийсэн уулзалтаа УИХ-ын дарга, Ардчилсан намын дарга З.Энхболд өнөөдөр /2016.06.15/ 17.00 цагт өндөрүүлэв. Тэрээр  үргэлжлүүлэн Сүхбаатар аймгийн иргэд, сонгогчидтой өнөөдөр уулзалт хийнэ хэмээн Ардчилсан намын Сонгуулийн төв штабаас мэдээлэв.