Нийслэлийн Засаг дарга Э.Бат-Үүл Улаанбаатар хотын газрыг хууль бусаар зарж, борлуулж байсан асуудлаар мэдээлэл хийлээ. Тэрбээр энэ үеэр “Манай ард түмний дунд газрын мафи гэж нэрлэгддэг болсон бүлэглэлийн үйл ажиллагаанаас болж нийслэл хотод хэр их хэмжээний хохирол учирсан талаар бид зарим нэг баримтыг дэлгэх нь зүйтэй гэж үзсэний үндсэн дээрээс энэхүү хэвлэлийн хурлыг хийж байна” гэлээ.

Тэрбээр үргэлжлүүлэн хэлэхдээ “Хэвлэлийн бага хурал зарлах хоёр шалтгаан байсан. Нэгдүгээрт, сүүлийн үед нэр дэвшигчдийг ёс бусаар гүжирдэх, шантаажлах үйл ажиллагаа газар авч байна. Үүнтэй холбогдуулан АН-ын нэр дэвшигчид тэр дотроо НИТХ-д нэр дэвшээд байгаа өөрийн багийн 45 төлөөлөгчдөдөө тэднийг дэмжиж буй сонгогчдод маш их сонор сэрэмжтэй байхыг уриалж байна.  Хоёрдугаарт, манай баг, миний бие рүү газрын наймаа, авлигаар хөлжсөн бүлэглэлийн зүгээс маш их хүчтэй гүтгэлэг,  доромжлолыг эрчимжүүлж өрнүүлэх боллоо. Газрын мафи гэж нэрлэгддэг бүлэглэл этгээдийн зүгээс алдагдсан эрх, мэдлээ олж авахын тулд энэ сонгуулийг боломжийг алдахгүйн тулд улайран зүтгэж байна. Дэлхийн банкны 2015 оны Монгол Улсын газрын харилцаа гэсэн тайлан гарсан. Энэ тайланд Улаанбаатарт газрыг дэлхийн жишгээр үнэлж орлого оруулсан бол ямар орлого оруулах байсан бэ гэдгийг тогтоосон байгаа. Үлэмж их орлого алдагдсаныг энэ тайлангаар анх удаа гаргасан. 2012 он хүртэл 26.9 их наяд төгрөгийг орлого орж ирэх байсныг тогтоосон байна. Хэрвээ энэ мөнгөн орлого орж ирсэн бол 26,000 мянган сургууль, цэцэрлэгийг цогцолбор барьж болох байсан. 2030  он хүртлэх төлөвлөгөөгөөр бүтэн шинэ хотыг барих хөрөнгө орж ирээгүй байна. Энэ мөнгө хаашаа орсон нь ойлгомжтой. Ийм их хэмжээний баялгийг хяналтдаа байлгаж байсан тэр бүлэглэл өнөөдөр сонгуулийн боломжийг алдахыг хүсэхгүй байна. Газрын мафи бол үнэхээр хүчирхэг. Тийм болохоор тэд гүтгэх, харлуулах бүх л аргыг хэрэглэж байна.  Тэд сонгуулийг газрын төлөөх тулалдаан болгож хувиргаж байна. Тэр бүлэглэлтэй тэмцэж байгаа бидний тэмцэл амаргүй байна. Тийм учраас сонгогч түмнээсээ биднийг дэмжээч гэж хүсэх гэсэн юм. Тэд эдийн засгийн асар их хүч чадалтай байна. Маш их мөнгөтэй байна. Нийгмийн болон эдийн засгийн баялагийг хяналтандаа авчээ. Одоо үг, хэлгүй гүтгэж доромжилж байна. Сонгуулийг газрын төлөөх тулалдаан болгож байна. 2012 оны сонгуулийн үр дүнд бид олуулаа болж ажиллах боломж бүрдсэн. Ингээд хамгийн эхэнд газрын наймааг зогсоосон. Газрыг хэн, нэгэнд өгөхдөө ИТХ-ын хурлаар зөвшөөрсөн тохиолдолд олгодог болсон. Анх удаа газар олгох журмыг гаргасан. Хэрвээ газрыг хууль бусаар олгосон байвал Засаг дарга огцрох хүртэл арга хэмжээг авахаар уг журамд тусгасан байгаа. Өмнө нь хууль бусаар олгогдсон олон газрын захирамжийг бид хүчингүй болгосон. Гэхдээ их олон маргаан шүүх дээр унаад байсан. Миний цуцалсан захирамжууд шүүх дээр унаад байхаар нь “Тохиролцъё, зөвшилцье гээд дуудлага худалдааныхаа үнийг өг” гэсэн. Тэгээд дуудлага худалдаагаар өрсөлдүүлж газар борлуулахад анхны үнээсээ хэд дахин илүү үнээр зарагдаж байгаа. Засгийн газрын ордны хажуу талын газар л гэхэд хэдэн тэрбум төгрөгт хүрснийг та бүхэн мэдэж байгаа” гэлээ.

Хууль бусаар олгосон гэх газарт Төв шуудангийн урдах хөндлөн явган зорчигчийн зам, Төв талбайн урд хэсэг буюу одоо машины зогсоол болсон хэсэг, орос Гуравдугаар сургууль, Зургадугаар сургуулийн хөлбөмбөгийн талбай, Нэгдсэн Гуравдугаар эмнэлгийн хашаа, зогсоол, Хүүхдийн ордны баруун хойд буланд явган хүний зам, ногоон байгууламж зэрэг орсон байна.

Хотын дарга Э.Бат-Үүл энэ үеэр “26.9 их наяд гэдэг 2600 сургууль, цэцэрлэгийн цогцолбор барьж болох мөнгө. Үгүй юм аа гэхэд гэр хорооллын дахин төлөвлөлт, барилгажилтын ажлыг бүрэн дуусгаж болно” гэсэн юм.

Улмаар хотын одоогийн удирдлага ажлаа авснаар нэгэнт хууль бусаар олгогдоод барилга, байшин барьсан газрыг тэр чигт нь үлдээжээ. Харин барилга бариагүй, дамлан зарахаар нөөцөлсөн гэх газруудаас дуудлага худалдааны анхны үнийг төлбөрийн хугацаат график гарган нэхэмжилж байгаа гэсэн юм. 2012-2016 оны хооронд 68 тэрбум 493 сая төгрөгийг дуудлага худалдааны анхны үнэ гэж тооцон төсөвт төвлөрүүлсэн гэлээ. Дараагийн ээлжид 2016-2019 онд 10 тэрбум 506 сая төгрөгийг төсөвт төвлөрүүлэхээр тооцоолжээ.

Т.Энхэлээ