Зарим нэг зүйлийг эс тооцвол энэ удаагийн сонгууль өнөөдрийг хүртэл харьцангуй нам, гүм байна. Сонгуулийн шинэ хуулийн ачаар нэр дэвшигчид бие, биенээ гүтгэх, бэлэг тараах гэх мэт зүйлүүд байхгүй болжээ. Гэхдээ сайны хажуугаар саар гэгчээр хар, бараан үйл явдлууд ч мөн мэр, сэр гарсаар байна. Тодруулбал, сурталчилгаа эхлээд долоо ч хоноогүй байхад нэр дэвшигчдийн сурталчилгааны самбарыг эвдэж, зургийг нь сүйтгэсэн балмад үйлдлийг гаргалаа. Мөн зарим нэр дэвшигчид нэгийнхээ ноцтой бичлэгүүдийг олон нийтэд дэлгэж орчлонгоор онигоо болцгоож явна. Бас нэгэн харамсалтай үйл явдал болсон нь УИХ-ын сонгуулийн 74 дүгээр тойрог буюу Сонгинохайран дүүрэгт нэр дэвшигч Д.Тэрбишдагвын сонгуулийн сурталчилгааны үеэр 60 орчим насны эмэгтэй нас барсан үйл явдал байв.

Талийгаач эмэгтэйг ухаан алдсаны дараа түргэн, тусламжийнхан ирээд буй нь

Уг хэрэг өнгөрсөн бямба гаригт буюу сонгуулийн сурталчилгаа орон даяар эхэлсэн эхний өдөр гарч олон нийтийг цочирдуулсан юм. Уг хэрэг явдал нэр дэвшигчид ч хүндээр туссан нь ойлгомжтой. УИХ-ын гишүүн Д.Тэрбишдагва эл хэрэг гарсанд харамсаж талийгаачийн ар гэрийнхэнд эмгэнэл илэрхийлсэн билээ. Нөгөөтэйгүүр дахин ийм харамсалтай хэрэг гарахаас болгоомжлон нэр дэвшигчдийн штаб өндөр зохион байгуулалттай ажиллах хэрэгтэйг уг үйл явдал санууллаа.

Нэр дэвшигч, УИХ-ын гишүүн Д.Тэрбишдагва сонгуулийн сурталчилгааны ажлынхаа хүрээнд тус дүүрэг дэхь 24-р хорооны “Өлзийт хайрхан” дэлгүүрийн гадна талбайд иргэдтэй уулзаж байх үеэр энэ хэрэг явдал гарсан байдаг. Талийгаач эмэгтэй нэр дэвшигч Д.Тэрбишдагвад зориулсан үгээ гүйцээж амжилгүй "Н.Энхбаяраас..." гэсээр ухаан улдаж улмаар амьсгал хураасан гэж хэвлэлүүд онцолж байгаа юм. Түүний бие гэнэт муудаж, эмнэлгийн яаралтай тусламж ирэх үед нас барсан байсан гэдэг. Эх сурвалжийн мэдээлж буйгаар талийгаач эмэгтэй МАХН-ын гишүүн хүн байжээ. Талийгаач эмэгтэй УИХ-ын гишүүн Д.Тэрбишдагвыг 2012 оны сонгуулийн өмнө МАН-аас гарч МАХН-д орсон. Харин энэ жилийн сонгуулийн өмнө дөрвөн жилийн өмнөх үйлдлээ дахин давтаж МАХН-аас гарч МАН-д орсоныг нь л шүүмжилсэн байх. Д.Тэрбишдагвын нам сэлгэсэн үйлдэл нь айлын авгайтай хоноглоод авааль эхнэр дээрээ ичингүйрэн очиж байгаа завхуул эр шиг харагдсан нь үнэн. Илүү их боломж, илүү их олзыг харж хоёр намын хооронд гүйж байна хэмээн намын нөхөд нь түүнийг шүүмжилдэг. Тэдний нэг нь нас барсан харамсалтай хэрэг гарлаа. Хоёр намын удирдлагуудын хувьд гуйгаад ирж байхад нэр хүнд, жудгаа бодоод элсүүлэхээс өөр аргагүй.

Нэр дэвшигч, сонгогчдын хэн нь ч уг үйл явдлыг хүсээгүй нь мэдээж.  Гэхдээ энэхүү үйл явдал нь Монголын улс төрчдийг ноён нуруутай, үнэт зүйлтэй, өөрийн гэсэн байр, суурьтай байхыг давхар сануулж, сургамж боллоо.

Дөрвөн жилд ганц удаа төрд ажиллах төлөөллөө сонгох чухал үйл явдлын үеэр хар, бараан хэрэг аль болох гарахгүй байгаасай. Нэр дэвшигчид хуулийн дагуу өрсөлдөхөөс гадна анхаарал, болгоомжтой байх ёстой энэхүү үйл явдал санууллаа.

24tsag.mn