УИХ, ИТХ-ын сонгуулийн саналын хуудсыг хэвлэх ажил 50 хувьтай явж байгааг Сонгуулийн Ерөнхий хорооноос мэдэгдсэн. Одоогийн байдлаар 14 аймаг хоёр дүүргийн саналын хуудсыг хэвлэж дууссан байна. Энэ сарын 23 гэхэд саналын хуудсыг хэвлэж дуусгахаар төлөвлөжээ. Эхний ээлжид алслагдсан аймгууд болох Ховд, Баян-Өлгий, Увс, Завханы саналын хуудсыг онгоцоор хүргүүлсэн байна. Саналын хуудсыг “Мөнхийн үсэг групп”  компани хэвлэж байгаа юм. СЕХ-ноос тус компанид 1190 төрлийн саналын хуудас хэвлүүлэх захиалга өгчээ. Нийт хоёр сая орчим саналын хуудас хэвлэх ажиллагааг цагдаа, тагнуулын асуудал эрхэлсэн байгууллагынхан хянаж байгаа юм. СЕХ-ноос баталсан загвар, захиалсан тоо, чанар,  шаардлагын дагуу хэвлэсэн эсэхэд Ажлын хэсэг хяналт тавих үүрэгтэй. Харин саналын хуудасны эх бэлтгэл, хэвлэх, боож, баглах, хүлээлцэх явцад хэвлэх үйлдвэрийн ажилчидаас гадна нам, эвсэл, төрийн бус байгууллагын ажиглагчид ажиллаж байна. СЕХ-ны баталсан стандартаар сонгогчид саналын хуудасны хоёр талыг бөглөх юм. Саналын хуудасны нэг тал нь УИХ-ын ээлжит нөгөө талд нэр дэвшигчдийн жагсаалтыг хэвлэжээ. Саналын хуудсыг санал авах өдрөөс 3-аас доошгүй хоногийн өмнө буюу зургадугаар сарын 26-наас өмнө санал авах байранд хүргүүлсэн байх учиртай юм.