УИХ дахь Монгол Ардын Намын бүлгийн гишүүд тэтгэврийн зээлийн хүүг бууруулах УИХ-ын тогтоолын төслийг боловсруулж одоогоос нэг жилийн өмнө өргөн барьсан юм. Арилжааны банкинд бага хүүтэй байршиж байгаа Нийгмийн даатгалын сангийн мөнгөн хөрөнгийн менежментийг зөв хийх замаар тэтгэврийн зээлийн хүүг бууруулснаар ахмадуудад учирч буй зээлийн хүүний дарамтыг бага ч атугай хөнгөрүүлэх боломжтой гэж үзжээ. Гэвч энэ тогтоолын төсөл мөн л эрх баригчдын үзэмжээр гацаж, цаасан дээр л байсаар өнөөг хүрсэн байна. Ахмадуудад тулгамдаж буй энэхүү асуудлыг Монгол Ардын Нам шийдэхийн тулд сонгуулийн мөрийн хөтөлбөртөө тэтгэврийн зээлийн хүүг бууруулж, “Насны хишиг” олгох эрх зүйн орчин бүрдүүлэхээр тусгасан байна. Өнөөгийн байдлаар 190 мянган ахмад настан тэтгэврийн зээлтэй. Үүнд нийт 355 тэрбум төгрөг эргэлдэж байгаа ажээ.Өөрөөр хэлбэл, ахмадууд сардаа нийт 5.3 тэрбум, жилдээ 63.9 тэрбум төгрөгийг зөвхөн арилжааны банкуудын зээлийн хүүнд халааснаасаа төлж байна. Жилийн 18 хувийн хүүтэй тэтгэврийн зээлийн хүүг хоёр дахин буулгах боломж бийг УИХ-ын гишүүд олон удаагийн судалгаа, хэлэлцүүлэг, банкны удирдлагуудтай хийсэн зөвшилцөлөөр тогтоосон байдаг. Хэрвээ зээлийн хүүг боломжит хэмжээнд бууруулж чадвал жилдээ зөвхөн хүүнд зориулагддаг 60 орчим тэрбум төгрөг ахмадуудын халаасанд үлдэх боломжтой юм. Монгол Ардын Намын бүлгийн гишүүд зээлийн хүүг бууруулах асуудлаар эрх баригч АН-д удаа дараа шаардлага, санал санаачилга хүргүүлсэн удаатай. Гэсэн хэдий ч шийдэгдэлгүйгээр хуулийн төсөл нь дараагийн УИХ-ын бүрэн эрхэд шилжиж байна. Монгол Ардын Нам тэтгэврийн зээлийн хүүг бууруулах асуудлыг мөрийн хөтөлбөртөө тусгасанд ахмадууд баяртай байгаагаа нэр дэвшигчдийн уулзалт бүрт илэрхийлсээр байгаа ажээ.

Төр засагт уламжлаад ч шийдэгддэггүй энэ асуудал ажил хэрэг болно гэдэгт  ахмадууд итгэлтэй байгаа юм. Учир нь тогтоолын төсөл нь цаасан дээр хэдийнэ буусан, батлах хүсэл сэтгэл л байвал хэрэгжихэд бэлэн болжээ.

Эх сурвалж: Inder.mn