Баянзүрх дүүрэгт МАН-аас нэр дэвшиж буй УИХ-ын гишүүн Ж.Энхбаяр өөрийн өрсөлдөгч Сангийн сайд Б.Болорын иргэдтэй уулзах уулзалтанд зочлон "Болор бид хоёр бие биедээ шударга хандана. Болортоо амжилт хүсье" гэж хэлсэн билээ. Тэдний гар, гараа барилцан инээж буй зураг иргэд, олон нийтэд эерэг сэтгэгдлийг өгсөн.

Тэгвэл ийм нэгэн үйл явдал Төв аймагт нэр дэвшигчдийн дунд болжээ. Тодруулбал, Төв аймгийн 29 дүгээр тойрогт нэр дэвшигч Т.Энхсайхан МАН-аас нэр дэвшигч,  А.Сүхбаттай Аргалант суманд таарч сонгуулийн ажилд нь амжилт хүсчээ. Нэр дэвшигч Т.Энхсайхан энэ талаар өөрийн цахим хуудаснаа "Монгол хүний ёсоор очиж, мэндээ мэдэж амжилт хүсээд, бидний хэн нь ч ялсан энэ сайхан нутаг орны энэ сайхан хүмүүсийн аж амьдралыг л дээшлүүлэхийн төлөө зүтгэнэ шүү гэж хэллээ" хэмээн бичжээ.

Тэрбээр өмнө нь MNB телевизийн "За тохирох уу" ток шоунд оролцох үеэрээ өөрийн өрсөлдөгч А.Сүхбатыг сайхан монгол эр хүн, сайн бөх хэмээн магтаж байсан билээ.

Ямартай ч сонгуулийн хар, бараан сурталчилгааны дундуур ийм найрсаг, шударга өрсөлдөөнийг гаргаж буй нэр дэвшигчид олны талархлыг ихээхэн хүлээгээд байна.

Т.Энхэлээ