УИХ-ын дарга, Ардчилсан намын дарга З.Энхболд, Монгол Улсын Засгийн газрын гишүүн, Эрүүл мэнд, спортын сайд С.Ламбаа, Монгол Улсын Хөдөлмөрийн баатар, Гавьяат тамирчин Асашёрюү Дагвадорж нар  өнөөдөр /2016.06.18/ Ховд аймагт ажиллаж,  тус аймгийн иргэд, сонгогчидтой уулзалт хийлээ.

З.Энхболд : Улаанбаатарт Б.Пүрэвдоржийг “Ховдын Пүүжээ” гэдэг

Уулзалтын эхэнд УИХ-ын дарга, Ардчилсан намын дарга З.Энхболд Ховд аймагт нэр дэвшигчдээ танилцуулан, амжилт хүсч үг хэллээ. Тэрээр хэлэхдээ,  УИХ-ын сонгуулийн 34 дүгээр тойрогт Б.Пүрэвдоржийг Ардчилсан нам нэр дэвшүүллээ. Энэ жил Ховд аймагт нэг тойрог нэмэгдсэн.Иймээс гурван хүн нэр дэвшиж байна. 34 дүгээр тойрогт нэр дэвшиж буй Б.Пүрэвдоржийг Улаанбаатарт “Ховдын Пүүжээ” гэдэг. Тэрээр Ховд нутгаа хөгжүүлэх сангийн тэргүүн бөгөөд сар бүр нутагтаа ирж, Ховдчуудтайгаа холбоотой ажилладаг хүн гэлээ.

З.Энхболд: Д.Батцогт Ховд аймгийн Бүсийн эмчилгээ, оношлогооны төв барих төсвийг шийдүүлж чадсан

Харин Ховд аймагт УИХ-ын сонгуулийн 35 дугаар тойрогт УИХ-ын гишүүн, УИХ-ын НББСШУ-ны Байнгын хорооны дарга Д.Батцогтыг нэр дэвшүүллээ. Тэрээр Ховдчуудыг төлөөлөн УИХ-д сууж, хууль тогтоох үйл ажиллагаанд амжилт гарган ажиллаж байгаа төрийн түшээ юм. Тэрээр Ардчилсан намын гишүүдийн дундаас тойрогтоо хамгийн олон удаа ажилласан буюу өнгөрсөн хугацаанд тойрогтоо 40 удаа ирсэн байна. Сонгогдсоноо хойш Бүсийн оношилгоо эмчилгээний төв барих асуудлыг шийдүүлэхийн тулд эрчимтэй ажилласан бөгөөд асуудлыг ч амлалт нэхэж явсаар, шийдүүлж чадсан. Иймээс  Ардчилсан намын зүгээс, миний зүгээс Төрийн ордон барих байсан төсвийг Эрүүл мэндийн салбарт зарцуулахаар шийдвэр гаргасан. Ингэснээр Ховд аймгийн оношилгоо, эмчилгээний төвийг бариулахаар 14 тэрбум төгрөгийг төсөвлөлөө.УИХ-ын гишүүд Төрийн ордноо шинэчлэхгүй боломжоороо ажиллах ёстой, харин Ховдчууд Бүсийн эмчилгээ, оношилгооны төвгүйгээр дахин 4 жилийг өнгөрүүлж болохгүй гэлээ.  

Ш.Адьшаа гишүүн биш атлаа гишүүний дайтай ажлыг нутагтаа хийсэн

Ардчилсан намаас УИХ-ын сонгуулийн 36 дугаар тойрогт Ш.Адьшаа нэр дэвшиж байна. Тэрээр сонгууль болохоор нутагтаа ирдэг, бусад үед Улаанбаатарт амьдардаг хүн биш. Өнгөрсөн хугацаанд нутагтаа амьдарч, Ховд аймгаа хөгжүүлэхийн тулд хийсэн ажлууд нь гишүүн биш атлаа гишүүний дайтай ажил хийж чадсан хүн. Эдгээр гурван нэр дэвшигч хийсэн ажлаараа ч, хийх ажлаараа ч Ховд аймгаа хөгжүүлж чадах нэр дэвшигчид учир тэднийг дэмжихийг уриаллаа.

Амаргүй дөрвөн жилд амжуулсан ажлууд...

Ардчилсан намын дарга З.Энхболд үргэлжлүүлээд, 2012-2016 онд хийж, хэрэгжүүлсэн болон ирэх 4 жилд хийж бүтээх Ардчилсан намын мөрийн хөтөлбөрөө танилцуулав. Өнгөрсөн хугацаанд Ардчилсан нам эдийн засгийн бүтцийн шинэчлэл хийх шаардлага тулгарсан тул уул уурхай гэх ганц тулгууртай эдийн засгаа олон тулгууртай болгох эхлэлийг зоригтой тавьсан. Мөнгөний бодлогын шинэчлэл хийж, 8 болон 5 хувийн ипотекийн зээл, 10 хувийн малчны зээл, Сайн хашаа  5 хувийн  зээл гэх мэт хөтөлбөрийг тус тус хэрэгжүүлж эхэллээ. Амаргүй дөрвөн жилд амжуулсан 10 ажлын хувьд, 1680 үйлдвэрийн төслийг дэмжиж үйлдвэржилтийг эрчимжүүллээ. 1680 үйлдвэрийн төслийг санхүүжүүлэхэд эдийн засаг хүндрэлтэй байсан юм бол хаанаас зээл өгөөд байна гэсэн асуулт гарна. Энэхүү хөрөнгийг Монгол Улсын Засгийн газар Чингис бондоос 419.7 тэрбум төгрөгийн зээл олгосон юм гэв. 

Ипотекийн зээл хэрэгжсэнээр бид ард иргэдээ санхүүгийн сахилга баттай болгож байна

Өнгөрсөн хугацаанд Ардчилсан нам ипотекийн зээлийг хэрэгжүүлснээр нийт 82 мянган өрх орон сууцанд орсон байна. Харин өнгөрсөн хугацаанд буюу МАН засаг барьж байх хугацаандаа  1921-1996 оны хооронд нийт 100 мянган өрх орон сууцанд орж байсан бол өнөөдөр нэг жилд 25 мянган өрх шинээр орон сууцанд орж байна. Ипотекийн зээл нь зөвхөн шинээр байранд орж буй Дорж, Дондог, Дулмаа нарын асуудал огт биш. Барилгын салбар, барилга угсралт, тавилга гээд олон салбарт хүнийг ажлын байртай болгож байна. Гэтэл бидний хийж буй энэ ажлыг МАН “Нүгэл” гэж үзээд байна. Гэтэл Ардчилсан нам иргэдээ шинэ орон сууцтай болгохыг “Буян” гэж хардаг. Иймээс бид ирэх дөрвөн жилд дахин “100 мянган өрхийг шинэ орон сууцтай болгоно” . Бид МАН-ын “Нүгэл” гээд байгаа ажлыг бид “Буян” гэж хардаг учир зоригтой үргэлжлүүлнэ гэв.

З.Энхболд: МАН нэг жилд 32,6 км зам тавьж байсан бол АН  жилд 1000 км зам тавьж байна

1921-2012 оны хооронд 91 жилд 2,964 км зам барьж байсан бол Ардчилсан нам Засгийн эрх авснаас хойш 2013-2015 он хүртэлх 3 жилд 2,720 км зам барьсан 2016 онд 1,284.05 км зам барих ажил хийгдэж байна. Энэ статистикаас харахад, МАН нэг 32,6 км зам барьж байсан бол Ардчилсан нам жилдээ 1000 км зам барьж байна. Энэ бол хөгжлийн хурдац. Гэтэл МАН зээл авч зам тавилаа гээд байгаа. Яаж зээл авахгүйгээр зам тавих юм, МАН шиг эсвэл нэг жилд 32,6 км зам тавьж явах ёстой юу. Ардчилсан нам ийм зам сонгохгүй бид үргэлжлүүлэн замаа барина, мөн бондын зээлээ графикийн дагуу эргүүлэн төлөх бүрэн боломж бидэнд байгаа  гэлээ.

Мөн Ховд аймгийн иргэдэд “Эр зоригийн уулзвар” гэгддэг байсан Саппорогийн уулзвар өмнө нь хамгийн их осол гардаг уулзвар байсныг, өөрчилж олон улсын жишигт нийцсэн уулзвар болсон жишээг харуулав.

Мөн Ардчилсан намын хийж, хэрэгжүүлсэн бүтээн байгуулалтын ажлууд, дэд бүтэц, зам тээвэр, төрөөс орон сууцжуулах хөтөлбөр, цахилгаан эрчим хүч, өндөр настнуудын тэтгэвэр тэтгэмж болон бусад асуудлаар статистик дүн судалгаа бүхий танилцуулга хийв.

Таван толгойг биш, таван хошуу малаа шүтэж амьдарья гэдэг уриаг би дэвшүүлээд байгаа.

Мөн Ардчилсан намаас ирэх дөрвөн жил хийх ажлаа танилцуулав. Ирэх 4 жилийн хугацаанд Ардчилсан нам сайн малчин, сайн хашаа, сайн оюутан хөтөлбөрийг үргэлжлүүлж, сайн бизнес, сайн экспорт хөтөлбөрийг эхлүүлэн ажиллана гэв. Хөдөө аж ахуйн салбарыг хөгжүүлэх цогц бодлого бизнесийн моргэйжийн эрх зүйн орчинг бүрдүүлнэ. Мөн үндэсний үйлдвэрлэлийг дэмжиж, экспортыг тал бүрээр өсгөхийн зэрэгцээ боловсролын зээлийн тогтолцоог бий болгож өргөн хүрээнд хэрэгжүүлэхээ танилцуулав. Гэр хорооллыг дэд бүтэцжүүлэх хөтөлбөрийг үргэлжлүүлэн хийх нь Ардчилсан намын мөрийн хөтөлбөрт туссан байна. Мөн монгол хүний бүтээмжийг өсгөж, орлогыг хоёр дахин нэмэгдүүлэхээр “Монгол хүн-2020” хөтөлбөрт тусгаснаа танилцуулав. Ажилтай орлоготой монгол хүн, эрдэм боловсролтой монгол хүн, эрх чөлөөтэй, эрүүл чийрэг, аюулгүй орчинтой монгол хүн гэх мэт 2012 оны Ардчилсан намын сонгуулийн мөрийн хөтөлбөр цаашид ч үргэлжилнэ. Мөн 2016-2020 онд экспортын баримжаатай аж үйлдвэрийн хөгжил, ХАА-н салбарыг эрчимтэй хөгжлийг дэмжиж, Монгол хүний бүтээмжийг өсгөхийн  зэрэгцээ орлогыг хоёр дахин нэмэгдүүлнэ хэмээн Ховд аймгийн иргэдэд танилцуулав.

Мөн цаашдаа биш уул уурхайд бус, харин ХАА-гаа эрчимжүүлэн хөгжүүлэх шаардлагатай. Бид учир нь ухаад нүх үлдэх уул уурхайд биш, жил бүр үр өгөөжөө өгч байдаг мал аж ахуй, хөдөө аж ахуйгаа хөгжүүлэх хэрэгтэй. Иймээс би “Таван толгойг биш, таван хошуу малаа шүтэж амьдарья” хэмээн Ардчилсан намын дарга З.Энхболд уриаллаа.

Монгол Улсын Засгийн газрын гишүүн, Эрүүл мэнд, спортын сайд С.Ламбаа Ховдчуудад хандан үг хэллээ. Тэрээр хэлэхдээ, Би “Цахим эрүүл мэнд”, “Цусны банкны төсөл”-ийн асуудлаар хоёр сарын өмнө Д.Батцогт гишүүний хүсэлтээр ирсэн. Харин энэ удаад 14.2 тэрбум төгрөгийн төсөвтэй Бүсийн эмчилгээ, оношлогооны төв байгуулах ажлын сайхан мэдээтэй хамт ирлээ. Энэ бол Ховдчуудын төдийгүй, бүсийн оношилгоо эмчилгээнд хийж буй томоохон хөрөнгө оруулалт. УИХ-ын дарга, Ардчилсан намын дарга шийдвэр гарган Төрийн ордон барих төсвийг иргэдийн эрүүл мэндийн төлөө, эмнэлэг барихад зориулая гэсэн шийдвэр гаргасан. Энэ нь Д.Батцогт гишүүний уйгагүй хүчин чармайлттай ч холбоотой. Ховд аймгаас нэр дэвшиж буй 3 нэр дэвшигч нутгаа гэсэн сэтгэлтэй хүнийг сонгож байгаа. Ардчилсан нам ямар нэгэн амбиц хөөсөн, албан тушаал хайсан хүнийг УИХ-д нэр дэвшүүлэхгүй. Харин бид “Хийсэн ажилтай, хэлэх үгтэй” хүмүүсээ л УИХ болон ИТХ-д нэр дэвшүүлж байгаа хэмээн онцлов. 2016-2020 он хүртэл хийх Ардчилсан намын мөрийн хөтөлбөр бол 2012 онд хийж эхэлсэн “Монгол Хүн-2020” хөтөлбөрийн  үргэлжлэл. Иймээс Ардчилсан намын хөтөлбөр хэрэгжихэд ямар ч саад байхгүй. Ардчилсан нам маш холыг, алсыг хардаг, сэтгэлгээний хурдтай нам. Би 26 жил энэ намд зүтгэхдээ үүнийг мэдэрсэн, бахархдаг. Бид хэтийн зорилготой ажиллаж ирсэн, та бүхэн ч гэсэн бидний хийж буй ажлыг мэдэрч байгаа. Эдгээр замуудыг хар. Ховд хот бол баруун бүсийн хөгжлийн ирээдүй учраас энд Баруун бүсийн эмчилгээ, оношилгооны төвийг энд барьж байгаа гэлээ.

Монгол Улсын Хөдөлмөрийн баатар, Гавьяат тамирчин Асашёрюү Дагвадорж Ховдын ард түмэнд хандан үг хэллээ. Олон ястны өлгий нутаг болсон Ховд нутагтаа ирэхэд сэтгэл сайхан байна. Ардчилсан нам өнгөрсөн хугацаанд маш их ажлыг хийж амжуулсан. Гэтэл манай намын хийж бүтээж байгаа ажлыг харлуулж байгаа мэдээллүүд цацагдаж байна. Би саяхан УИХ-ын дарга, Ардчилсан намын даргатай хамт Япон Улсад ажлын айлчлал хийгээд ирсэн. Бид энэ хугацаанд Япон Улсад дадлагажигч гаргах “МАШ ЧУХАЛ” ажлыг хийж чадсан. Гэтэл үүнийг ажиллах хүч гаргах, энэ бол худлаа гэх мэтээр яриад, харлуулсан мэдээлэл цацаад байна. Үгүй бид, мэргэжилтэй, боловсролтой боловсон хүчнээ өндөр хөгжилтэй Япон Улсад бэлтгэх гэж байна. Энэ бол “ҮНЭН”. Япон Улсын Ерөнхий сайдын ажлын албанаас хүртэл бидэнтэй хийсэн уулзалтын талаар, санамж бичигт гарын үсэг зурсан талаараа цахим сайтаар дамжуулан албан ёсоор мэдээллэсэн. Манай улсын ирээдүйд асар чухал  энэ ажлыг элдвээр харлуулах хэрэггүй хэмээн Монгол Улсын Хөдөлмөрийн баатар, Гавьяат тамирчин Асашёрюү Дагвадорж онцлов. Мөн тэрээр цаашид монгол хүн-монголынхоо төлөө таван хошуу малдаа тулгуурлан хэрхэн хөгжих, хөдөлмөрлөх, хэрхэн баялаг бүтээж, хамтдаа хөгжилд хүрэх гарцын талаар ярилцаж санал солилцов. Үүний дараа УИХ-ын гишүүн, УИХ-ын НББСШУБХ-ны дарга Д.Батцогт, Ш.Адьшаа, Б.Пүрэвдорж нар  нутгийнхандаа хандан үг хэллээ гэж Ардчилсан намын сонгуулийн штабаас мэдээллээ.