УИХ-ын дарга, Ардчилсан намын дарга З.Энхболд, Монгол Улсын Засгийн газрын гишүүн, Эрүүл мэнд, спортын сайд С.Ламбаа, Монгол Улсын Хөдөлмөрийн баатар, Гавьяат тамирчин Асашёрюү Дагвадорж нар өнөөдөр /2016.06.18/ Ховд, Баян-Өлгий аймагт ажилласны дараа Увс аймагт ажиллаж, тус аймгийн иргэд сонгогчидтой уулзалт хийлээ. Тус уулзалтад Монгол Улсын Хөдөлмөрийн баатар, даяар дуурсагдах Дархан аварга Хорлоогийн Баянмөнх оролцов.

Ардчилсан намын дарга З.Энхболд Төр нийгмийн зүтгэлтэн Ю.Цэдэнбалын мэндэлсний 100 жилийн ойг тэмдэглэн өнгөрүүлэх тогтоолыг гардуулан өгөв

УИХ-ын дарга Увс аймгийн Улаангом сумын иргэдтэй хийх уулзалтын өмнө “Ой тэмдэглэн өнгөрүүлэх тухай” Монгол Улсын Засгийн газрын 333 дугаар тогтоолыг Аймгийн ИТХ-ын дарга Ч.Чимэдэд гардуулан өгөв. Тус тогтоолд зааснаар, Төр нийгмийн зүтгэлтэн Юмжаагийн Цэдэнбалын мэндэлсний 100 жилийн ойг 2016 онд орон даяар тэмдэглэн өнгөрүүлсүгэй гээд удирдан зохион байгуулах комиссыг Монгол Улсын Засгийн газрын хэрэг эрхлэх газрын даргаар ахлуулан байгуулсан байна. Ийнхүү  тус тогтоолыг Увс аймгийн ИТХ-ын дарга Ч.Чимэдэд гардуулан өгөв. Тус тогтоолд ойн арга хэмжээг зохион байгуулахад шаардагдах хөрөнгийг Монгол Улсын Сангийн яамаар шийдүүлсүгэй хэмээн заасан байгааг танилцууллаа.

З.Энхболд: О.Цогтгэрэл нь хүнсний салбарт эцсийн бүтээгдэхүүний экспортын гарцыг нээж чадсан

Үүний дараа Ардчилсан намын дарга З.Энхболд Увс аймагт нэр дэвшигчидээ танилцуулав. Увс аймагт УИХ-ын сонгуулийн 31 дүгээр тойрогт нэр дэвшигч О.Цогтгэрэл нь Увс аймгийн Ардчилсан намын даргаар томилогдсоноос хойш намын гишүүдээ идэвхжүүлсэн, үр бүтээлтэй ажиллаж ирсэн бөгөөд төвийн Ардчилсан намынхаа үйл ажиллагаанд ч дэмжлэг үзүүлэн ажиллаж байна. Тэрээр үндэсний шилдэг бүтээн байгуулагчдын нэг байж, хүнсний эцсийн бүтээгдэхүүний экспортын гарцыг нээсэн.  ХАА-н чиглэлээр олон гарцыг нээж ажиллаж буйн зэрэгцээ  нөхөн сэргээгдэж байдаг хэцүү атлаа ирээдүйтэй энэ салбарт амжилттай ажиллаж буй О.Цогтгэрэлийг Ардчилсан намаас Увс аймагт нэр дэвшүүлж байна гэв.

 Н.Алтанхуяг нь Шинэчлэлийн Засгийн газрын тэргүүнээр ажиллах хугацаандаа бүтээн байгуулалтыг идэвхжүүлсэн

УИХ-ын сонгуулийн 32 дугаар тойрогт нэр дэвшигч УИХ-ын гишүүн Н.Алтанхуяг нь хүүхэд ахуй цагаасаа Увс нутагтаа амьдарч, ажиллаж ирсэн бөгөөд Шинэчлэлийн Засгийн газрын тэргүүнээр ажиллахдаа бүтээн байгуулалтын ажлуудыг эхлүүлсэн. Н.Алтанхуяг нь 2012 оны 8 дугаар сараас дэлхийн зах зээл дээр түүхий эдийн үнэ унасан цаг хугацаанд түүний толгойлсон Засгийн газар сөрж зогсон, Чингис бондыг авсан. Ингээд тэд үйлдвэрлэлийг дэмжих төсөл, гудамж төсөл зэрэг иргэдийн талархалд нийцсэн олон ажлуудыг шийдвэртэйгээр хийж чадсан улс төрч хэмээн хэллээ.

 З.Энхболд: 2015 онд Эрчим хүчний салбар анх удаа алдагдалгүй ажиллахад С.Отгонбаярын гүйцэтгэсэн үүрэг их

УИХ-ын сонгуулийн 33 дугаар тойрогт нэр дэвшигч С.Отгонбаяр нь “Оюуны Ундраа” гэх овгоороо Монголын ард түмэнд танигдсан. Тэрээр 1990 оны нийгэм солигдож байсан цаг хугацаанд хувийн бизнесээ эхлүүлснээс хойш улсынхаа хөгжилд хувь нэмрээ оруулах компани байгуулан, их бүтээн байгуулалтуудыг хийсээр ирснийг монголчууд мэднээ. Тэрээр УИХ-ын гишүүн, Засгийн газрын гишүүнээр ажиллаж байсан. Түүнчлэн 2015 онд Эрчим хүчний салбар анх удаа алдагдалгүй ажиллахад түүний гүйцэтгэсэн үүрэг их юм. Нэр дэвшигчиддаа баяр хүргэсний дараа УИХ-ын дарга өнгөрсөн 4 жилд хийсэн ажлаа тайлагнаж, ирэх 4 жилд хийх ажлын мөрийн хөтөлбөрийнхөө талаар дэлгэрэнгүй мэдээлэл өгөв.

УИХ-ын дарга хэлэхдээ, 2012 онд Ардчилсан нам олуулаа болж, засгийн эрх барьж эхлэх тэр үед дэлхийн зах зээл дээр уул уурхайн гаралтай түүхий эдийн үнэ огцом буурсан. Энэ нь манай улсын эдийн засагт шууд нөлөөлсөн. Иймээс ганц тулгууртай эдийн засгийг олон тулгууртай болгох ажлуудыг эхлүүлж, Ардчилсан нам суурийг нь тавьж чадсаан. 2012-2016 онд бид мөнгөний бодлогын шинэчлэл хийж, 8 болон 5 хувийн ипотекийн зээлийг иргэдэд олгож,  малчдад 10 хувийн малчны зээл, гэрийн хороололд амьдарч буй иргэдэд “Сайн хашаа” хөтөлбөрийн 5 хувийн  зээлийг олгох зэргээр иргэд рүү хандсан олон чухал  ажлуудыг хэрэгжүүлж чадсан, цаашид ч үргэлжилнэ. Амаргүй дөрвөн жилд амжуулсан 10 ажлын хувьд, 1680 үйлдвэрийн төслийг дэмжиж, үйлдвэржилтийг эрчимжүүлж, эхлэлийг тавилаа гэв.

МАН орон сууцны ипотекийн зээлийг “Нүгэл” гэдэг бол

Ардчилсан нам “Буян” гэж үздэг

Өнгөрсөн хугацаанд Ардчилсан нам ипотекийн зээлийг хэрэгжүүлснээр нийт 82 мянган өрх орон сууцанд орсон байна. Харин өнгөрсөн хугацаанд буюу МАН засаг барьж байх хугацаандаа  1921-1996 оны хооронд нийт 100 мянган өрх орон сууцанд орж байсан бол өнөөдөр нэг жилд 25 мянган өрх шинээр орон сууцанд орж байна. Увс аймгийн хувьд аваад үзэхэд ипотекийн зээл нь зөвхөн шинээр байранд орж буй Улаангом сумын иргэн Дорж, Дондог, Дулмаа нарын асуудал биш. Харин барилгын салбар, барилга угсралт, тавилга гээд олон салбарт ажлын байр бий болгодог.  Гэтэл бидний хийж буй иргэдийг орон сууцжуулах ажлыг МАН-ын гишүүн Ц.Нямдорж “Нүгэл” гэж хэлж байсан. Гэтэл Ардчилсан нам иргэдээ шинэ орон сууцтай болгохыг “Буян” гэж хардаг. Иймээс бид ирэх дөрвөн жилд дахин “100 мянган өрхийг шинэ орон сууцтай болгоно”.  Бид МАН-ын “Нүгэл” гээд байгаа ажлыг  “Буян” гэж хардаг учир зоригтой үргэлжлүүлнэ гэв.

 МАН нэг жилд 32,6 км зам тавьж байсан бол

АН  жилд 1000 км зам тавьж байна

1921-2012 оны хооронд 91 жилд 2,964 км зам барьж байсан бол Ардчилсан нам Засгийн эрх авснаас хойш 2013-2015 он хүртэлх 3 жилд 2,720 км зам барьсан 2016 онд 1,284.05 км зам барих ажил хийгдэж байна. Энэ статистикаас харахад, МАН нэг 32,6 км зам барьж байсан бол Ардчилсан нам жилдээ 1000 км зам барьж байна. Бид хөгжлийг хурдасгасан.  Гэтэл МАН зээл авч зам тавилаа гэж шүүмжилдэг. Яаж зээл авахгүйгээр зам тавих юм, МАН шиг нэг жилд 32,6 км зам тавьж явах ёстой юу. Ардчилсан нам ийм ухралтыг хийхгүй, харин бид үргэлжлүүлэн замаа барина, мөн бондын зээлээ графикийн дагуу эргүүлэн төлөх ч чадвартай хэмээгээд Ардчилсан намын засаглалын үед хийж хэрэгжүүлсэн авто замын зургуудыг харуулав.

Мөн 2015 онд эрчим хүчний салбар анх удаа АЛДАГДАЛГҮЙ ажилласан бөгөөд нийслэлийн эрчим хүчний хүчин чадлыг 521 мВт-ээр нэмэгдүүлснээр 163,000 айл өрхийг цахилгаан дулаанаар хангах боломж бүрдсэн их ажилд Увс аймгаас нэр дэвшигч С.Отгонбаяр их үүрэг гүйцэтгэсэн болохыг дахин хэлэв.  

Үүний дараа УИХ-ын дарга, Ардчилсан намын дарга З.Энхболд Ардчилсан намаас дэвшүүлсэн “Монгол Хүн-2020” хэмээх хөтөлбөрийн үргэлжлэл болох шинэ мөрийн хөтөлбөрийн гол агуулгыг танилцуулав. Ирэх дөрвөн жилд Ардчилсан нам экспортыг идэвхжүүлэн ажиллана. Экспортын чиг баримжаатай аж үйлдвэр, ХАА-н салбарын эрчимтэй хөгжил, монгол хүний бүтээмжийг өсгөнө, орлогыг хоёр дахин нэмэгдүүлнэ гэсэн гол агуулгыг хэрэгжүүлэхийн тулд “Таван сайн” хөтөлбөрийг танилцуулав. Эдгээр зорилтуудаас сайн малчин, сайн оюутан, сайн хашаа зэрэг хөтөлбөр хэдийнээ хэрэгжээд эхэлсэн юм.

                                                           З.Энхболд: Бид хийж бүтээж чаддаг МОНГОЛ болсон!

Цаашид сайн бизнес, сайн экспорт гэсэн хөтөлбөрийг хэрэгжүүлнэ. Сайн бизнес бол бизнесийн моргейж юм. Жишээ нь, эхний ээлжинд Улаанбаатар хотын орон сууцны нэгдүгээр давхарт худалдаа эрхэлж буй жижиг, дунд бизнес эрхлэгчдийг дэмжинэ. Бизнес эрхлэгч үл хөдлөх хөрөнгөө барьцаалан 5 хувийн хүүтэй зээлийг авах боломж бүрдэнэ. Харин сайн экспортын хувьд, үйлдвэржилтийг хот хөдөөгүй, орон даяар эрчимтэй өрнүүлж, ЭКСПОРТЫГ ЭН ТЭРГҮҮНД тавих бөгөөд уул уурхайн бус экспортыг 2 дахин нэмэгдүүлнэ гэлээ. Биднийг хадаасаа ч хийж чаддаггүй гэдэг байсан. Гэтэл бид хадаас байтугай Япон Улсын чанарын шаардлагыг хангасан нарны панель үйлдвэрлэж, япон руу экспортлож байна хэмээн УИХ-ын дарга хэллээ. УИХ-ын дарга З.Энхболдыг үг хэлсний дараа, Эрүүл мэнд, спортын сайд С.Ламбаа болон Монгол Улсын Хөдөлмөрийн баатар, Гавьяат тамирчин, Асашёрюү Дагвадорж Увсчууддаа хандан үг хэлэв. Асашёрюү Дагвадорж хэлэхдээ, сонгууль ойртсон энэ цаг үед хийж бүтээсэн ажлыг харлуулах оролдлого их гарч байна. Гэвч Монголын ард түмээн сонгууль удахгүй дуусна, бид эв нэгдэлтэй байх ёстой хэмээн уриалав.

Н.Алтанхуяг: Увсчуудаа энэ жил өөрчилт хийе. УИХ-ын сонгуульд Ардчилсан намаас нэр дэвшигчдээ багаар нь дэмжье

Монгол Улсын 28 дахь Ерөнхий сайд, УИХ-ын гишүүн Н.Алтанхуяг бүгдээрээ хамтдаа урагшаа хэмээгээд, өнгөрсөн 4 жилд аймаг орон нутагт их ажлыг хийж амжуулсан. Нийт Ардчилсан намаас аймагт нэр дэвшигчдээ дэмжицгээе. Мөн энэ жил Увсчуудаа жаахан өөрчилье. Энэ жил УИХ-ын сонгуульд ч Ардчилсан намаас нэр дэвшиж буй гурван  нэр дэвшигчээ зоригтой дэмжье. Ингэснээр бид хөгжлөө хурдасгаж чадна гэв.

ХОРЛООГИЙН БАЯНМӨНХ: МАН-ын “ХОЦРОГДОЛ” болон АН-ын  “ДЭВШИЛ” хоёрын хооронд тэмцэл өрнөж байна

Хөдөлмөрийн баатар, Монгол Улсын даяар дуурсагдах Дархан аварга Х.Баянмөнх нутгийн зон олондоо хандан үг хэлэв. Тэрээр хэлэхдээ, өнөөдөр маш өндөр ач холбогдолтой уулзалт болж байна. УИХ-ын дарга, Ардчилсан намын дарга З.Энхболд Увс аймагт хүрэлцэн ирж, Төр нийгмийн зүтгэлтэн Ю.Цэдэнбалын мэндэлсний 100 жилийн ойг улс орон даяар тэмдэглэн өнгөрүүлэх тухай тогтоолыг гардуулан өгсөн нь Монголын ард түмний талархлыг хүлээж байна. Өнөөдөр Увс аймагт Ардчилсан нам хүчтэй байгаа гэдэг нь харагдаж байна. МАН-ын “ХОЦРОГДОЛ” болон АН-ын “ДЭВШИЛ” хоёрын хооронд тэмцэл өрнөж байна. МАН шударга бусаар өрсөлдөж байгаа нь миний ач, зээ  шиг залуучуудыг буруу зүйлд уриалан дуудаж, өөрсдийгөө хэн болохоо харуулж, бусдад таниулж байгаа хэрэг. МАН-ын бүдүүлэг бохир үйл явдлын дунд Ардчилал 26 жил хэрхэн тарчилж байгааг би харж байна. Увс аймагт МАН буюу хуучин хүчний сэнтий горилсон хэдэн хүний үйл явдал хэрхэн өрнөж байгааг бид харлаа. МАН бол Ю.Цэдэнбал агсныг үсийг нь цайтал зарчаад, ясыг нь цайтал зовоосон юм хэмээн  онцлов. Иймээс Ардчилсан намаас Увс аймагт нэр дэвшигчдийг сонгосноор төрсөн нутагт минь дэвшил ирнэ хэмээн Хөдөлмөрийн баатар, Монгол Улсын даяар дуурсагдах Дархан аварга Х.Баянмөнх хэлснээр уулзалт өндөрлөсөн юм.

Эх сурвалж: demparty.mn