МАН-ынхан анх мөнгөний амлалтыг хавтгайруулж эхэлсэн түүхтэй. С.Баярын тэргүүлсэн Засгийн газар иргэн бүрт 1.5 сая төгрөг амлаж, сонгуульд ялалт байгуулж байв. Ингээд амлалтаа биелүүлэхийн тулд иргэн бүрт халамжийн мөнгө олгож, 1.5 сая төгрөгийг тарааж эхэлсэн. Энэ нь иргэдийг бэлэн мөнгө, бэлэнчлэх сэтгэлгээнд дурлуулсан гэж хэлж болно. Ингэхдээ тэд Чалкогоос Таван толгойгоо барьцаанд тавиад 350 тэрбум төгрөг зээлсэн байдаг. Тэдний хавтгайруулсан халамжийн бодлогын хөлд аж ахуйн нэгжүүд чирэгдэж ихэнх нь хүнд байдалд орсон юм.

 Дээрх өрийг төлж дуусгахын тулд “Шинэчилсэн” болон “Шийдлийн” Засгийн газар 2012 оноос хойш бондуудыг босгож, болохгүй зүйлийг болгох гэж чадлаараа хичээсэн гэдэг. Харин МАН-ын амтай болгон өнгөрсөн дөрвөн жилийн турш “АН их өрөнд орууллаа” гэж ярьсаар ирсэн юм.

Үнэн хэрэгтээ бондуудын гэх өр тийм ч их биш. Энэ талаар Ерөнхий сайд Ч.Сайханбилэг “Өнөөдрийн байдлаар Засгийн газарт хамаарах 4.9 тэрбум ам.долларын өр байна. Өрийн үлэмж хэсэг нь нэг талаас Монгол Улсынх мэт харагдавч нөгөө талаас Засгийн газарт огт хамаагүй юм. Эдгээр нь УИХ-ын гишүүн Л.Энх-Амгалангийн “ЭМ СИ ЭС”, Н.Номтойбаярын “МАК”, О.Содбилэгийн “НИК”, “Петровис” зэрэг томоохон хувийн компаниудын зээл” юм хэмээн нэр зааж илчилж байв.

МАН-ынхны яриад байгаа 20 гаруй тэрбум ам.долларын өр гэдэгт МАН-ын гишүүд болох Н.Номтойбаяр, Л.Энх-Амгалан тэргүүтэй нөхдүүдийн хувийн компанийн өрүүд нэмж тооцогдож байгаа юм. Үнэн хэрэгтэй Засгийн газрын гадаад 4.9 тэрбум ам.долларын өр дээр МАН-ынхны өөрсдийн хувийн компанийн өрийг оруулж байгаад ард түмнээрээ төлүүлэх гэж байгаа бололтой. Тиймдээ ч Засгийн газрын 4.9 тэрбум ам.долларын өрийг 20 гаруй тэрбум ам.долларын өр хэмээн ард түмний тархийг угааж байна.

 “Монголд нярай хүүхэд мэндлэхдээ өчнөөн сая төгрөгийн өртэй” төрдөг гэх үг биелэлээ олж байна. Монгол Улсын иргэн бүр 15 сая төгрөгийн өртэй болж. Энэхүү өрийн эхлэл МАН-аас улбаалж, харин МАН дахин засаглаж эхэлвэл өрийг нь ард түмэн өөрсдөө төлөх бололтой.

Б.Саран

Эх сурвалж: Ардчилсан намын сонгуулийн төв штаб