УИХ-ын дарга, Ардчилсан намын дарга З.Энхболд, Монгол Улсын Засгийн газрын гишүүн, Эрүүл мэнд, спортын сайд С.Ламбаа, Монгол Улсын Хөдөлмөрийн баатар, Гавьяат тамирчин Асашёрюү Дагвадорж нар  өнөөдөр /2016.06.19/ Завхан аймагт ажилласны дараа, Хөвсгөл аймагт хүрэлцэн ирж,  тус аймгийн иргэд, сонгогчидтой уулзалт хийлээ.

                                           З.Энхболд: Хөвсгөлчүүд П.Цагааныг сонговол УИХ-д “маш сайн” төлөөлөлтэй болно

Уулзалтын эхэнд УИХ-ын дарга, Ардчилсан намын дарга З.Энхболд Хөвсгөл аймагт нэр дэвшигчиддээ баяр хүргэж, үг хэллээ. Тэрээр хэлэхдээ, Хөвсгөл аймагт УИХ-ын сонгуулийн 37 дугаар тойрогт Ерөнхийлөгчийн Тамгын газрын дарга П.Цагааныг илгээж байна. Тэрээр олон Ерөнхийлөгчтэй хамт ажиллаж байсан, Боловсролын сайд, Сангийн сайд хийж байсан туршлагатай улс төрч юм. Олон Улсын Вальютын сан, Юнеско зэрэг томоохон байгууллагуудад Монгол Улсаа төлөөлөн сууж ажиллаж байв. Түүнийг дэмжвэл  Хөвсгөлчүүд УИХ-д маш сайн төлөөлөлтэй болно гэдгийг батлан хэлье гэв.

Ц.Оюунгэрэл нь соёлын үнэт түүхэн өвийг хамгаалах

чиглэлээр маш идэвхтэй ажилласан

Мөн УИХ-ын сонгуулийн 38 дугаар тойрогт УИХ-ын гишүүн Ц.Оюунгэрэл  нэр дэвшиж байна. Тэрээр Соёлын сайдын албан тушаалыг нэр төртэй хашиж байсан. Мөн Ц.Оюунгэрэл нь соёлын үнэт өвийг хамгаалах чиглэлээр идэвхтэй ажиллаж байгаа улс төрч хэмээн УИХ-ын дарга, Ардчилсан намын дарга З.Энхболд хэллээ. 

  Б.Эрдэнбат: Хөвсгөл аймгийн зарим сумдаа эрчим хүчээр хангасан улс төрч 

УИХ-ын сонгуулийн 39 дүгээр тойрогт улс төрч Б.Эрдэнэбатыг илгээлээ. Тэрээр “Эрэлийн” Эрдэнэбат нэрээрээ Монголын ард түмэнд танигдсан. УИХ-ын гишүүн, Батлан Хамгаалахын сайд, Эрчим хүчний сайдын албан тушаалыг хашиж байсан, Хөвсгөл аймгийн цахилгаанд холбогдох боломжгүй байсан сумдыг эрчим хүчээр хангах ажлыг хийж чадсан хүн учраас Ардчилсан нам түүнийг Хөвсгөл аймагт нэр дэвшүүлж байна гэлээ.

Үргэлжлүүлэн УИХ-ын дарга, өнгөрсөн дөрвөн жилд хийсэн ажлаа дүгнэв. Ардчилсан нам 2012-2016 онуудад, эдийн засгийн бүтцийн шинэчлэл хийх шаардлага тулгарсан тул ганц тулгууртай эдийн засгаа олон тулгууртай болгох эхлэлийг зоригтой тавьсан. Мөнгөний бодлогын шинэчлэл хийж, 8 болон 5 хувийн ипотекийн зээл, 10 хувийн малчны зээл, “Сайн хашаа” хөтөлбөрийн  5 хувийн  зээл гэх мэт хөтөлбөрийг тус тус хэрэгжүүлж эхэллээ. Амаргүй дөрвөн жилд амжуулсан 10 ажлын хувьд, 1680 үйлдвэрийн төслийг дэмжиж үйлдвэржилтийг эрчимжүүллээ. Эдгээр үйлдвэрүүдэд Монгол Улсын Засгийн газар Чингис бондоос 419.7 тэрбум төгрөгийн зээл олгосон юм гэв.  Мөн 82 мянган өрх орон сууцанд орж, 3405 км авто зам тавигдсан. 573 мянган хүн ажилласан жилээ нэмэгдүүлснээс гадна, сайн оюутан хөтөлбөр, эрчим хүчийг нэмэгдүүлсэн, орон нутаг эрх мэдлийг олгосон зэрэг ажлуудын талаар дэлгэрэнгүй мэдээлэл өгөв.

Мөн хөдөө орон нутагт “Аймаг бүрт 1000 айлын орон сууц” хөтөлбөрийг хэрэгжүүлсэн. Хөвсгөл аймгийн хувьд энэ хөтөлбөрийг маш хангалтгүй хэрэгжүүлсэн буюу зөвхөн 232 орон сууц ашиглалтад оржээ. Гэтэл Дорноговь, Баянхонгор, Дорнод, Дархан-Уул, Орхон, Ховд, Сүхбаатар, Хэнтий аймгууд энэхүү хөтөлбөрийг давуулан биелүүлсэн байна. Эдгээр аймгуудын удирдлагуудын хир хөөцөлдсөнөөс шалтгаалан дээрх орон сууц ашиглалтад орж, төлөвлөгөөгөө давуулан биелүүлсэн юм. Харин Хөвсгөл аймаг “Аймаг бүрт 1000 айлын орон сууц” хөтөлбөрийг хэрэгжүүлэхэд анхаарах шаардлагатай гэж хэлэв.

 З.Энхболд: Бид ипотекийг Монгол Улсыг хөгжүүлэх нэг хөшүүргэ гэж харж байгаа

Өнгөрсөн хугацаанд Ардчилсан нам ипотекийн зээлийг хэрэгжүүлснээр нийт 82 мянган өрх орон сууцанд орсон байна. Харин өнгөрсөн хугацаанд буюу МАН засаг барьж байх хугацаандаа  1921-1996 оны хооронд нийт 100 мянган өрх орон сууцанд орж байсан бол өнөөдөр нэг жилд 25 мянган өрх шинээр орон сууцанд орж байна. Ипотекийн зээлийг  МАН “Нүгэл” гэж хэлсэн. Гэтэл Ардчилсан нам иргэдээ шинэ орон сууцтай болгохыг “Буян” гэж хардаг. Иймээс бид ирэх дөрвөн жилд дахин “100 мянган өрхийг шинэ орон сууцтай болгоно” гэлээ. Мөн МАН-ын үед болон Ардчилсан намын үед баригдсан орон сууцыг харьцуулан харуулав. Мөн 1921-2012 оны хооронд 91 жилд 2,964 км зам барьж байсан бол Ардчилсан нам Засгийн эрх авснаас хойш 2013-2015 он хүртэлх 3 жилд 2,720 км зам барьсан 2016 онд 1,284.05 км зам барих ажил хийгдэж байна. Энэ статистикаас харахад, МАН нэг 32,6 км зам барьж байсан бол Ардчилсан нам жилдээ 1000 км зам барьж байна. Энэ бол хөгжлийн хурдац. Цаашид Баян-Өлгий, Ховд, Увс, Завхан, Говь-Алтай, Дорнод аймгуудыг нийслэлтэй холбосон 1538,01 км хатуу хучилттай авто замыг барьж дуусгана  хэмээн УИХ-ын дарга, Ардчилсан намын дарга З.Энхболд онцлон тэмдэглэв. 

  Ирэх дөрвөн жилд хийж хэрэгжүүлэх мөрийн хөтөлбөрөө танилцуулав

Уул уурхай гэдэг уулын бугыг хараад, унасан морь гэдэг мал аж ахуйгаа бид мартсан байсан. Иймээс л бид хөдөө аж ахуйн салбарыг хөгжүүлэх цогц бодлого бизнесийн моргэйжийн эрх зүйн орчинг бүрдүүлнэ. Мөн үндэсний үйлдвэрлэлийг дэмжиж, экспортыг тал бүрээр өсгөхийн зэрэгцээ боловсролын зээлийн тогтолцоог бий болгож өргөн хүрээнд хэрэгжүүлнэ. Ажилтай орлоготой монгол хүн, эрдэм боловсролтой монгол хүн, эрх чөлөөтэй, эрүүл чийрэг, аюулгүй орчинтой монгол хүн гэх мэт 2012 оны Ардчилсан намын сонгуулийн мөрийн хөтөлбөр цаашид ч үргэлжилнэ. Мөн 2016-2020 онд экспортын баримжаатай аж үйлдвэрийн хөгжил, ХАА-н салбарыг эрчимтэй хөгжлийг дэмжиж, Монгол хүний бүтээмжийг өсгөхийн  зэрэгцээ орлогыг хоёр дахин нэмэгдүүлнэ гэлээ. Ямар арга замаар хэрэгжүүлэх вэ гэвэл, Ардчилсан нам сайн малчин, сайн хашаа, сайн оюутан хөтөлбөрийг үргэлжлүүлж, сайн бизнес, сайн экспорт хөтөлбөрийг эхлүүлэн ажиллана. Мөн гэр хорооллыг дэд бүтэцжүүлэх хөтөлбөрийг үргэлжлүүлэн нь Ардчилсан намын мөрийн хөтөлбөрт туссан. Хүнс, хөдөө, аж ахуйн бодлогын хувьд хүнсний ногоогоо дотоодоос 100 хувь хангана, үүнийг даган ажлын байр шинээр нэмэгдэнэ гэв. Малын буянг малчинд нь үлдээхийн тулд “Сайн малчин” хөтөлбөрийг хэрэгжүүлж эхэлсэн. Мах махан бүтээгдэхүүний экспортыг жилд 1 тэрбум ам долларт хүргэх зорилттой байгаан зэрэгцээ 21 аймагт махны үйлдвэр байгуулахаар төлөвлөсөн. Сайн малчин хөтөлбөр эхлэхийн өмнө Р.Бурмаа сайдыг БНХАУ руу явуулсан. Ийнхүү БНХАУ-тай мах экспортлох 1 тэрбум ам.долларын гэрээ хийсэн. Үүний дараа БНХАУ-ын малын эмч манай улсад ирсэн. Гэтэл манай аймгуудаар явж үзээд 6 аймгаас л мах экспортлон авах боломжтой гэсэн. Харин үлдсэн 15 аймагт малын өвчин гарч байсан учир малын мах авахгүй гэсэн. Ингээд энэ асуудлыг хэрхэн шийдэх вэ гэдэг асуудлыг Ардчилсан намын бүлэг ярьж хэлэлцээд, “Сайн малчин” хөтөлбөрийг эхлүүлсэн. Ингэснээр эрүүл малтай малчин 10 хувийн малчны зээл авч, малыг эрүүлжүүлэх хөшүүргийг бий болгосон гэв. Мөн тэрээр Хөвсгөл аймгийн иргэдэд ахиулан хийх ажлуудаа танилцуулав.

Асашёрюү Дагвадорж: Хийж бүтээсэн ажлыг хэсэг бүлэг хүмүүс үгүйсгэж, сонгуулийн шоу хийж болохгүй

Үргэлжлүүлээд, Засгийн газрын гишүүн, Эрүүл мэнд, спортын сайд С.Ламбаа болон  Монгол Улсын Хөдөлмөрийн баатар, Гавьяат тамирчин Асашёрюү Дагвадорж нар Хөвсгөлчүүддээ хандан үг хэллээ. Асашёрюү Дагвардорж, хөдөө аж ахуйн салбарт хийж буй өөрийн бүтээн байгуулалтууд тэр дундаа гүүний эсэхийг хэрхэн гоо сайхны бүтээгдэхүүний түүхий эд болгон ашиглаж байгаа талаараа танилцуулав. Тэрээр япон стандартын гүүний эхэсийг цэвэрлэх, хадгалах үйлдвэрээ нээж байгаа бөгөөд цаашдаа өмнө нь ашигладаггүй байсан гүүний эхэсийг баялаг болгож болох, үүнийг дагаад малчдын амжиргааг өөд нь татах их боломжуудынхаа талаар мэдээлэл өгөв. Мөн сүүлийн үед УИХ-ын даргын Япон Улсад ажлын айлчлал хийж, хоёр улсын хооронд Хөдөлмөрийн яам, Уул уурхайн яамдууд хамтран ажиллах санамж бичигт гарын үсэг зурагдсан. Ингэснээр Япон Улсад Монгол Улсаас дадлагажигч илгээх асуудал шийдэгдсэн. Энэ арга хэмжээ Япон Улсын Ерөнхий сайдын өргөөнд болсон. Гэтэл монголчуудынхаа сайн сайхны төлөө хийсэн энэ ажлыг хэсэг бүлэг хүмүүс үгүйсгээд, сонгуулийн шоу болгоод байна. Ингэж болохгүй ээ Монголчууд аа гэв. Түүнчлэн УИХ-ын даргын Япон Улсад хийсэн ажлын айлчлалын талаар мэдээллүүдийг баримт, гэрэл зургийн хамт үзүүлж ярилцлаа. Түүний дараа Ардчилсан намаас Хөвсгөл аймагт нэр дэвшигч Б.Эрдэнэбат, Ц.Оюунгэрэл, П.Цагаан нар үг хэлэв. Б.Эрдэнэбат хэлэхдээ, УИХ-ын даргад Хөвсгөлийн ард түмэн талархалаа илэрхийлж байсныг дамжуулая. Тэрээр 1072 хувьцааг жинхэнэ ард түмний өмч мөн гэдгийг шийдвэрлэж чадсан. Түүний гаргасан шийдвэрээр монголчууд бид Эрдэс таван толгойн 1072 хувьцааныхаа жинхэнэ эзэн болох эхлэлийг тавьж чадсан. Бид ирэх жилүүдэд бүтээн байгуулалтаа үргэлжлүүлж, монгол хүний бүтээмжийг өсгөж, орлогыг нэмэгдүүлсэн ажлуудыг хийнэ гэдгээ хэлж байв. Мөн Хөвсгөл аймагт нэр дэвшигч Ц.Оюунгэрэл хэлэхдээ, хамгийн ядуу тарчиг он жилүүдэд Ардчилсан нам засагласан мөртлөө урд өмнөх цаг хугацаанд хийж байгаагүй их ажлыг Ардчилсан нам хийж, бүтээж чадсаан. Хөвсгөл аймагт  л гэхэд хатуу хучилттай замтай болгож чадсаан. Хөвсгөлчүүд манай намын хийсэн энэ ажилд талархаж байсан. Ардчилсан намын бүтээн байгуулалтын хүчээр бид Хөвсгөл жинхэнэ Швейцарь шиг хөгжилтэй, Швейцарь шиг орлоготой болоход ойрхон байна гэв.  Мөн Хөвсгөл аймагт нэр дэвшигч, Ерөнхийлөгчийн Тамгын газрын дарга П.Цагаан уулзалтын төгсгөлд хэлэхдээ, миний бие тоонд, судалгаан дээр тулгуурлан ажлаа хийдэг. Би 180 үзүүлэлтээр Монгол Улсын аймгуудыг жагсаахад Хөвсгөл аймаг хөгжлийн хувьд нилээн хоцронгуй байна. Иймээс Хөвсгөл аймгийг хөгжүүлэхийн тулд тойргийн тоог нэгээр нэмэгдүүлсэн. Миний бие  олон хүний итгэлийг өвөртлөн Хөвсгөл аймагт нэр дэвшиж байна. Өчигдөр Хөвсгөл аймгийн Алаг-Эрдэнэ суманд манай намын нэр дэвшигчийн сурталчилгааг урж, сүйтгэсэн балмад үйлдэл гарсан. Гэвч тэдгээр хүмүүс миний Хөвсгөлөө хөгжүүлье гэсэн итгэлийг урж чадахгүй хэмээн П.Цагаан хэллээ. 

З.Энхболд:МАН-ынхан шударга өрсөлдөцгөөе!!! Увс, Хөвсгөл, Баянхонгорт байгаа царцаануудаа эргэн тат!!!

УИХ-ын даргад хандан мэдээлэл өгөв. Энэхүү мэдээлэлд дурдагдсанаар 2016 оны УИХ-ын сонгуулиар Хөвсгөл аймагт сонгуулийн тухай хуулийн 65.7 дугаар заалтын дагуу бусад аймаг хотоос 3145 сонгогч шилжин ирсэн бүртгэлээ хийлгэсэн бөгөөд 283 сонгогч шилжин ирсэн тэмдэглэл нь өнөөдрийн байдлаар сонгуулийн хэсгийн хорооноос ирээгүй байна. Үүнээс сонгуулийн 37 дугаар тойрогт 720 орчим, 38 дугаар тойрогт 43 орчим, 39 дүгээр тойрогт  2400 орчим сонгогч шилжин ирсэн байна хэмээн Хөвсгөл аймгийн Улсын Бүртгэл, Статистикийн газрын мэдээллийг танилцуулав. УИХ-ын дарга хэлэхдээ, энэ мэт сонгогчдыг олноор нь шилжүүлэн авчрах үйлдэл  Баянхонгор, Увс аймагт гарсан байсан. Мөн Хөвсгөл аймагт гарч байгаан байна. Сонгуулийн санал өгөх нэг өдөр “Хүн-Царцаан” –ы нүүдэл ирж, саналаа өгч, Хөвсгөлчүүд  та бүхний 4 жилийн саналыг хулгайлж болохгүй ээ. Хөвсгөлийн төлөө хөвсгөлчүүд л саналаа өгөхөөс биш Хөвсгөл аймагт нэр дэвшиж буй МАН-ын нэр дэвшигч Л.Энх-Амгалангийн хувийн компанийн ажилтнууд олноор ирж, хөвсгөлчүүдийн өмнөөс шийдвэр гаргаж болохгүй. Тэд энд нэг л өдөр санал өгнө, харин та бүхэн нутагтаа үлдэнэ . Би хууль баталдаг УИХ-ын даргын хувьд биш, харин Ардчилсан намын даргын хувьд “МАН-ынхан шударга өрсөлдөцгөөе!!! Увс, Хөвсгөл, Баянхонгорт байгаа царцаануудаа эргэн тат ” гэж хэлье гэлээ.

Үүний дараа Хөвсгөл аймгийн уугуул, Хөдөлмөрийн баатар Д.Банзрагч УИХ-ын дарга, Ардчилсан намын даргад хандан амжилт хүсч, ялалт байгуулахыг хүслээ. Мөн үргэлжүүлэн Ардын уран зохиолч Т.Галсан Ардчилсан намынханд хандан мэндчилгээ дэвшүүлж, өөрийн үзэж туулсан 3 нийгмийн үеийг харьцуулахад Ардчилсан намын Засаглалын үед хичнээн их ажлыг хийж, эх орныхоо өнгө төрхийг өөрчилж байгаа талаар саналаа хэлж, Ардчилсан намыханд амжилт хүссэн юм.

Эх сурвалж: Demparty.mn /Ардчилсан намын сонгуулийн штаб/