УИХ-ын гишүүн, Барилга хот байгуулалтын сайд З.Баянсэлэнгэ нөхөр, хүү болон хуульчийн хамтаар олон нийтэд мэдээлэл хийлээ. Тэрбээр энэ үеэр Сонгино хайрхан дүүргийн 72 дугаар тойрогт өөртэй нь өрсөлдөж буй нэр дэвшигч Н.Учралын талаар хууль зөрчсөн баримтуудыг дэлгэсэн юм.
Сонгинохайрхан дүүрэгт нэр дэвшигч З.Баянсэлэнгийн хувийн амьдрал, гэр бүлийг нь доромжилсон нийтлэл саяхан “Ноцтой мэдээ” сонинд гарчээ. Уг нийтлэлд “Нэр дэвшигч З.Баянсэлэнгийн буруугаас үүдэн Д.Ганхуяг гэх эрэгтэй амиа алдсан, тендерийн ажлаас их хэмжээний мөнгийг хувьдаа завшсан, хоёр нөхөр сольсон, хормойн донтой” гэх мэтээр бичсэн байна. Энэхүү нийтлэлд бичсэн мэдээлэл нь бүхэлдээ худал бөгөөд нэр дэвшигч З.Баянсэлэнгийн нэр төр, алдар хүндэд илт халдсан гэж үзсэн учраас “Ноцтой мэдээ” сонинг шүүхэд өгсөн хэмээн хуульч н.Гантамир мэдэгдлээ.
Нэр дэвшигч З.Баянсэлэнгэ энэ талаар ярихдаа “Би уг мэдээллийг надтай нэг тойрогт өрсөлдөж буй Н.Учрал захиалсан гэж хардаж байгаа. Үүнийг миний гэр бүлийг доромжилсон үйлдэл гэж үзэж буй учир би хуулийн байгууллагад албан ёсоор хандах гэж байна. Намайг тендерээс мөнгө идсэн гэх мэдээлэл гарсан даруйд би цагдаагийн байгууллагад хандаж өөрийгөө шалгуулсан. Цагдаагийн байгууллагаас намайг шалгаад буруугүй болохыг тогтоосон. АТГ-аас ч намайг уг хэрэгт холбогдолгүй болохыг баталж бичиг хүргүүлж байсан. Би өнөөдрийг хүртэл дуугүй байсан. Хэн нэгэн нэр дэвшигчийн талаар хар, буруу мэдээлэл цацаж гүтгэж явсангүй. Би зөвхөн шударгаар өрсөлдье гэсэн юм. Оюутны сургалтын төлбөрийг тэрбум, тэрбумаар нь цацаж байгаа хүүхэдтэй сөргөлдөөд яах вэ дээ гээд би чимээгүй байсан. Харин өнөөдөр яръя гэж бодож байна. Хүүхдийн баярын өмнө Н.Учрал манай яаманд ирж надтай уулзсан. Уулзахдаа “З.Баянсэлэнгэ эгчээ та бол санал хуваах хэмжээний хүн биш. Та төрд хэрэгтэй хүн. Тиймээс би таныг тойргоо солиод өгөөч ээ гээд гуйж байна. Таныг тойргоо сольчихвол би Л.Эрдэнэчимэгийг амархан ялчих гээд байгаа юм. Би таньд 6000 оюутнаасаа өгье. Гурван телевизээ хэрэглүүлье” гэж хэлсэн. Тэгэхэд нь би шударгаар өрсөлдье гэсэн. Н.Учралыг Хэнтий аймгийн тойргоо булаалгачихаад намдаа жийгдээд ирснийг нь бодоод дуугүй л байсан. Надад түүн шиг тэрбум, тэрбумаар цацах мөнгө байхгүй. Шударгаар өрсөлдөхийг хүссэн. Гэтэл тийм биш юм байна. Надтай шударгаар өрсөлд. Миний гэр бүлээр битгий оролд” гэлээ.
Харин нэр дэвшигч З.Баянсэлэнгийн хүү Т.Болдбаатар “Н.Учрал өндөр боловсролтой залуу байж хов баздаг эмэгтэй шиг загнаж байгаа нь зохисгүй юм. Эрэгтэй хүн байж эмэгтэй хүнийг доромжилж болохгүй. Манайх шударга амьдралтай айл. Тийм байхад шударга бусаар доромжилж байгаа нь таалагдахгүй байна” гэв.
Харин З.Баянсэлэнгэ гишүүний нөхөр нь Т.Түвшинжаргал “Н.Учрал ээжтэй, эмээтэй, эхнэртэй, охин үртэй. Гэтэл эмэгтэйчүүд рүү ийм увайгүй, эрээ цээргүй дайрч болохгүй. Хэт төрд шунасан хүнийг төрд бүү оруул гэсэн үг бий. Үүнийг Н.Учралд зориулж хэлмээр байна” гэлээ.
Нэр дэвшигч Н.Учралын хувьд нэг тойрогт өрсөлдөж буй З.Баянсэлэнгийн иргэдтэй уулзах уулзалтыг санаатайгаар үймүүлэх мөн тагнаж, чагнах ажиллагааг байнга явуулж байгаа гэж хуульч н.Гантамир хэллээ.
Тэрбээр энэ талаар “Нэг залуу З.Баянсэлэнгэ гишүүний нэрийг барьж Сонгино хайрхан дүүргийн иргэдээс судалгаа авч яваад манай ухуулагч нартай тааралдсан. Тэр залууг манай ухуулагч нар барьж аваад учрыг лавлаж асуусан. Тэр залуугийн юу ярьсан талаарх бичлэг нь бидэнд бий. Бид тухайн үед залууг хуулийн байгууллагад өгөх гэтэл зугтчихсан. Манай штабаас судалгаа хийлгэхээр ганц ч хүнийг ажиллуулаагүй. Хуулиар ч хориотой. Тийм байхад бидний нэрийг барьж судалгаа хийсэн байгаа юм. Нэр дэвшигч Н.Учрал сүүлийн өдрүүдэд борооны усанд эвдэрсэн замуудыг засч байгаагаас Сонгино хайрхан дүүргийн зарим хэсгийн хогийг цэвэрлэж өгч байна. Энэ нь бүгдээрээ баримтаар нотлогдсон бөгөөд хууль зөрчсөн үйлдэл. Ингэж иргэдийн саналыг авах нь хуулиар хориотой. Түүний энэхүү үйлдлийг Сонгуулийн ерөнхий хороонд өгч шалгуулна. Тэр мөн нэг оюутнаа манай штаб руу явуулсан. Тэр оюутан нь манай нэр дэвшигч дээр ирээд “Н.Учрал намайг явуулсан. Би таны эсрэг юу ч ярьж чадахгүй нь ээ. Би таныг хүндэлж байна” гэж хэлсэн. Мөн Их засаг их сургуулийн нэг багш манай нэр дэвшигчийн уулзалт дээр ирж орилж, чаралж үймүүлсэн. Уулзалтын үеэр “Энэ хорвоо учралын хорвоо” гэсэн дуу тавьсан машиныг ойр авчирч орилуулдаг. Ийм л өчүүхэн юм хийгээд яваад байна. Ийм бүдүүлэг байж болох уу. Мөн З.Баянсэлэнгэ нэр дэвшигчийн уулзалт бүр дээр “Рояаль академи” гэсэн хувцастай хүмүүс ирээд бичлэг хийдэг” гэсэн юм.
Улс төрийн хөндлөнгийн байгууллагын судалгаагаар З.Баянсэлэнгэ гишүүний нэр хүнд СХД-т хамгийн өндөр байгаа аж. Тиймээс З.Баянсэлэнгэ нэр дэвшигчийг ямар ч хамаагүй аргаар дарах нь түүний гол зорьж буй ажил бололтой гэж н.Гантамир хэллээ. Нэр дэвшигч З.Баянсэлэнгийн сурталчилгааны самбар Сонгино хайрхан дүүрэгт 70 ширхэг байгаа бол Н.Учралынх 120 гаруй байгаа аж. Түүнээс гадна сурталчилгааны самбар нь өдөр бүр өөрчлөгдөж байдаг гэнэ. Ер нь энэ сонгуульд Н.Учрал мөнгийг маш их хэмжээгээр ашиглаж байгаа гэв. Түүний сонгуулийн зардал хуулиар тогтоосон хэмжээндээ багтаж байгаа эсэхийг албан ёсоор шалгуулахаар СЕХ, Аудитын үндэсний газарт хандахаар болжээ. Хүч тэнцвэргүй өрсөлдөөнд нэгнээ доромжилж, харлуулахгүй байхыг З.Баянсэлэнгэ гишүүний штабаас уриалсан юм.
Т.Хулан
Сэтгэгдэл (38)