УИХ-ын дарга Д.Дэмбэрэл өнөөдөр 09.00 цагаас УИХ, Нийслэлийн ИТХ-ын сонгуулийн саналаа Баянзүрх дүүргийн122 дугаар цэцэрлэгт өглөө.  МУ-ын их хурлын 2012 оны сонгуулийн 22-р тойргийн 41–р хэсэгт  УИХ-ын дарга Д.Дэмбэрэл санал өгсөн юм. Тэрээр сонгуулиа өгснийхөө дараа иргэдэд хандан “Өнөөдөр монголын ард түмэн дөрвөн жил тутам монголын төр барих УИХ-аа сонгон байгуулдаг. Өнөөдрийг иргэд төрдөө зориулах  өдөр. Ажлын өдрийг зориуд сонгогчдоо зориулан эрхээ эдлэх боломж олгож амралтын өдөр болгосон. Төрийг сонгож байгуулна гэдэг амар зүйл биш. Сонгуулийн сурталчилгаа зөв явагдаж өнгөрлөө. Өнөөдөр ард түмэн өөрсдийн сонголтоо хийнэ. Иргэд маань энэ төрийг сонгох төрийн үйл хэрэгт оролцох алтан боломжийг сайтар ашиглах хэрэгтэй. Төрийн үйл хэрэгт оролцохдоо нийт иргэд  хуульзүйн хүрээнд оролцох хэрэгтэй байна. Өмнөх жилүүдийн сонгуулийн хувьд  жижиг дутагдлууд гарч байсан. Төрийн ажилд оролцоно гэдэг өөрөө өөрийгөө зөв авч явах хариуцлагатай, элдэв хэл ам, луйвар заль мэхгүй энэ ажлыг хийх нь хүн бүрийн цаашдын үйл хэрэгт маш чухал. Тиймээс иргэд сонгуульдаа хянамгай хариуцлагатай оролцоно гэдэгт найдаж байна. Түүнчлэн хүн бүр өнөөдрийн энэ боломжийг сайтар ашиглахын тулд ажлаа сайн зохицуулах хэрэгтэй. Сонгуулийн хуульд хуулийн хүрээнд ажиллахыг маш тодорхой заасан байгаа. Орой 08.00 цагаас өмнө саналаа өгөөрэй. Сонгууль яг найман цагт дуусах учраас болж өгвөл 7 цагт саналаа өгөхийг хүсье. Сонгууль шударга сайн явагдана гэдэгт итгэж байна. Эцэст нь  төрөө сонгох ажилд манай ард түмэн хариуцалагатай ажиллана гэтэгт итгэж байна. Сонгуулийн ажилд амжилт хүсье” гэлээ.

Б.Чимэг