2016 оны сонгуулийн урьдчилсан дүн мэдээ гарч, МАН ялалт байгуулаад байна. Тэгвэл ялалт байгуулсан намын дарга М.Энхболд хариуцлагаа бүрэн дүүрэн ухамсарлаж ажиллахаа мэдэгдсэн бол намаа ялагдалд хүргэж, өвдөг шороодуулсан АН-ын дарга З.Энхболд МАН-ын ялалтыг хүлээн зөвшөөрч, баяр хүргээд байгаа юм. Харин өмнөх жилүүдийн сонгуульд ийнхүү ялагдал хүлээсэн намыхан шууд дахимаа өгч байсан удаагүй. Тэгвэл цэвэр шахам ялагдаад байгаа АН ийнхүү бууж өгч байгааг зарим хүмүүс улс төрийн соёл хэмээн хүлээн авч байгаа бол нөгөө хэсэг нь З.Энхболдыг өөрийнхөө хийсэн "үйлийн үр"-ийг эдлэж, намаа унагалаа гэдгийг ч хэлж байгаа юм. Ямартай 2016 оны сонгуульд зуузай холбон сойгдсон намын дарга нарын байр суурийг хүргэж байна. 

МАН-аас өчигдөр сонгуулийн урьдчилсан дүн мэдээ гарсны дараа мэдээлэл хийсэн юм. МАН-ын дарга М.Энхболд энэ үеэр “МАН УИХ болон нийслэлд үнэмлэхүй олон болжээ. Манай нам 63 тойрогт ялалт байгуулсан гэх урьдчилсан мэдээлэл бидэнд ирээд байна. аймаг, нийслэлийн ИТХ-д ч манай нам ялалт байгуулсан гэх мэдээлэл байна. Энэ сонгуульд Завхан аймгаас бусад газарт манай нам олонх болжээ. Манай намыг дэмжсэн намын гишүүн идэвхитэн, гишүүд, ард түмэндээ бид талархал илэрхийлж байна. Улаанбаатар болон аймаг орон нутагт намын штабуудад ажилласан орон нутгийн идэвхтэн иргэд та бүхэндээ талархал илэрхийлж байна. Монголын ард түмэн манай намд итгэл найдвар хүлээлгэлээ. Бидний өмнө асар өндөр хариуцлага хүлээлгэж байна. Бид та бүхнийхээ итгэлийг алдахгүй хариуцлагаа бүрэн дүүрэн ухамсарлаж ажиллана. Бид улс орныхоо эдийн засаг, нийгмийн өнөөгийн байдал, Монгол Улсын нэр хүнд олон улсад доройтож байгааг засч залруулахын төлөө бүхий л хүчээ дайчилж ажиллах болно" гэлээ.

Ардчилсан намын дарга З.Энхболд энэ удаагийн сонгуульд өвдөг шороодсноо мэдэж мөн л мэдээлэл хийв. Тэрбээр “Монголын ард түмэн сонголтоо хийжээ. Ардчилсан нам энэ сонголтыг хүндэтгэж байгаа. Ялалт байгуулсан өрсөлдөгч нартаа баяр хүргэе. Манай намаас ялалт байгуулсан 10 гаруй гишүүн байна. Тэд нартаа баяр хүргэе. Сонгуулийн үр дүн бол монголчуудын төр засагтаа тавьж буй дүн юм. Гэхдээ АН бүтээн байгуулалтын ажлаасаа ухрахгүй. Цаашид энэ ажлаа үргэлжлүүлэн хийх болно. Бид туйлын хэцүү дөрвөн жилийн ард гарсан. Амаргүй дөрвөн жил байсан. Гэхдээ бид эдийн засгаа авч гарсан. Л.Эрхэмбаяр бид хоёр намын дүрмийн дагуу хариуцлагаа хүлээнэ. Удахгүй Ардчилсан намын зохих шатны байгууллагууд хуралдана" гэсэн билээ.

Б.Энхжин