Маргааш анхдугаар чуулган хуралдана. МАН-ын “томчууд” энэ өдрүүдэд Ерөнхий сайд, УИХ-ын дарга болон бусад албан тушаалд хэнийг томилох эсэхээ тодруулах гээд завгүй байна. Тус намын удирдах зөвлөл өнгөрсөн баасан гаригт хуралдаж, энэ долоо хоногт Бага хурлаа зарлахаар болжээ. Гэхдээ Засгийн газар, УИХ-ыг хэн удирдах, сайд нарт хэнийг томилох, нийслэлийг хэнд даатгах зэргийг бараг тохирсон сурагтай.

Эх сурвалжуудын мэдээлж буйгаар шинэ Засгийн газрын тэргүүнээр МАН-ын дарга М.Энхболд, Н.Энхболд хоёрын нэг нь томилогдож магадгүй байна. Намаа ялуулсан даргын хувьд М.Энхболд Засгийн газрын тэргүүн болох нь зүйн хэрэг ч тэрбээр алсыг харсан нүүдэл хийж магадгүй ажээ. Учир нь тэрбээр 2017 оны Ерөнхийлөгчийн сонгуульд нэр дэвших учраас Засгийн газрыг эхнээс нь өөр хүнд даалгасан дээр гэсэн байр, суурийг Удирдах зөвлөлийн хурлаараа ярилцжээ. Харин Нямаагийн Энхболдын хувьд парламентад олон удаа сонгогдсон туршлагатай, намынхаа жаргал зовлонг хуваалцаж ирсэн хүн. Тиймээс ч Ерөнхий сайдад түүний нэр хүчтэй яригдаж байгаа юм байна. Ямартай ч тус хоёр эрхмийн нэг нь Ерөнхий сайд болно гэх мэдээлэл хүчтэй яригдаж байна. Шинээр сонгогдсон гишүүд маргааш тангараг өргөнө. Дараа нь Засгийн газрын бүтэц бүрэлдэхүүнийг хэлэлцэнэ. Засгийн газрын бүтэц цомхон байхаар МАН-ын Удирдах зөвлөлийн хуралдаанаар хэлэлцсэн байна. Одоогийн 15 яамыг 11 болгож цөөрүүлэхээр болжээ. Тухайлбал, Хөдөлмөрийн яамыг Хүн амын хөгжил, нийгмийн хамгааллын яамтай, Аж үйлдвэрийн яамыг Хүнс, хөдөө аж, ахуйн яамтай, Уул уурхайн яамыг Эрчим хүчний яамтай, Барилга хот байгуулалтын яамыг Зам тээврийн яамтай нэгтгэхээр шийджээ.

Шинээр байгуулагдах Засгийн газрын бүтцийг танилцуулбал,

УИХ-ын дэд даргад Б.Бат-Эрдэнэ, Д.Оюунхорол

Шадар сайдад Ц.Нямдорж, С.Бямбацогт

Уул, уурхай эрчим хүчний сайдад Г.Тэмүүлэн, Ц.Дашдорж, Н.Номтойбаяр

Хөдөлмөр, нийгмийн хамгааллын сайдад Т.Ганди, Б.Мөнхбаатар, Д.Оюунхорол,

БСШУ-ы сайдад Л.Оюун-Эрдэнэ, Ё.Отгонбаяр, Д.Оюунхорол,

Гадаад харилцааны сайдад Г.Занданшатар, П.Цогтбаатар

Хууль зүйн сайдад Ц.Нямдорж, Ц.Мөнх-Оргил

Хүнс хөдөө ахуй хөнгөн үйлдвэрийн сайдад Т.Гантулга, н.Баямөнх

Сангийн сайдад Ч.Улаан, Б.Чойжилсүрэн

Батлан хамгаалахын сайдад Ж.Энхбаяр

Байгаль орчин, ногоон хөгжлийн сайдад Я.Содбаатар нарын аль нэг нь томилогдож магадгүй байна.

Энд нэг зүйл ажиглагдаж байгаа нь МАН-ынхан мөн л “давхар дээл”-тэй сайд нарыг томилох нь. Уг нь тэд өнгөрсөн дөрвөн жил “давхар дээл”-гүй мэргэжлийн засгийн газрыг байгуулах ёстой гэж хашгирцгаасан. Харин өөрсдөө мэргэжлийн засгийн газраа бүрдүүлж чадахгүй дээрхээс тодорхой харагдаж байна.

Дашрамд дурдахад, Нийслэлийн Иргэдийн төлөөлөгчдийн хуралдаан өнөөдөр болж Хотын даргыг томилно. Эх сурвалжуудын мэдээлж буйгаар хотын шинэ даргад Су. Батболд НИТХ-ын дарга Ц.Сандуй нарыг томилуулахаар болжээ. Үүнээс гадна МАН-ын Ерөнхий нарийн бичгийн даргыг томилох асуудал байна. МАН-ын ерөнхий нарийн бичгийн дарга Ж.Мөнхбат бүлгийн дарга болох ойлгомжтой байна. Харин түүний оронд МАН-ын нарийн бичгийн дарга Д.Амарбаясгаланг томилохоор ярилцаж эхэлжээ.

Т.Энхэлээ