АН-ын дарга З.Энхболд мэдээлэл хийж маргааш анхдугаар чуулганыг хуралдуулах нь зохимжгүй гэж мэдэгдлээ. Тэрбээр “Дөрвөн төрлийн зөрчлийг нягтлах хэрэгтэй байна. Үндсэн хуулийн цэцэд өргөдөл өгсөн байгаа. Үндсэн хуулийн цэц захирамжийг хүчингүй болгох байх. Нэгдүгээрт, долоо хоногийн өмнө төрийн албыг 60 тэрбумаар наймаалцаж буй МАН-ын дарга М.Энхболд, Нийслэлийн МАН-ын дарга Ц.Сандуй нарын ярианы бичлэгийг хуулийн байгууллагад өгсөн. Гэтэл шалгасангүй. Үүнийг тодруулж, уг үйл явдлын талаарх хариуг хуулийн байгууллагаас гаргах хэрэгтэй. Хоёрдугаарт, хар машинаас гарсан санал эцсийн үр дүнтэй таарах ёстой. Гарын үсгээ зурж саналын хуудас авсан хүний тооноос саналын хайрцагнаас гарсан тоо нь нэмэгдсэн байна. Сонгогчдод өгөөгүй саналын хуудас хар машин руу орсон байна. Энэ асуудлыг 76 тойргоор нь нэгтгэж шалгахгүйгээр анхдугаар чуулган хийх нь хууль зөрчих нь байна гэж бид үзэж байна. Гуравдугаарт, санал хураах явцад саналын хуудас дууссан. Хуудсыг хувилж болдоггүй. Гэтэл саналын хуудас дууссан аймгуудад канондсон саналын хуудас хэрэглэсэн. Энэ нь сонгуулийн хуулийн 84.1, 99.3-ийг зөрчсөн учраас эдгээр саналын хуудсыг хасч тоолох ёстой. Царцааны нүүдлийн тухайд 18 мянган сонгогч нэг газраас хасагдаж нөгөө газарт очиж санал өгсөн байгаа. Баянхонгор, Увсад царцаа нэмэгдсэн байна. Эдгээр иргэд өөрийн биеэр ирээгүй байхад итгэмжлэхээр сонгогчдын нэрсийг жагсаалтад бүртгүүлсэн. Өөрийн биеэр ирж бүртгүүлэх ёстойг бүртгэлийн газар хууль зөрчиж бүртгэсэн байна. Түүнийг сонгуулийн ерөнхий хороо хэвийн гэж үзжээ. Сонгуулийн хугацаанд хууль зөрчсөн түм, буман асуудал байхад энэ 76 хүнийг тангараг өргүүлэхээр оруулж байгаа нь яарсан ажил байна. 7 сарын 29 хүртэл анхдугаар чуулган хийх бололцоотой. Ядаж эдгээр асуудлыг хуулийн байгууллагаар нягтлан шалгасаны дараа хэдэн хүнийг нь тангараг өргүүлэх вэ гэдгээ шийдэх ёстой. Монголын төр хуулийн дагуу байгуулагдах ёстой. Олон хууль зөрччихөөд УИХ-ын гишүүн болоод явдаг нь зохимжгүй байна МАН-ынхан. Бид төрийн албан хаагчдаа найдаж сонгуульд оролцсон. Саналын хуудас аваагүй хүмүүсийн саналын хуудас яагаад тоологдчихов гэдгийг шалгах ёстой. Нэг тойрог дээр 237 саналын хуудас илүү тоологдож байгаа л шалгах гэсэн юм” гэлээ.

Т.Хулан