Хууль зүйн байнгын хорооны хуралдаан 52,6 хувийн ирцтэйгээр эхэллээ. АН-ын дарга З.Энхболд өдөр мэдээлэл хийж маргааш анхдугаар чуулганыг хуралдуулах нь зохисгүй гэсэн билээ. Тэрбээр МАН-ын удирдлагууд төрийн албыг 60 тэрбумаар наймаалцсан мөн сонгуулийн хууль зөрчсөн хэд, хэдэн асуудал байгааг хууль хяналтын байгууллага шалгаж дуустал анхдугаар чуулганыг хуралдуулах шаардлагагүй гэсэн.

Түүний мэдээллийн дараа Хууль зүйн байнгын хороо хуралдаж төрийн албан тушаалыг 60 тэрбумаар худалдсан эсэхийг шалгах, энэ асуудалд хууль хяналтын байгууллага нь анхаарах ёстойг сануулахаар хуралдсан юм.

Хууль зүйн байнгын хорооны ирц бүрдэхгүй байж байтал МАН-ын бүлгийн дарга С.Бямбацогт тэдэнд хандан тахимаа өгч сурахыг сануулсан юм. Тэрээр  "Та бүхэн сонгуулийн хууль алдаатай байсан гэж яриад байх шиг байна. Гэтэл өнөөдөр сонгуулийн хуулийг хэн баталсан билээ. Олонх байсан та бүхэн баталсан. Өнөөдөр сонгуулийг хэн зохион байгуулсан билээ, та бүхний томилсон төрийн албан хаагчид зохион байгуулж ажилласан. Сонгуулийн хуульд аливаа маргаан зөрчлийг нэг сарын хугацаанд шийдвэрлэхээр заасан. Зөрчил байвал хууль хяналтын байгууллага шалгаж тогтоох ёстой. Ийм байхад та нар 76-уулаа хууль зөрчсөн мэтээр нийгэмд буруу ойлголт өгөх гээд байх шаардлагагүй. Төрийн үйл ажиллагааг гацаах гэж байгаагаа боль. Тахимаа өгч сур. "Ард түмэн яагаад АН-д саналаа өгсөнгүй вэ, юунаас болов" гээд үйл ажиллагаандаа дүгнэлт хий. Ард иргэд та бүхний энэ хууль бус үйлдэлд дургүйцэж байна" гээд завсарлага авахыг хүсэв.

Харин тус байнгын хорооны дарга Д.Ганбат "Маргаашнаас эхлээд төрийн албыг наймаалцаад эхэлбэл яах вэ? Бид хуулийн байгууллагаар шалгуулж, уг асуудалд хяналт тавих ёстой. ЦЕГ, АТГ, ТЕГ болон бусад байгууллагын дарга нарыг дуудаж энэ хуралдаанд суулгах хэрэгтэй. Одоо энэ танхимд хоёрхон мэргэжилтэн сууж байна. Дарга нарыг нь дуудаж ирүүлмээр байна" гэсэн юм.

Энэ үеэр УИХ-ын гишүүн Р.Гончигдорж "Өнөөдрийн хуралдаан бол Хууль зүйн байнгын хороо бүрэн эрхийнхээ дагуу зохион байгуулж байгаа хурал юм. Заавал УИХ-ын чуулганаар оруулж хэлэлцэх албагүй. Хууль зүйн байнгын хороо өөрийн бүрэн эрхийн хүрээнд тогтоол гаргаж хуулийн байгууллагаар хянуулах эрхтэй" гэлээ. Тэрээр завсарлага авах цаг нь өнөөдөр биш, тийм хугацаа ч байхгүй гэдгийг онцоллоо.

Ингээд албаны хүмүүс хуралд суугаагүйн улмаас хуралдааныг 30 минут завсарлуулав.

Т.Энхэлээ