УИХ-ын анхдугаар хуралдаан өнөөдөр болж шинэ гишүүд тангарагаа өргөлөө. Энэ удаагийн сонгуулиар олонх болсон МАН-ынхан УИХ-ын даргад намын дарга М.Энхболдыгоо томилов. Харин одоо Ерөнхий сайдад хэнийг томилох вэ гэдэг асуулт олны анхаарлыг ихээхэн татаж байна. МАН-ын Удирдах зөвлөл өнөөдөр хуралдаж уг асуудлыг хэлэлцсэн ч эцсийн шийдвэрийг гаргаагүй гэнэ. Эх сурвалжийн мэдээлж УИХ-ын гишүүн, МАН-ын бүлгийн дарга асан С.Бямбацогт, УИХ-ын гишүүн Н.Энхболд, УИХ-ын гишүүн Ж.Эрдэнэбат нарын нэр Ерөнхий сайдад хүчтэй яригдаж байгаа аж. МАН-ынхан сонгуульд оролцсон цагаасаа фракцын томилгоотой бус мэргэжлийн Засгийн газар байгуулахаа илэрхийлсэн. Мөрийн хөтөлбөртөө ч энэ тухайгаа тодорхой тусгасан байдаг. Улс орны эдийн засгийн нөхцөл байдалд тулгуурласан ч дараагийн Ерөнхий сайд сайн эдийн засагч эсвэл улс төрийн туршлагатай хүнийг томилохоор байгаа юм. Энэ үүднээс авч үзвэл дээрх гурван хүний хэн нь ч Ерөнхий сайд болох боломжтой. Гэхдээ нэг асуудал бий.

УИХ-ын гишүүн С.Бямбацогтын хувьд Ерөнхий сайд болох хамгийн өндөр магадлалтай хүн. Түүний хувьд УИХ-д гурав дахь удаагаа сонгогдсон туршлагатай улс төрч. Өнгөрсөн хугацаанд тэрбээр бүлгээ сөрөг хүчний байр, сууринаас сайн удирдсан. УИХ дахь ажлын алба нь сайн ажилласан нь ч түүнтэй холбоотой юм. Өнгөрсөн жилүүдэд МАН-ын бүлгийн даргаар 10 хүн ажиллаж байснаас зургаа нь УИХ-ын дарга, хоёр нь Ерөнхий сайд, нэг нь Ерөнхийлөгчөөр сонгогдож байсан түүхтэй. Тэгэхээр МАН-ынхан энэ уламжлал, эрэмбээ дагавал С.Бямбацогтыг Ерөнхий сайд болгоно. Харин уламжлалаа дагах уу гэдэг нь маргааш болох Бага хурлын шийдвэрээс тодорхой болох юм. Хоёрдугаар хувилбар бол Н.Энхболд. Түүний хувьд УИХ-д олон удаа сонгогдсон, Засгийн газрын гишүүн, гадаад харилцааны сайд, бүлгийн дарга, спикерийн орлогчийн албыг хашиж явсан парламентын тулхтай, нэр цэвэр гишүүн юм. Гэвч намын даргатайгаа нэг нутаг усных гэдгээрээ багагүй эсэргүүцэл тулгарах бололтой. МАН-ынхан УИХ-ын даргаар Төв аймгийн уугуул М.Энхболдыг томилсон. Нийслэлийн Засаг даргаар ч мөн  Су.Батболдыг томилохоор төлөвлөсөн. Одоо Засгийн газрын тэргүүнээр дахин тус нутгийн хүнийг томилвол нам дотор эсэргүүцэл гарах магадлал өндөр байгаа юм. Өнөөдөр УИХ-ын чуулганы хуралдааны үеэр УИХ-ын гишүүн Ө.Энхтүвшин нутаг, ус, бүлэг фракц, ах дүүгээ харж ажилд томилвол тэмцэнэ шүү гэдгээ мэдэгдээд амжсан. Тэгэхээр Н.Энхболд гишүүнийг Ерөнхий сайдаар томилвол Ө.Энхтүвшин гишүүнээс эхлээд эсэргүүцэх хүн олон болно. Гуравдугаарт, Ж.Эрдэнэбат гэх залуугийн нэр хүчтэй яригдаж байна. Түүний хувьд МАН доторх нэр цэвэр улс төрчдийн нэг. Түүнчлэн МАН дарга М.Энхболдтой ураг төрлийн холбоотой гэх мэдээлэл бий. Хэрвээ Ж.Эрдэнэбат Ерөнхий сайдаар томилогдвол хамаатан садны томилгоо хийхгүй шүү гэсэн Ө.Энхтүвшин гишүүний шүүмжлэл мөн л сөхөгдөнө. Түүнчлэн Ж.Эрдэнэбатын туршлага, эрэмбэ Ерөнхий сайдын түвшинд бэлтгэгдсэн үү? гэсэн асуулт өөрөө сонирхол татаж байгаа юм. Ж.Эрдэнэбатыг МАН-ын генсек асан У.Хүрэлсүх дэмжиж байгаа аж. Ж.Эрдэнэбат нь У.Хүрэлсүхийн хүн бөгөөд залуучуудын холбоонд ажиллаж эхэлснээсээ түүнтэй сайн харилцаатай болжээ.

Ер нь У.Хүрэлсүхийн фракцийнхан энэ удаагийн албан тушаалын томилгоонд хамгийн идэвхтэй хандаж байгаа гэнэ. Түүгээрээ ч Ж.Эрдэнэбатыг Ерөнхий сайд болгож магадгүй. Гэхдээ Ж.Эрдэнэбат Ерөнхий сайд болбол У.Хүрэлсүхийн нэр хүнд унах өндөр магадлалтай. Учир нь 2012 оны сонгуулиар У.Хүрэлсүх намаа ялагдуулсан. Өнгөрсөн удаа Засгийн газарт хамтрахад С.Бямбацогт, М.Энхболд, Ж.Мөнхбат гэж гурван хүн хамгийн их үүрэгтэй ажилласан боловч бүх албан тушаалыг У.Хүрэлсүх болоод түүний фракцийнханд тавьж өгч байсан. Харин энэ удаад дахин албан тушаалыг найрсагаар тавьж өгөх эсэх нь эргэлзээтэй. Дашрамд дурдахад, МАН-ын Ерөнхий нарийн бичгийн дарга Ж.Мөнхбатын нэр уг марафонд дуулдахгүй байгаа шалтгаан нь УИХ-д анх удаа сонгогдсон төрийн ажлын туршлага бага учраас өөрөө нэрээ дэвшүүлэхгүй байгаатай холбоотой гэнэ. Маргааш МАН-ын Бага хурал хуралдах бөгөөд дээрх гурван хүнээс нэгийг нь сонгоно. Ямартай ч МАН-ынхан уламжлал, дэг журам, зарчмаа дагах уу эсвэл нутаг ус, бүлэг фракцаараа төр барих уу гэдэг нь маргааш тодорхой болох нь. Тус нам хэнийг Ерөнхий сайдаар томилохоос шалтгаалан улс орны ирэх дөрвөн жилийн хувь заяа тодорхойлогдох юм.

Т.Хулан