АСЕМ-ын дээд түвшний 11 дүгээр уулзалтын дагалдах хурлуудын сүүлчийн хурал болох “Ази-Европын бизнесийн чуулга уулзалт” нь 2016 оны 7 дугаар сарын 13, 14-ний өдрүүдэд Улаанбаатар хотноо Төрийн ордны Их танхимд болох гэж байна.
Энэ талаар зохион байгуулагчдыг төлөөлж, Аж үйлдвэрийн яамны Төрийн нарийн бичгийн дарга Д.Нямхүү, “Эрдэнэс Оюу-толгой” ХК-ийн гүйцэтгэх захирал Д.Ганболд, МҮХАҮТ-ын дарга М.Оюунчимэг, “МАОЭНХ” ТББ-ын дэд ерөнхийлөгч Х.Ганбаатар зэрэг албаны хүмүүс АСЕМ-ын мэдээллийн төвд мэдээлэл өглөө.
Уг чуулга уулзалтын зорилго нь Ази, Европын бизнесийн салбарын тэргүүлэгчид хоёр тивийн эдийн засгийн хамтын ажиллагааг бэхжүүлэх, харилцан ашиг сонирхлыг хөндсөн сэдвүүдээр хэлэлцүүлэг өрнүүлж бизнесийн хамтын ажиллагааг өргөжүүлэхэд чиглэгддэг аж.
Манай улсад зохион байгуулагдах Ази-Европын бизнес чуулга уулзалт нь 15 дахь удаагийн чуулга уулзалт бөгөөд нийт 600 орчим гадаадын болон Монголын бизнес эрхлэгчид, хөрөнгө оруулагчид, олон улсын байгууллагын төлөөлөл оролцохоор бүртгүүлсэн байна.
Чуулга уулзалтын зохион байгуулалтын ажлын хэсгийн ахлагчаар УИХ-ын гишүүн, Аж үйлдвэрийн сайд Д.Эрдэнэбат ажиллаж байна. Мөн МҮХАҮТ, “Монголын эдийн засгийн форум” ТББ, “Монголын ажил олгогчдын эздийн холбоо” зэрэг байгууллагууд хамтран ажиллаж байна.
Уг чуулганы 4 салбар хуралдаанаар бизнес эрхлэгчид “Оролцоотой эдийн засгийг хөгжүүлэх”, “Ази-Европын уялдаа холбоо”, “Жижиг, дунд бизнес олон улсын нэмүү өртгийн сүлжээнд нэгдэх” “Хөрөнгө оруулалт ба ногоон хөгжил” дараах сэдвүүдээр хэлэлцүүлэх өрнүүлнэ.
Чуулганаас гарсан санал, дүгнэлтийг нэгтгэн “Чуулга уулзалтын зөвлөмж” болгон төлөөлөгчдөөр батлуулж 11 дэх удаагийн “АСЕМ-ын дээд түвшний уулзалт”-д хүргүүлж, АСЕМ-ын Дээд түвшний уулзалтаас гарах баримт бичигт тусгах юм.
Оролцоотой эдийн засгийн хөгжүүлэх салбар хуралдааны хүрээнд Монгол шиг жижиг улс орнууд дэлхийн бүс нутгийн эдийн засгийн интеграцилал, том улс орнуудын эдийн засгийн нэгдэл, холбоо зэргээс хэрхэн таатай нөхцлүүдийг эдлэх, харилцан ашигтай хөгжих талаар хэлэлцүүлэг өрнүүлнэ. Мөн түүнчлэн, үндэстэн дамнасан корпорациудын нийгмийн хариуцлага, эдийн засгийн өсөлт, орлогын тэгш хувиарлалт зэрэг сэдвийн хүрээнд хэлэлцэх болно.
Ази-Европын уялдаа холбоо салбар хуралдааны хүрээнд дэд бүтцийн тээвэр ложистикийн уялдаа холбоо, эдийн засгийн коридор, худалдаа, шилжилт хөдөлгөөн, мэдээлэл солилцоо, өрсөлдөөнийг нэмэгдүүлэх, тогтвортой аялал жуулчлал, соёлын өвийг хамгаалах, нөхөн сэргээх зэрэг асуудлаар хэлэлцүүлэг өрнүүлэх юм.
Жижиг, дунд бизнес олон улсын нэмүү өртгийн сүлжээнд нэгдэх салбар хуралдаанаар эдийн засгийн интеграц, үйлдвэрлэлийн нэмүү өртгийн сүлжээ, бүс нутгийн хэмжээ дэх үйлдвэрлэл хоорондын тоног төхөөрөмжийн худалдаа, түгээлтийн сүлжээ, ажиллах хүчний шилжилт, дотоодын үйлдвэр болон үндэстэн дамнасан корпорацийн харилцаа, ЖДҮ дэлхийн нэмүү өртгийн сүлжээнд нэгдэх боломж ба бэрхшээл зэрэг асуудлаар хэлэлцэнэ.
Хөрөнгө оруулалт ба ногоон хөгжил салбар хуралдаанаар хөрөнгө оруулалтыг дэмжих, компанийн засаглал, санхүү, нээлттэй засаглал, хариуцлагатай бизнес эрхлэлт болон ногоон технологид хөрөнгө оруулах, сэргээгдэх эрчим хүч зэрэг асуудлуудаар хэлэлцүүлэг өрнүүлнэ.
